ខេត្តបាត់ដំបង ៖ ទីបំផុតឃា.តករដៃឆៅ ដែលគេអះអាងថា ស្ថិតក្នុងស្ថានភាពបែកថ្នាំដល់កម្រិតផង បានដើរចុះពីភ្នំឆ្លងថ្នល់មកប្រគល់ខ្លួនឲ្យសមត្ថកិច្ចចាប់យ៉ាងស្រួលបំផុត កាលពីវេលាម៉ោង៥និង១៥នាទីល្ងាចថ្ងៃទី១៤ កក្កដា នៅចំណុចភូមិអូរពងមាន់ ឃុំតាគ្រាម ស្រុកបាណន់ ខណៈដែលចម្លើយសារភាពបឋមថា ខ្លួនស្រវឹងស្រាផង ទើបសម្រេចប្រគល់ខ្លួនឲ្យសមត្ថកិច្ច ។
ឃា.តកដៃឆៅដ៏សាហា.វឃោឃៅនេះ ឈ្មោះ សឿ ទន់ អាយុ២៥ឆ្នាំ មានស្រុកកំណើត នៅភូមិអូរពងមាន់ ឃុំតាគ្រាម ស្រុកបាណន់ ។ ជននេះ ធ្លាប់ជាប់គុកម្ដងដោយសារកា.ប់ឪពុកខ្លួនឯង ។
ស្នងការរងទទួលដឹកនាំការងារការិយាល័យព្រហ្មទណ្ឌកំរិតស្រាល នៃស្នងការខេត្ត លោកឈឿង គឹមសុង បានប្រាប់ថា ជនដៃដល់ឈ្មោះ សឿង ទន់ បានដើរចុះពីលើភ្នំដែលនៅខាងភូមិអូរពងមាន់ នោះឆ្លងថ្នល់ ហើយត្រូវកម្លាំងប្រជាការពារដែលប្រចាំនៅទៅនោះក្រឡេកឃើញ ក៏ព័ទ្ធចាប់ខ្លួនបានតែម្ដង ។
បើតាមសមត្ថកិច្ចបានរំលឹកថា ជននេះបានលបចូលផ្ទះរបស់ខ្លួន នៅភូមិអូរពងមាន់ នោះកាលពីវេលាម៉ោង៩យប់ ថ្ងៃទី១២ កក្កដា ជួបជីដូន ជួបម្ដាយ និងទិញភេសជ្ជៈយកទៅផឹកធ្វើឲ្យកម្លាំងសមត្ថកិច្ចផ្អើលព្រោងព្រាតចេញឡោមព័ទ្ធតំបន់នោះ ក្រោយទទួលបានដំណឹងនេះភ្លាមៗពីជីដូនជននេះ តែជននេះបានរត់គេចខ្លួនឡើងលើភ្នំផុតទាំងយប់ ។ ប៉ុន្តែទីបំផុតឃា.តករកា.ប់សម្លា.ប់មនុស្សគ្មានញញើតដៃនេះអស់ល័ក្ខណ៌ ដើរចុះពីលើភ្នំមកប្រគល់ខ្លួនឲ្យប្រជាការពារប្រចាំភូមិ ចាប់យ៉ាងស្រួលដូចបកចេក ។
បើតាមចម្លើយសារភាព បឋមដែលសមត្ថកិច្ចបានសាកសួរជនបែកថ្នាំដ៏កា.ចសាហា.វនេះបានសារភាពថា ខ្លួនផឹកស្រាស្រវឹងទើបដើរចុះពីភ្នំចូលអន្ទាក់សមត្ថកិច្ច តែជននេះមិនបាននិយាយពីប្រភពស្រា ដែលខ្លួនបានយកផឹកនោះទេ ។ កាលពីរសៀលថ្ងៃទី០៦ កក្កដា ជនបែកថ្នាំឈ្មោះ សឿង ទន់ នេះបានកា.ប់សម្លា.ប់ ស្ត្រីវ័យ៨៤ឆ្នាំម្នាក់ ឈ្មោះ ហោ ប៉ក់ នៅចំណុចភូមិច្រាបក្រសាំង សង្កាត់វត្តគរ ក្រុងបាត់ដំបង ខណៈដែលជនរងគ្រោះកំពុងដើរតាមដងផ្លូវ ។
ក្រោយសម្លា.ប់ជនរងគ្រោះ ជននេះបានជិះកង់រត់គេចខ្លួនបាត់ភ្លាមៗពីកន្លែងកើតហេតុ ។ កម្លាំងសមត្ថកិច្ចបានដេញតាមតម្រុយយ៉ាងប្រផាប់ប្រភីង និងរកឃើញកង់របស់ជននេះទុកចោល តែជននេះត្រូវគេដឹងថា បានរត់គេចខ្លួនសំដៅស្រុកកំណើត នៅភូមិអូរពងមាន់ ហើយកម្លាំងសមត្ថកិច្ចស្ទើរចាប់បាននៅនឹងផ្ទះជននេះតាំងពីដំបូង តែជននេះហាក់ដឹងខ្លួនមុន ក៏រត់គេចឡើងលើភ្នំនៅខាងក្រោយភូមិបាត់ស្រមោលតាំងពីថ្ងៃនោះរហូតមក ។
