អ្នកសងលុយធនាគារយឺតបានកើនឡើងដល់ជាង៦ភាគរយ
- ភ្នំពេញ
រាជធានីភ្នំពេញ ៖ គិតត្រឹមត្រីមាសទី១ ឆ្នាំ២០២៤ នេះ ឥណនទានសំណងយឺតលើសពី ៣០ថ្ងៃ ឬឥណនទានដែលមានហានិភ័យកើនដល់ ៦,០៣ ភាគរយ…
រាជធានីភ្នំពេញ ៖ គិតត្រឹមត្រីមាសទី១ ឆ្នាំ២០២៤ នេះ ឥណនទានសំណងយឺតលើសពី ៣០ថ្ងៃ ឬឥណនទានដែលមានហានិភ័យកើនដល់ ៦,០៣ ភាគរយ ។ នេះបើតាមការប្រកាសដោយការិយាល័យឥណទានកម្ពុជា ដែលហៅកាត់ថា CBC ។
ប្រភពដដែលបានឱ្យដឹងថា ចំនួនគណនីឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនមានការកើនឡើងចំនួនកើន ៤,០៩% ប្រៀបពីត្រីមាសមុនដែលធ្វើឱ្យចំនួនគណនី នៅទូទាំងប្រទេសសរុបមានចំនួន ១,៨៣ លានគណនី ។ ក្នុងចំណោមចំនួននេះ ៨០,០៧% ជាឥណទានសម្រាប់ប្រើប្រាស់ផ្ទាល់ខ្លួន ខណៈចំណែកតូចជាងគេ គឺកម្ចីប័ណ្ណឥណទាន ៨,៧០% និងកម្ចីអចលនទ្រព្យមាន ១១,០៣% ។
ប្រភពដដែលបានបន្តថា កំណើននេះត្រូវបានគេមើលឃើញនៅក្នុងគ្រប់តំបន់នៃព្រះ រាជាណាចក្រកម្ពុជា ដោយនៅតំបន់ខ្ពង់រាបមានកំណើន ៥,៥% នៅតំបន់ឆ្នេរ ៣,៨% នៅតំបន់ទំនាប ៣,៩% និងនៅតំបន់ទន្លេសាប ៤,៥% ។ សមតុល្យឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួន ក៏បានបន្តកើនឡើងជាលំដាប់ក្នុងកម្រិតកើន ១,៣៦% គិតត្រឹមពីខែមីនា ឆ្នាំ ២០២៤ ហើយនៅចុងត្រីមាសនេះ សមតុល្យឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនមានចំនួន ១៥,២១ ពាន់លានដុល្លារអាមេរិក ។
របាយការណ៍បង្ហាញថា បើទោះបីជាចំនួនគណនីនៃកម្ចីអចលនទ្រព្យមានត្រឹមតែ ១១,០៣% នៃចំនួនគណនីសរុបក៏ដោយ កម្ចីអចលនទ្រព្យនៅតែមានលើសពីពាក់កណ្តាល នៃសមតុល្យឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនសរុប ៥៣,២០% ចំណែកឯសមតុល្យឥណទានប្រើប្រាស់ផ្ទាល់ខ្លួនមានចំណែក ៨០,៩០% និងសមតុល្យឥណទានប្រើប្រាស់ផ្ទាល់ខ្លួនមានចំណែក ៤៥,៦៣% ។
លោក កាំង តុងងី អ្នកនាំពាក្យសមាគមមីក្រូហិរញ្ញាវត្ថុកម្ពុជា បានឱ្យកម្មវិធីលុយ នៃសារព័ត៌មាន កោះសន្តិភាព ដឹងនៅថ្ងៃទី ៨ ខែឧសភា ឆ្នាំ ២០២ ៤ថា ក្នុងស្ថានភាពបច្ចុប្បន្ន ការកើនឡើងឥណនទានប្រឈមហានិភ័យ ឬក៏ភាសាងាយយល់ឥណនទានដែលប្រជាពល រដ្ឋបង់សងយឺតលើសពី ៣០ ថ្ងៃ បានកើនដល់កម្រិត ៧ ភាគរយ ក៏ប៉ុន្តែផ្អែកលើស្ថានភាព បច្ចុប្បន្នយើងគិតថា នេះគឺជាកម្រិតមួយដែលយើងគិតថា បានរំពឹងទុករួចទៅហើយ ស្ថិតនៅ ក្នុងកម្រិតមួយដែលយើងអាចគ្រប់គ្រងបាន ។
ដោយឡែក លោក អឿ សុធារ័ត្ន ប្រធាននាយកប្រតិបត្តិនៃ CBC បានឱ្យដឹងថា តម្រូវ ការពាក្យស្នើសុំឥណទានបុគ្គលសម្រាប់ប្រើប្រាស់ផ្ទាល់ខ្លួនមានការកើនឡើងបន្ថែមលើនេះ សមិទ្ធផលឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនក៏នៅតែវិជ្ជាមាន ជាមួយនឹង ចំនួនគណនី និងសមតុល្យកម្ចីក្នុងត្រីមាសទីមួយនេះ បើប្រៀបធៀបនឹងត្រីមាសមុន ។ លោកបានបន្ថែមទៀតថា គុណភាពឥណទានមានការធ្លាក់ចុះ ជាមួយនឹងការកើនឡើងនៃអនុបាតនៃគណនីប្រាក់កម្ចីជាមួយនឹងការសងយឺត ៣០ ថ្ងៃហួសកាលបរិច្ឆេទកំណត់ពី ៥,១៤% ក្នុងត្រីមាសទីបួនក្នុងឆ្នាំ ២០២៣ មក ៦.០៣% ក្នុងត្រីមាសនេះ ៕
ចែករំលែកព័តមាននេះ