កីឡាការិនី អប្សរា ខកឱកាសទៅវគ្គបន្ត តែបង្កើតថិរវេលាមិនធ្លាប់មានពីមុនមកនៅកម្ពុជា
ប្រទេសបារាំង ៖ អត្តពលិកហែលទឹកកម្ពុជា កីឡាការិនី សាក់ប៊ុន អប្សរា កាតារីណា បានបញ្ចប់នៅចំណាត់ថ្នាក់លេខ៦ ក្នុងក្រុមទី៦ ឬ…
ប្រទេសបារាំង ៖ អត្តពលិកហែលទឹកកម្ពុជា កីឡាការិនី សាក់ប៊ុន អប្សរា កាតារីណា បានបញ្ចប់នៅចំណាត់ថ្នាក់លេខ៦ ក្នុងក្រុមទី៦ ឬ Heat ៦ ការប្រកួតកីឡាហែលទឹក វិញ្ញាសារហែលសេរី ៥០ម៉ែត្រ នៅព្រឹត្តិការណ៍កីឡាអូឡាំពិករដូវក្តៅទីក្រុងប៉ារីសឆ្នាំ ២០២៤ ដោយបានប្រើថិរវេលា ២៦.៩០វិនាទី កាលពីថ្ងៃទី៣ ខែសីហា ឆ្នាំ២០២៤ កន្លងទៅ។
តាមរយៈលទ្ធផលនេះ កីឡាការិនីកូនកាត់ខ្មែរ-អាមេរិកវ័យ២៣ឆ្នាំរូបនេះ មិនអាចបន្តទៅកាន់វគ្គបន្ទាប់បានទេ ដោយរូបគេទទួលបានចំណាត់ថ្នាក់រួមលេខ៣៨ នៅក្នុងចំណោមកីឡាការិនីទាំងអស់៧៩នាក់។ នៅក្នុងវិញ្ញាសានេះ កីឡាការិនីចូលរួមទាំងអស់៧៩នាក់ ដោយចែកជា១០ក្រុម ហើយ១ក្រុមមាន៧នាក់ និង៨នាក់។ ការប្រកួតក្នុងចំណោមទាំង៧៩នាក់ កីឡាការិនីដែលប្រើថិរវេលាតិចជាងគេបំផុតចំនួន១៦នាក់ នឹងបន្តឡើងទៅវគ្គពាក់កណ្តាលផ្តាច់ព្រ័ត្រ ហើយ៨នាក់បន្តទៅវគ្គផ្តាច់ព្រ័ត្រ។
ទោះយ៉ាងណាក៏ដោយ បើតាមការបង្ហោះនៅលើគណនីហ្វេសប៊ុកផ្លូវការរបស់កញ្ញា ហែម ថុនវិទីនី ដែលជាប្រតិភូកីឡាហែលទឹកកម្ពុជា និងជាគ្រូបង្វឹកផ្ទាល់ ដែលទៅចូលរួមព្រឹត្តិការណ៍កីឡាអូឡាំពិកទីក្រុងប៉ារីសឆ្នាំ ២០២៤ កាលពីថ្ងៃទី៣ ខែសីហា ឆ្នាំ២០២៤ កន្លងទៅ បានឱ្យដឹងថា អប្សារាជាប់ចំណាត់ថ្នាក់លេខ៣៨ លើពិភពលោកក្នុងចំណោម៧៩ប្រទេស ដែលចូលរួមប្រកួតវិញ្ញាសា ៥០ម៉ែត្រ ដោយសេរីក្នុងថិរវេលា ២៦.៩០វិនាទី។ សូមជំរាបថា តួលេខមួយនេះគឺអស្ចារ្យសំរាប់ប្រទេសកម្ពុជាដែលមិនធ្លាប់មានពីមុនមក។ នេះបើតាមការបង្ហោះរបស់កញ្ញា ហែម ថុនវិទីនី។
កីឡាការិនី សាក់ប៊ុន អប្សរា កាតារីណា គឺជាអត្តពលិកទី២ បន្ទាប់ពីកីឡាករ កូសុងដឺឡាប៉ារ៉ង់ អង់ត្វ័ន ម៉ាតាំងក្លូដ ដែលបញ្ចប់ភារកិច្ចនៅព្រឹត្តិការណ៍កីឡាអូឡាំពិកទីក្រុងប៉ារីស។ ដ្បិតកីឡាករហែលទឹកកូនកាត់ខ្មែរ-បារាំងវ័យ១៨ឆ្នាំរូបនេះ មិនអាចបន្តទៅវគ្គបន្ទាប់ ក្រោយបញ្ចប់នៅចំណាត់ថ្នាក់លេខ៣ ក្នុងក្រុមទី២ ឬ Heat 2 វិញ្ញាសាសេរី១០០ម៉ែត្រ ដោយប្រើថិរវេលា៥២.៩៥វិនាទី កាលពីថ្ងៃទី៣០ ខែកក្កដា ឆ្នាំ២០២៤ កន្លងទៅ។
យ៉ាងណាមិញ កម្ពុជានៅអត្តពលិក១រូបចុងក្រោយ គឺ កីឡាកររត់ប្រណាំង ឈុន ប៊ុនថន ដែលនឹងត្រៀមធ្វើការប្រកួតលើវិញ្ញាសារត់ចម្ងាយ ៨០០ម៉ែត្រ នៅថ្ងៃទី៧ ខែសីហា ឆ្នាំ២០២៤ វេលាម៉ោង១១និង៥៥នាទីព្រឹក ម៉ោងក្នុងស្រុក ដែលត្រូវនឹងម៉ោង៤និង៥៥នាទីរសៀល ម៉ោងនៅកម្ពុជា។
គួរឱ្យដឹងថា កម្ពុជាពុំមានកីឡាណាមួយ ដែលជាប់វគ្គជម្រុះនោះទេ ប៉ុន្តែបានបញ្ជូនអត្តពលិក៣រូប លើប្រភេទកីឡាអត្តពលកម្ម១រូប និងហែលទឹក២រូប ដែលចូលរួមក្នុងលក្ខខណ្ឌសិទ្ធិអនុគ្រោះរបស់គណៈកម្មាធិការអូឡាំពិកអន្តរជាតិ (IOC)៕ (រូបភាព ៖ សហព័ន្ធខ្មែរកីឡាហែលទឹក Khmer Swimming Federation, Olympic Cambodia និង Vitiny Hemthon)
ចែករំលែកព័តមាននេះ