ខេត្តប៉ៃលិនទឹកដីត្បូងពេជ្របង្កប់ដោយភ្នំមានឈ្មោះជាប្រវត្តិសាស្ត្រ
- ប៉ៃលិន
ខេត្តប៉ៃលិន ៖ ខេត្តប៉ៃលិន ជាតំបន់ខ្ពង់រាបនិងតំបន់ភ្នំ ដូច្នេះស្ទើរតែទូទាំងខេត្តបានគ្របដណ្តប់
ខេត្តប៉ៃលិន ៖ ខេត្តប៉ៃលិន ជាតំបន់ខ្ពង់រាបនិងតំបន់ភ្នំ ដូច្នេះស្ទើរតែទូទាំងខេត្តបានគ្របដណ្តប់
ខេត្តប៉ៃលិន ៖ ខេត្តប៉ៃលិន ជាតំបន់ខ្ពង់រាបនិងតំបន់ភ្នំ ដូច្នេះស្ទើរតែទូទាំងខេត្តបានគ្របដណ្តប់ទៅដោយភ្នំ និងកូនភ្នំជាច្រើន ។ ខេត្តប៉ៃលិនដ៏តូចច្រឡឹងនេះ មានក្រុង១ និងស្រុក១ គឺក្រុងប៉ៃលិន និងស្រុកសាលាក្រៅ ។
អាជ្ញាធរមូលដ្ឋានបានឱ្យដឹងថា ក្រៅពីភ្នំយ៉ាតដែលជាភ្នំប្រវត្តិសាស្ត្រ នៅក្នុងស្រុកសាលាក្រៅ មានភ្នំច្រើនគួរឱ្យកត់សម្គាល់ដូចជា ៖ -ភ្នំដោះក្រមុំ ភ្នំស្រង់មានជ័យ ភ្នំខកមូស ភ្នំក្ងោក ស្ថិតនៅក្នុងភូមិក្ងោក ឃុំស្ទឹងកាច់ ។-ភ្នំកូនដំរី ភ្នំក្រិញ ភ្នំអូរដូនតា ភ្នំកេស ភ្នំព្រាល អូរគន្ធាងវា់ ភ្នំបាយសី ស្ថិតនៅក្នុងឃុំស្ទឹងត្រង់ ។-ភ្នំកំពូលបី -ភ្នំប៉ោត ភ្នំសារវណ្ណ ភ្នំរថក្រោះឆេះ ភ្នំផ្សារព្រំ ភ្នំភូមិទី១៨ ភ្នំអូររអិល ភ្នំបឹងព្រលិត ភ្នំកុយ ភ្នំស្រែអន្ទាក់ ភ្នំសំបូរ ភ្នំស្ពុង ស្ថិតនៅក្នុងឃុំស្ទឹងកាច់ និងឃុំសាលាក្រៅ ។
សូមបញ្ជាក់ថា នៅក្នុងស្រុកសាលាក្រៅក៏មានភ្នំ និងកូនភ្នំជាច្រើនទៀត ដែលស្ថិតនៅរាយពាសពេញ ខណៈដែលភ្នំខ្លះត្រូវបានអាជ្ញាធរឈូសឆាយយកទៅប្រើប្រាស់ធ្វើផ្លូវ និងខ្លះទៀត នៅល្អទាំងស្រុង ដោយមិនមានអ្នកណាអាចប៉ះពាល់ក្រៅពីយកទៅអភិវឌ្ឍសម្រាប់ខេត្តនេះបានឡើយ ។ ចំណែកកូនភ្នំមួយចំនួនទៀត ត្រូវបានប្រជាពលរដ្ឋកាប់ឆ្ការដាំពោតក្រហម និងដំឡូងមី ព្រមទាំងដំណាំផ្សេងៗទៀតនៅលើកំពូលតែម្តង ។
ទោះបីជាយ៉ាងណា បច្ចុប្បន្ននេះរដ្ឋបាលខេត្ត បានខិតខំការពារព្រៃភ្នំទាំងអស់ ដោយមិនអនុញ្ញាតឱ្យប្រជាពលរដ្ឋបន្តកាប់ទន្ទ្រានរានយកដីភ្នំធ្វើជាកម្មសិទ្ធិផ្ទាល់ខ្លួនឡើយ ដើម្បីរក្សាព្រៃភ្នំឱ្យគង់វង្ស ក្នុងគោលបំណងឱ្យទាក់ទាញទឹកភ្លៀង និងធ្វើឱ្យមានលំនឹងអាកាសធាតុថែមទៀត ។អ្វីដែលត្រូវបានគេកត់សម្គាល់ជាពិសេសនៅខេត្តប៉ៃលិននោះ គឺភ្នំយ៉ាត និងភ្នំខៀវ ដែលមានជ្រោះទឹកធ្លាក់ដ៏ល្បីល្បាញ គឺជ្រោះអូរតាវ៉ៅ ។
