ក្រសួងកសិកម្ម រុក្ខាប្រម៉ាញ់ និងនេសាទ បានដឹកនាំក្រុមអ្នកសារព័ត៌មានចុះទស្សនកិច្ចផ្ទាល់ ដើម្បីស្វែងយល់អំពីខ្សែច្រវ៉ាក់ផលិតកម្មស្វាយចន្ទីនៅកម្ពុជា នាខេត្តកំពង់ធំ ខេត្តក្រចេះ និង
រាជធានីភ្នំពេញ ៖ ក្រសួងកសិកម្ម រុក្ខាប្រម៉ាញ់ និងនេសាទ បានដឹកនាំក្រុមអ្នកសារព័ត៌មានចុះទស្សនកិច្ចផ្ទាល់ ដើម្បីស្វែងយល់អំពីខ្សែច្រវ៉ាក់ផលិតកម្មស្វាយចន្ទីនៅកម្ពុជា នាខេត្តកំពង់ធំ ខេត្តក្រចេះ និងខេត្តកំពង់ធំ។
លោកជំទាវ អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រម៉ាញ់ និងនេសាទ បានឲ្យដឹងថា ដោយមានការសហការពីសហភាពអឺរ៉ុប (EU) អង្គការ GIZ អង្គការ ក្រសួងពាណិជ្ជកម្មក្រសួងកសិកម្ម បានដឹកនាំក្រុមអ្នកសារព័ត៌មានចំនួន៤០នាក់ មកពី៣០ស្ថាប័ន ដើម្បីចុះផ្ទាល់ផ្តិតយករូបភាព ក៏ដូចជាយកព័ត៌មានអំពីការផលិតផលគ្រាប់ស្វាយចន្ទី ចាប់ពីដំបូង រហូតដល់ចេញជាផលិតផលសម្រាប់នាំចេញទៅលក់លើទីផ្សាយនៅក្នុងប្រទេស និងក្រៅប្រទេសឲ្យប្រជាពលរដ្ឋបានដឹង។
លោកជំទាវ បានលើកឡើងថា ការដែលក្រសួង ក៏ដូចជាដៃគូរដឹកនាំអ្នកសារព័ត៌មានចុះទៅផ្ទាល់នេះ ដោយសាររាជរដ្ឋាភិបាល ក៏ដូចជាក្រសួងកសិកម្ម បានដាក់ចេញគោលនយោបាយស្វាយចន្ទី។
លោកជំទាវ បន្ថែមថា ដំណើរទស្សនកិច្ចសារព័ត៌មាន ធ្វើឡើងស្របពេលជាមួយវេទិកាស្វាយចន្ទី រៀបចំឡើងដើម្បីបង្ហាញអំពីវឌ្ឍនភាព និងឱកាសសម្រាប់ការវិនិយោគវិស័យស្វាយចន្ទីរបស់កម្ពុជា តាមរយៈគំនិតផ្តួចផ្តើមពីក្រសួងកសិកម្ម រុក្ខាប្រម៉ាញ់ និងនេសាទ សហការជាមួយក្រសួងពាណិជ្ជកម្ម និងឧបត្ថម្ភគាំទ្រដោយសហភាពអឺរ៉ុប ដើម្បីបង្ហាញពីខ្សែច្រវាក់ផលិតកម្មស្វាយចន្ទីនៅកម្ពុជា និងឈានទៅពង្រីកសក្តានុពលនៃវិស័យនេះឱ្យបានកាន់តែទូលំទូលាយ។
លោកជំទាវបញ្ជាក់ថា «តាមរយៈដំណើរទស្សនកិច្ចរយៈពេល៣យប់៤ថ្ងៃនេះ អ្នកសារព័ត៌មានដែលចូលរួមនឹងបានឈ្វេងយល់អំពីខ្សែច្រវាក់ផលិតកម្មស្វាយចន្ទី ចាប់តាំងពីការដាំដុះ ការប្រមូលផល រហូតដល់ការកែច្នៃ និងសក្តានុពលទីផ្សារ»។
ជាងនេះដំណើរទស្សនកិច្ចនេះ ក៏នឹងផ្តល់នូវការយល់ដឹងទូលំទូលាយអំពីកិច្ចខិតខំប្រឹងប្រែងរបស់ក្រសួងកសិកម្ម រុក្ខាប្រម៉ាញ់ និងនេសាទ ក្នុងការលើកកម្ពស់ផលិតកម្មស្វាយចន្ទី ស្របទៅតាមគោលនយោបាយជាតិស្ដីពីស្វាយចន្ទី ឆ្នាំ២០២២-២០២៧- ដាក់ចេញដោយក្រសួងពាណិជ្ជកម្ម ដើម្បីជំរុញឱ្យកម្ពុជា ឈានទៅជាអធិរាជស្វាយចន្ទី។
