រាជធានីភ្នំពេញ ៖ ស្ត្រីវ័យក្មេងម្នាក់បានផឹកទឹកត្នោតជូរអស់ជាច្រើនលីត្រចាប់តាំងពីវេលាល្ងាចរហូតដល់ទៀបភ្លឺទើបចូលដេក លុះព្រឹកឡើងស្រាប់តែគេប្រទះឃើញស្លាប់បាត់បង់ជីវិតបង្កឱ្យមានការភ្ញាក់ផ្អើលទាំងព្រលឹម ហើយប៉ូលិសមូលដ្ឋានបានចុះទៅធ្វើកំណត់ហេតុភ្លាមៗដែរ ។
ហេតុការណ៍នេះ បានកើតឡើងកាលពីវេលាម៉ោង៦ព្រឹកថ្ងៃទី២៧ មិថុនា នៅភូមិតាងួន សង្កាត់កាកាប ខណ្ឌពោធិ៍សែនជ័យ ។ ស្ត្រីដែលស្លាប់ឈ្មោះយ៉េ លីហ្សា អាយុ២០ឆ្នាំ មានស្រុកកំណើតនៅក្នុងសង្កាត់ព្រែកឯង ខណ្ឌមានជ័យ និងស្នាក់នៅក្នុងរោងលក់ទឹកត្នោតជូរកន្លែងកើតហេតុខាងលើ ព្រោះនាងគ្មានផ្ទះសម្រាប់ស្នាក់នៅពិតប្រាកដឡើយ ។
តាមប្រភពព័ត៌មានបានឱ្យដឹងថា ស្ត្រីម្នាក់នេះបានជួយលក់ទឹកត្នោតជូរឱ្យគេ ហើយនៅល្ងាចថ្ងៃទី២៦ មិថុនា នាងបានផឹកទឹកត្នោតជូរជាមួយមិត្តភក្តិអស់ជាច្រើនលីត្រ ដែលការផឹកស៊ីនោះបានប្រព្រឹត្តទៅរហូតដល់វេលាម៉ោង៣ទៀបភ្លឺថ្ងៃទី២៧ មិថុនា ទើបឈប់ ហើយនាងក៏បានចូលដេកនៅក្នុងរោងដូចធម្មតា ។ ខណៈនោះពុំមាននរណាម្នាក់បានដឹងថា នាងមានបញ្ហាអ្វីកើតឡើងនោះទេ រហូតដល់វេលាព្រឹកដោយសារតែឃើញនាងដេកយូរពេកមិនទាន់ក្រោកដូចសព្វមួយដង ស្ត្រីម្នាក់ដែលជាអ្នកស្នាក់នៅជាមួយបានចូលទៅដាស់ស្រាប់តែឃើញនាងស្លាប់បាត់ទៅហើយ ទើបមានការឆោឡោឡើង ។
ប្រភពដដែលបានបន្តថា បន្ទាប់ពីមានការភ្ញាក់ផ្អើលប៉ូលិសមូលដ្ឋានក៏បានចុះទៅកាន់កន្លែងកើតហេតុធ្វើការពិនិត្យជាក់ស្តែង ។ ដោយឡែកអ្នកជិតខាងបានឱ្យដឹងថា ស្ត្រីរូបនេះស្នាក់នៅគ្មានគោលដៅច្បាស់លាស់ឡើយ ម្តងស្នាក់នៅក្នុងរោងលក់ទឹកត្នោតជូរនិងម្តងស្នាក់នៅកន្លែងផ្សេង ហើយកន្លងមកនាងមានជំងឺចម្លែក ម្យ៉ាងឧស្សាហ៍ប្រកាច់ជាញឹកញាប់ពុំដឹងថាជាជំងឺអ្វីឡើយ ។ ពេលនេះនាងបានស្លាប់បាត់បង់ជីវិតដែលពុំទាន់ដឹងថាស្លាប់ដោយសារជំងឺអ្វីពិតប្រាកដទេ ប៉ុន្តែសមត្ថកិច្ចសង្ស័យថាអាចបណ្តាលមកពីបញ្ហាគាំងបេះដូង ៕
ចែករំលែកព័តមាននេះ