សេដ្ឋកិច្ចមិនល្អ! ធ្វើឱ្យប៉ះពាល់ដល់អ្នកប្រកបរបរស្មូនឆ្នាំង ក្នុងស្រុករលាប្អៀរ
- កំពង់ឆ្នាំង
ខេត្តកំពង់ឆ្នាំង ៖ អ្នកភូមិបា.ញ់ឆ្គោល ឃុំជ្រៃបាក់ ស្រុករលាប្អៀរ ដែលមានមុខរបរស្មូនឆ្នាំង បាន
ខេត្តកំពង់ឆ្នាំង ៖ អ្នកភូមិបាញ់ឆ្គោល ឃុំជ្រៃបាក់ ស្រុករលាប្អៀរ ដែលមានមុខរបរស្មូនឆ្នាំង បានត្អូញត្អែរពីសង្វាក់ផលិតកម្មរបស់ពួកគាត់មិនដំណើរការ ដោយសារបញ្ហាសេដ្ឋកិច្ចមិនល្អ ធ្វើឲ្យប៉ះពាល់ដល់ជីវភាពរស់នៅប្រចាំថ្ងៃ ជាពិសេសពួកគាត់ក៏ជំពាក់ប្រាក់ធនាគារដែលខ្ចីមកធ្វើដើមទុនប្រកបមុខរបរ លុះលក់មិនដាច់ក៏បានចោទជាបញ្ហា ខណៈដែលធនាគារមកទារប្រាក់ជារៀងរាល់ខែ ។
លោក សុត ណូ រស់នៅក្នុងភូមិ ឃុំខាងលើជាអ្នកផលិតចង្ក្រានដី និងដឹកយកទៅលក់តាមខេត្តនានា និយាយថា ដោយសារតែបញ្ហាសេដ្ឋកិច្ចមិនល្អ មិនមែនចោទតែអ្នកជំនួញធំៗ ឬក្រុមហ៊ុនក្រាក់ៗនោះទេ សូម្បីតែអ្នកមានមុខរបរតូចតាចដូចគាត់ដែលជាអ្នកប្រកបរបរស្មូនឆ្នាំងក៏មិនដំណើរការ លក់មិនចេញឡើយ ។ នៅតាមរោង និងតាមក្រោមផ្ទះប្រជាពលរដ្ឋ គឺពេញណែនដោយចង្ក្រាន ក្អម ឆ្នាំង និងផលិតផលជាច្រើនមុខទៀត ដែលធ្វើអំពីដី នៅសល់គរពេញទីតាំងស្តុកទាំងអស់ ។
បើប្រៀបធៀបពីសម័យជំងឺកូវីដ-១៩ គឺសម័យកូវីដលក់ដាច់ជាង តែមកដល់សម័យសេដ្ឋកិច្ចធ្លាក់ចុះនេះគឺសូន្យតែម្តង ។ គាត់ក៏សំណូមពរដល់បងប្អូនអ្នកប្រើប្រាស់ មេតា្តជួយទិញផលិតផលឆ្នាំងរបស់អ្នកភូមិបាញ់ឆ្គោលផល ។
លោក សុត ណូ បានបន្តថា អ្នកភូមិបាញ់ឆ្គោល ដែលមានមុខរបរដឹកឆ្នាំងដើរលក់តាមខេត្តនានា ខ្លះបានបញ្ឈររ៉ឺម៉កឬរថយន្តទុកមួយរយៈ ព្រោះតែការដឹកទៅលក់ គឺលក់មិនដាច់ខាតតែថ្លៃសាំងរថយន្ត សាំងម៉ូតូ ។ ចំណែកការដឹកចេញទៅលក់នោះទៀតសោត គឺដឹកដល់ខេត្តព្រះសីហនុ ខេត្តបាត់ដំបង ខេត្តសៀមរាប និងខេត្តស្ទឹងត្រែងជាដើម ដោយចំណាយពេលពី ១០ទៅ ១៥ថ្ងៃ ទើបត្រឡប់ដល់ផ្ទះវិញ ។
ប៉ុន្តែពេលនេះចង្ក្រានគាត់មិនដំណើរការ ខ្លះក៏ផ្អាកដឹកចេញទៅលក់ តែខ្លះមិនដឹងរកអី ក៏ប្រថុយដឹកទៅលក់ផ្សងព្រេង ។ ទាំងរូបគាត់ក៏ដូចជាអ្នកភូមិបាញ់ឆ្គោល សុទ្ធតែជំពាក់ធនាគារ ដោយសារតែគ្មានដើមទុន ។
ស្ត្រីចំណាស់ម្នាក់ដែលប្រកបរបរស្មូនឆ្នាំងជាច្រើនឆ្នាំ និយាយដែរថា កាលសម័យកូវីដ-១៩ ទោះសមត្ថកិច្ចតាមខេត្តនានា រារាំងមិនឲ្យចូលក្នុងភូមិ ព្រោះខ្លាចឆ្លងជំងឺវីដ-១៩ក្ដី ក៏អ្នកភូមិចេះតែព្យាយាមដឹកយកទៅលក់បានដាច់គ្រាន់បើដែរ ។ ប៉ុន្តែក្រោយពីកូវីដចប់ បែរជាលក់មិនដាច់វិញ ។
បើម៉ូយតាមបណ្តាខេត្តវិញ ទូរស័ព្ទមកប្រាប់ថា មិនបាច់ដឹក ឬផ្ញើរបស់យកទៅទេ ព្រោះនៅឯណោះ ក៏លក់មិនដាច់ដែរ ។ ចំណែកគាត់សព្វថ្ងៃ នៅជំពាក់ធនាគារឯកជន ពេលគេមកទារ គាត់ចេះតែសុំពន្យារពេលរហូត បើទោះត្រូវខាងធនាគារគេស្តីបន្ទោសយ៉ាងណាក៏គាត់ចេះតែទ្រាំទៅ ។
គួររំឭកថា មិនមែនតែអ្នកភូមិបាញ់ឆ្គោលទេ ដែលជួបបញ្ហាសេដ្ឋកិច្ចធ្វើឱ្យប៉ះពាល់ដល់ជីវភាពគ្រួសារ គឺប៉ះពាល់ស្ទើរគ្រប់អាជីវកម្មនានាជាច្រើនទៀត លើកលែងតែអាជីវកម្មខ្លះដែលជាតម្រូវការចាំបាច់នៅអាចដំណើរការបានជាធម្មតា ពិសេសអ្នកលក់ដូរតាមអនឡាញនូវផលិតផលផ្សេងៗ ៕
ចែករំលែកព័តមាននេះ