រមណីយដ្ឋានវប្បធម៌ប្រវត្តិសាស្រ្តភ្នំយ៉ាត
ភ្នំយ៉ាតគឺជារមណីយដ្ឋានវប្បធម៌ប្រវត្តិសាស្ត្រមួយនៅក្នុងខេត្តប៉ៃលិន ស្ថិតនៅជាប់ផ្លូវជាតិលេខ៥៧ និងនៅជិតវត្តរតនសោភ័ណ ហៅវត្តកោងកាង គឺជាបេះដូងនៃខេត្តប៉ៃលិន ។
ប្រជាពលរដ្ឋ អ្នកដំណើរទាំងឡាយដែលចេញចូលមកខេត្តប៉ៃលិន តែងតែឆ្លងកាត់តាមជើងភ្នំយ៉ាត និងគយគន់សំណង់ប្រវត្តិសាស្ត្រមួយចំនួន ដែលនៅជាប់ជើងភ្នំយ៉ាត ។ ដីនៅលើភ្នំនេះ គឺជាដីរ៉ែធម្មជាតិ មានត្បូងពេជ្រមានតម្លៃយ៉ាងច្រើនផងដែរ ។ នៅលើកំពូលភ្នំយ៉ាត មានវត្តមួយឈ្មោះថា វត្តគិរីរតនារាមភ្នំយ៉ាត ឬហៅថា វត្តភ្នំយ៉ាត និងមានសំណង់បុរាណ សំណង់ថ្មីៗ និងអាស្រមជាច្រើន ដូចជាព្រះចូឡាមុនីចេតិយតូចធំ អាស្រមលោកយាយ យ៉ាត រូបសំណាកព្រះពុទ្ធផ្ចាញ់មារកម្ពស់២១ម៉ែត្រ សំណង់ប្រាសាទ៨ទិស-ព្រះសិអារ្យមេត្រី អាស្រមព្រះគោព្រះកែវជាដើម ។ នៅជើងភ្នំយ៉ាត ក៏មានអាស្រមលោកយាយយ៉ាតដែរ ពិសេសអាស្រមធំរបស់លោកយាយយ៉ាត នៅភាគខាងកើតនៃភ្នំ ដែលមានរូបសំណាកលោកយាយយ៉ាត ធ្វើអំពីថ្មភ្នំព្រះវិហារ ឆ្លាក់ដោយវិចិត្រករខ្មែរនៅស្រុកសន្ទុកខេត្តកំពង់ធំ មានទម្ងន់ជាង៣៣តោន ។
ប្រជាពលរដ្ឋ អ្នកដំណើរ និងភ្ញៀវទេសចរទាំងឡាយដែលមកលេងកម្សាន្តនៅខេត្តប៉ៃលិន តែងតែចូលមកអុជធូប បួងសួងសុំសេចក្តីសុខសប្បាយពីលោកយាយយ៉ាត ដោយពួកគាត់មានជំនឿថា លោកយាយយ៉ាតមានបារមីស័ក្តិសិទ្ធិ ។ មានរឿងតំណាលថា ក្នុងឆ្នាំ១៩២២ មានជនអន្តោប្រវេសន៍មួយក្រុមបានមករស់នៅ ប្រកបរបរជីកត្បូង និងបរបាញ់សត្វនៅតំបន់នេះ ហើយបានកសាងអាស្រមមួយនៅលើកំពូលភ្នំយ៉ាត ។ ទីនេះជាកន្លែងសក្ការបូជា ដែលស័ក្តិសិទ្ធិ និងជាបេះដូងរបស់ខេត្តប៉ៃលិនសព្វថ្ងៃ ។ រឿងនេះបាននិយាយអំពីប្ដីប្រពន្ធមួយគូ មានឈ្មោះយ៉ាតដូចគ្នា ដែលទាំង២នាក់ជាអ្នកជីកត្បូងនៅតំបន់ភ្នំយ៉ាតនេះ ។