កម្លាំងសមត្ថកិច្ចចម្រុះរាប់រយនាក់រាប់ទាំងប្រជាការពារក្នុងមូលដ្ឋានរាប់សិបនាក់ផងបានឡើងភ្នំរុករក និងឡោមព័ទ្ធតំបន់ភ្នំតាមគ្រាមដ៏ធំល្វឹងល្វើយនេះយ៉ាងសស្រាក់សស្រាំ គ្រប់ច្រកល្ហក តែមិនមានតម្រុយបន្តិចឡើយ ។ លុះនៅល្ងាចថ្ងៃទី៩ កក្កដា ស្រាប់តែមានសេចក្ដីរាយការណ៍ថា ជននេះបែកថ្នាំនេះបានចុះពីលើភ្នំដើរចូលទៅក្នុង«វត្តភ្នំកុយ» ដែលស្ថិតនៅប៉ែកខាងត្បូងតំបន់ភ្នំតាគ្រាម ដើម្បីសុំព្រះសង្ឃ«បួស» ប៉ុន្តែដោយមើលឃើញសភាពមានល្អ រញីរញ័រដើរគ្មានស្បែកជើង ក្នុងស្ថានភាពដូចមនុស្សឆ្គួតទើបព្រះសង្ឃបដិសេដមិនទទួល ហើយក៏ដេញចេញពីក្នុងវត្តទាំងព្រលប់ ដោយមិនដឹងថា ជននេះដើរទៅទិសខាងណាទេ ។ នេះបើតាមសង្ឃដីកាលោកគ្រូអធិការវត្តភ្នំកុយ ដែលបានជួបផ្ទាល់ជាមួយជនបែកថ្នាំនេះ ។
ក្រោយជននេះដើរចេញពីវត្តភ្នំកុយ ស្រាប់តែនៅថ្ងៃទី១០ កក្កដា ប្រជាពលរដ្ឋបានរាយការណ៍ថា គេបានប្រទះឃើញជននេះនៅម៉ោងប្រហែល១០ព្រឹក នៅចំណុច«ទម្លាប់» ស្ថិតក្នុងភូមិបឹងក្រសាល ឃុំស្នឹង ស្រុកបាណន់ ដែលមានចម្ថាយពីវត្តភ្នំកុយ ប្រហែលជាង២គីឡូម៉ែត្រ ។ ជននេះស្លៀកខោពណ៍ខ្មៅ គ្មានអាវ គ្មានស្បែកជើងទេ ដែលមានភិនភាគដូចជនបែកថ្នាំខាងលើនេះ ។
ក្រោយទទួលបានព័ត៍មានភ្លាម កម្លាំងការិយាល័យព្រហ្មទណ្ឌកំរិតធ្ងន់មួយក្រុមបានបែងចែកគ្នាចុះទៅកាន់ទីនោះ ដើម្បីសួរនាំប្រជាពលរដ្ឋអំពីមុខសញ្ញាដែលប្រទះឃើញនោះ ។ គ្រានោះ ប្រជាពលរដ្ឋបានផ្ដល់ព័ត៍មាននេះជាបន្តបន្ទាប់ថា គេបានប្រទះឃើញភិនភាគជនបែកថ្នាំនេះធ្វើដំណើរឆ្ពោះទៅកាន់ទិសខាងលិច ។ ដោយសារតែបញ្ហាភូមិសាស្ត្រមិនច្បាស់លាស់ ទើបគេបានទាក់ទងសុំកិច្ចសហការពីលោកអធិការស្រុកបាណន់ សុំបញ្ជូនមន្ត្រីមូលដ្ឋានជួយអន្តរាគមន៍ ឬ ជួយទាក់ទងឲ្យកាន់កម្លាំងប្រជាការពារក្នុងមូលដ្ឋានជួយសហការនាំផ្លូវ តែលោកអធិការស្រុកបាណន់ មិនបានសហការទេ ហើយចុចផ្ដាច់ទូរស័ព្ទតែម្ដង ។
ដោយសារតែបែបនេះហើយ ទើបកម្លាំងមួយក្រុមនេះ តាមប្រដេញមុខសញ្ញា ដែលប្រជាពលរដ្ឋបានប្រទះឃើញជាបន្តបន្ទាប់ អស់រយៈពេល០៣ថ្ងៃ រហូតចូលដល់ទឹកដីខេត្តប៉ៃលិន ផ្អើលទាំងប្រជាពលរដ្ឋ និង សមត្ថកិច្ចគ្រប់ស្ថាប័ននៅខេត្តប៉ៃលិនទៀត ដើម្បីជួយអន្តរាគមន៍ឡោមព័ទ្ធតំបន់ «ភ្នំស្រង់មានជ័យ» ដែលគេសង្ស័យថា មុខសញ្ញាដែលអ្នកចម្ការប្រទះឃើញនោះបានគេចខ្លួនទៅកាន់តំបន់ភ្នំនេះ ។ នេះជាដើមចម ដែលនាំឲ្យកម្លាំងសមត្ថកិច្ចខេត្តបាត់ដំបងមួយក្រុមប្រដេញតាមមុខសញ្ញាជនសង្ស័យ តាមការផ្ដល់ព័ត៍មានពីប្រជាពលរដ្ឋដែលអះអាងថា បានជួបប្រទះនឹងជននេះ ជាបន្តបន្ទាប់នៅតាមផ្លូវ និងនៅតាមចម្ការ ។