ដោយឡែក សហភាពអឺរ៉ុប ដែលជាអ្នកឧបត្ថម្ភការរៀបចំកម្មវិធីនេះ មានបំណងបង្ហាញអំពីការប្តេជ្ញាចិត្តរបស់ខ្លួន ចំពោះវិស័យកសិកម្មរបស់កម្ពុជា ដោយសង្កត់ធ្ងន់លើការអភិវឌ្ឍប្រកបដោយចីរភាព និងការធ្វើពិពិធកម្មសេដ្ឋកិច្ច។
ដំណើរទស្សនកិច្ចសារព័ត៌មាននេះ នឹងបម្រើជាសក្ខីភាពមួយចំពោះកិច្ចខិតខំប្រឹងប្រែងរួមគ្នារវាងប្រទេសកម្ពុជា និងសហភាពអឺរ៉ុបក្នុងការអភិវឌ្ឍឧស្សាហកម្មគ្រាប់ស្វាយចន្ទីដែលមានសក្តានុភាព និងភាពរីកចម្រើន។
យោងតាមឯកសាររបស់ក្រសួងកសិកម្មផ្តល់ដល់អ្នកសារព័ត៌បានលើកឡើងថា គោលបំណងដំណើរទស្សនកិច្ចសារព័ត៌មាន គឺដើម្បីផ្តល់ការយល់ដឹងស៊ីជម្រៅអំពីខ្សែច្រវាក់ផលិតកម្មស្វាយចន្ទីនៅកម្ពុជា ដល់ក្រុមសារព័ត៌មាន ដោយធានាថា ពួកគេនឹងទទួលបានចំណេះដឹងទូលំទូលាយអំពីវិសាលភាព បញ្ហាប្រឈម និងឱកាសនៃឧស្សាហកម្មនេះ។
ជំរុញកិច្ចសហប្រតិបត្តិការ ដោយបង្កើតបរិយាកាសសហការដែលអ្នកសារព័ត៌មាន អាចជួបប្រាស្រ័យផ្ទាល់ជាមួយតំណាងសំខាន់ៗពីក្រសួងកសិកម្ម រុក្ខាប្រម៉ាញ់ និងនេសាទ ក្រសួងពាណិជ្ជកម្ម ក៏ដូចជាសមាជិកនៃគណៈប្រតិភូសហភាពអឺរ៉ុប ដើម្បីពិភាក្សាអំពីស្ថានភាពបច្ចុប្បន្ន និងអនាគតរបស់ឧស្សាហកម្មគ្រាប់ស្វាយចន្ទី។ លើកកម្ពស់ភាពជោគជ័យ ក្នុងឧស្សាហកម្ម តាមរយៈការរំលេច និងផ្សព្វផ្សាយរឿងរ៉ាវជោគជ័យ ក្នុងខ្សែសង្វាក់តម្លៃគ្រាប់ស្វាយចន្ទីដល់សាធារណជនក្នុងប្រទេសកម្ពុជា ដោយបង្ហាញពីកិច្ចខិតខំប្រឹងប្រែងរបស់ក្រសួងកសិកម្ម និងក្រសួងពាណិជ្ជកម្ម ដោយមានការសហការពីសហភាពអឺរ៉ុប។
ផ្តល់ឱកាសដល់អ្នកសារព័ត៌មានបានស្ដាប់ពីបទពិសោធន៍ផ្ទាល់របស់សហគមន៍ស្វាយចន្ទី និងអ្នកពាក់ព័ន្ធផ្សេងៗ រួមមាន ៖ កសិករ អ្នកកែច្នៃ និងអ្នកនាំចេញ។ បង្កើនគុណភាពនៃខ្លឹមសារផ្សព្វផ្សាយ តាមរយៈការផលិតព័ត៌មានគ្រប់ទម្រង់ ទាំងអត្ថបទ សំឡេង និងវីដេអូ ដែលមានខ្លឹមសារទាក់ទងនឹងសហគមន៍គ្រាប់ស្វាយចន្ទី និងខ្សែសង្វាក់តម្លៃប្រកបដោយប្រសិទ្ធភាព។
សូមជម្រាបថា ក្នុងរយៈ១០ខែឆ្នាំ២០២៣ កម្ពុជាបាននាំគ្រាប់ស្វាយចន្ទីមិនទាន់កែច្នៃប្រមាណ៦០ម៉ឺនតោន ដោយតម្លៃចាប់ពី១២០០ដុល្លារ ទៅ១៩០០ដុល្លារក្នុងមួយតោន។ ផ្ទៃដីដាំស្វាយចន្ទីជិត៧០ម៉ឺនហិកតា៕
ចែករំលែកព័តមាននេះ