បន្ទាប់ពីមានអាយុកាន់តែចាស់រៀងៗខ្លួនទៅ ពួកគេបានសញ្ជឹងគិតជាមួយគ្នា ផ្តើមគំនិតកសាងអាស្រមមួយនៅលើភ្នំសម្រាប់គោរពបូជា គឺនៅលើភ្នំយ៉ាតនាពេលសព្វថ្ងៃនេះ ។ កាលនោះដែរ អ្នកភូមិផ្សេងទៀតបានទិញកាំភ្លើងដើម្បីការពារទ្រព្យសម្បត្តិរបស់ពួកគេ និងបរបាញ់សត្វព្រៃ ។ ដោយសារការបរបាញ់នេះហើយ ធ្វើឱ្យព្រលឹងអារុក្ខអារក្សអ្នកតាព្រៃមានការខឹងសម្បា និងបានបង្ហាញខ្លួនឱ្យប្ដីប្រពន្ធទាំង២នាក់នោះឃើញ ដើម្បីនាំដំណឹងទៅប្រាប់អ្នកភូមិផ្សេងទៀត ដោយនិយាយថា ប្រសិនបើអ្នកភូមិឈប់បាញ់សត្វ ព្រលឹងនោះនឹងជូនត្បូងពេជ្រមានតម្លៃដល់ពួកគេហើយព្រលឹងនោះ ក៏បានបញ្ជាពួកគេឲ្យសម្ដែងរបាំក្ងោកជូនទស្សនាជារៀងរាល់ថ្ងៃ នៅអាស្រមលើកំពូលភ្នំយ៉ាតនេះ ។ តមក អាស្រមនោះក៏បានក្លាយមកជាវត្តភ្នំយ៉ាតសព្វថ្ងៃ ។
រមណីយដ្ឋាន «ទឹកធ្លាក់ភ្នំខៀវ» ឬ «ជ្រោះអូរតាវ៉ៅ»
រមណីយដ្ឋាន «ទឹកធ្លាក់ភ្នំខៀវ ឬទឹកធ្លាក់អូរតាវ៉ៅ» ស្ថិតក្នុងទឹកដីនៃខេត្តប៉ៃលិន បាននិងកំពុងទាក់ទាញភ្ញៀវទេសចរជាតិ និងអន្តរជាតិឲ្យទៅទស្សនាតំបន់ដ៏ស្រស់បំព្រងមួយនេះយ៉ាងខ្លាំង ។ តំបន់ធម្មជាតិនៅភាគខាងលិចនៃដែនដីសុវណ្ណភូមិនេះ មានទឹកធ្លាក់រហូតដល់ទៅ៧ជាន់ ស្ថិតនៅភូមិកូនខ្លុង សង្កាត់ឣូរតាវ៉ៅ ក្រុងប៉ៃលិន និងមានចម្ងាយប្រមាណ ៧គីឡូម៉ែត្រ ពីទីរួមខេត្តប៉ៃលិន ។
រមណីយដ្ឋាន «ទឹកធ្លាក់ភ្នំខៀវ» មានស្ទឹងធម្មជាតិដែលមានទឹកថ្លាឈ្វេង មានជ្រោះទឹកហូរធ្លាក់បែកផ្កាត្រែងលើល្បាក់ថ្មដាយ៉ាងខ្ពស់ មានខ្យល់អាកាសត្រជាក់ដល់ក្រអៅបេះដូង ដែលធ្វើឲ្យភ្ញៀវទេសចរជាតិ និងអន្តរជាតិទៅលេងយ៉ាងសប្បាយរីករាយក្រៃលែង ។ បន្ថែមលើនេះ បរិវេណកម្សាន្តត្រូវបានកែច្នៃឲ្យមានកន្លែងអង្គុយលេងជាច្រើន មានខ្យូសអង្គុយ ហើយអាហារលក់ដូរមិនថ្លៃនោះទេ ។
ជាមួយគ្នានេះ មានកន្លែងសម្រាប់ទុកដាក់យានយន្ត ដោយមានសន្តិសុខយាមកាមយ៉ាងល្អ មិនព្រួយបារម្ភពីការបាត់បង់ឡើយ ។ដើម្បីទៅដល់រមណីយដ្ឋាន«ទឹកធ្លាក់ភ្នំខៀវ» គេត្រូវធ្វើដំណើរតាមផ្លូវជាតិលេខ៥៧ រហូតដល់ស្ពានថ្មអូរតាវ៉ៅ ហើយឡើងទៅប្រមាណជា ១០០ម៉ែត្រទៀត គេនឹងឃើញផ្លាកសញ្ញាបង្ហាញទីតាំង ត្រង់ម្ដុំផ្លូវបំបែកភូមិកូនខ្លុងពីខាងឆ្វេងដៃ ។ គេក៏ត្រូវជិះបត់ចូលទៅប្រមាណ ៧គីឡូម៉ែត្រទៀត ទើបដល់ទីតាំងគួរជាទីមនោរម្យខាងលើនេះ ៕
ចែករំលែកព័តមាននេះ