ប៉ុន្តែជាមួយនឹងការតាមប្រដេញមុខសញ្ញាឆ្ពោះទៅកាន់ទឹកដីខេត្តប៉ៃលិន កម្លាំងសមត្ថកិច្ចភាគច្រើន ក៏មិនបានចាកចេញពីតំបន់ភ្នំតាគ្រាមដែរ គឺនៅតែរុករក និងនៅឡោមព័ទ្ធតំបន់ភ្នំនេះដដែល ។ ព្រោះគេនៅតែមានមន្ទិលថា «ឃា.ត.កបែកថ្នាំ» នេះអាចសម្ងំលាក់ខ្លួននៅលើតំបន់ភ្នំនេះនៅឡើយទេ ។ តម្រុយចុងក្រោយ ដែលគេជឿជាក់ស្ទើរ១០០%ថា ឃា.ត.ករបែកថ្នាំ កំពុងលាក់ខ្លួននៅតំបន់ភ្នំតាគ្រាមនៅឡើយ ដោយសារតែនៅយប់ថ្ងៃទី១២ កក្កដា គេបានប្រទះឃើញជននេះចុះពីលើភ្នំចូលផ្ទះរបស់ខ្លួន នៅភូមិអូរពងមាន់ ។ នេះបើតាមលោក ឈឿង គឹមសុង ស្នងការរង បានបញ្ជាក់ប្រាប់កោះសន្តិភាព។
លោកស្នងការរងរូបនេះ បាននិយាយថា ជនសង្ស័យបានលបចូលផ្ទះ ជួបជីដូន ជួបម្ដាយ និងបានទៅទិញភេសជ្ជៈនៅតូបក្បែរផ្ទះខ្លួនយកទៅផឹក ហើយបាននិយាយជាមួយជីដូនអំពីហេតុផលដែលគេតាមចាប់ខ្លួនទៀតផង ។ លោក ឈឿង គឹមសុង បាននិយាយទៀតថា ក្រោយពីបានជួបចៅចូលដល់ផ្ទះ គាត់ក៏បានរាយការណ៍ប្រាប់សមត្ថកិច្ចភ្លាមៗ តែផុតមួយជំហាន ពេលកម្លាំងយើងចុះទៅដល់ ជនសង្ស័យបានរត់គេចផុតបន្តិចទៅហើយ ។ ម្យ៉ាងយប់ងងឹតផងទើបកម្លាំងរបស់លោក និងប្រជាការពារដកថយតាមគោលដៅជាធម្មតាវិញ ។
លោកគឹមសុង បានបញ្ជាក់ថា កម្លាំងសមត្ថកិច្ចបានដាក់ពង្រាយបន្ថែម និងពង្រឹកគ្រប់គោលដៅទាំងអស់រហូតដល់ល្ងាចថ្ងៃទី១៤ កក្កដា ស្រាប់តែជនសង្ស័យសម្រេចចិត្តដើរចុះពីលើភ្នំឆ្លងថ្នល់ចូលចំគោលដៅកម្លាំងប្រជាការពារ និងប្រគល់ខ្លួនឲ្យប្រជាការពារចាប់ ខណៈដែលកម្លាំងរបស់លោកនៅក្បែរនោះដែរ ក៏ក្របួចជាប់តែម្ដង ។
ពាក់ព័ន្ធនឹងការសម្រេចចិត្តចុះពីលើភ្នំប្រគល់ខ្លួនឲ្យប្រជាការពារភូមិចាប់នេះ បើតាមលោកឈឿង គឹមសុង ដែលបានសួរនាំជនដៃដល់បឋម ជននេះបានសារភាពថា «ខ្លួនបានផឹកស្រាស្រវឹង ហើយក៏ដើរចុះពីភ្នំចូលទន្ទាក់កម្លាំងសមត្ថកិច្ចតែម្ដង» ។ ពេលនេះឃា.តកបែកថ្នាំរូបនេះត្រូវបានបញ្ជូនទៅកាន់ស្នងការខេត្ត ដើម្បីសួរនាំហើយ ។ ហើយចាប់ពីពេលនេះតទៅ ប្រជាពលរដ្ឋក៏លែងមានការភ័យខ្លាចផ្លែកាំបិ.តឃា.តករដៃឆៅនេះទៀតដែរ ព្រោះជននេះបានជាប់អន្ទាក់កម្លាំងប្រជាការពារភូមិយ៉ាងស្រួលដូចបកចេក ៕
ចែករំលែកព័តមាននេះ