ADផ្ទាំងផ្សព្វផ្សាយពាណិជ្ជកម្ម

ព្រឺសម្បុរខ្ញាក, ពូទីនទ.ម្លា.យអាថ៌កំបាំងថាយន្តហោះដឹកព្រីហ្គោហ្ស៊ីនធ្លា.ក់ដោយសារការផ្ទះគ្រា.ប់.បែ.ក

1 ឆ្នាំ មុន

០៦ ខែ តុលា ឆ្នាំ ២០២៣ ម៉ោង ២២:៥៧

ទីក្រុងម៉ូស្គូ៖ លោកពូទីនទើបតែទម្លាយឱ្យដឹងនូវអាថ៌កំបាំងដ៏គួរឱ្យភ្ញាក់ផ្អើល១កាលពីពេលថ្មីៗនេះពាក់ព័ន្ធនឹងសំណុំរឿងធ្លាក់យន្តហោះដឹកមេទាហានស៊ីឈ្នួលរបស់ក្រុមវ៉ាកណឺគ្រុប (Wagner Group) កាលពីថ្ងៃទី២៣ ខែសីហា ដែលនាំទៅដល់ការស្លាប់មនុស្សទាំងអស់។ លោកពូទីននិយាយយោងតាមការស៊ើបអង្កេតថាការធ្លាក់នេះបណ្ដាលមកពីគ្រាប់បែកផ្ទុះនៅក្នុងយន្តហោះតែម្ដង។ ពោលគឺមិនមែនធ្លាក់ដោយសារគ្រាប់មីស៊ីលដូចការសន្និដ្ឋានរបស់ក្រុមបស្ចិមប្រទេសនោះទេ។ យន្តហោះរបស់ក្រុមហ៊ុនឯកជនដឹកលោកព្រីហ្គោហ្ស៊ីនចំថ្ងៃខួប២ខែនៃអំពើបះបោររបស់ទាហានស៊ីឈ្នួលប្រឆាំងនឹងរដ្ឋអំណាចទីក្រុងម៉ូស្គូ។…

ទីក្រុងម៉ូស្គូ៖ លោកពូទីនទើបតែទម្លាយឱ្យដឹងនូវអាថ៌កំបាំងដ៏គួរឱ្យភ្ញាក់ផ្អើល១កាលពីពេលថ្មីៗនេះពាក់ព័ន្ធនឹងសំណុំរឿងធ្លាក់យន្តហោះដឹកមេទាហានស៊ីឈ្នួលរបស់ក្រុមវ៉ាកណឺគ្រុប (Wagner Group) កាលពីថ្ងៃទី២៣ ខែសីហា ដែលនាំទៅដល់ការស្លាប់មនុស្សទាំងអស់។ លោកពូទីននិយាយយោងតាមការស៊ើបអង្កេតថាការធ្លាក់នេះបណ្ដាលមកពីគ្រាប់បែកផ្ទុះនៅក្នុងយន្តហោះតែម្ដង។ ពោលគឺមិនមែនធ្លាក់ដោយសារគ្រាប់មីស៊ីលដូចការសន្និដ្ឋានរបស់ក្រុមបស្ចិមប្រទេសនោះទេ។

យន្តហោះរបស់ក្រុមហ៊ុនឯកជនដឹកលោកព្រីហ្គោហ្ស៊ីនចំថ្ងៃខួប២ខែនៃអំពើបះបោររបស់ទាហានស៊ីឈ្នួលប្រឆាំងនឹងរដ្ឋអំណាចទីក្រុងម៉ូស្គូ។ កាលនោះ យន្តហោះធ្វើដំណើរឆ្ពោះទៅទីក្រុងសេនភីតថឺស្បឺក (St. Petersburg) ដោយមានលោកព្រីហ្គោហ្ស៊ីន រួមជាមួយសេនាដៃស្ដាំ២នាក់, អង្គរក្ស៤នាក់ និងបុគ្គលិករបស់ក្រុមហ៊ុនអាកាសចរណ៍៣នាក់។ លោកពូទីនថ្លែងថាយន្តហោះផ្ទុះចេញពីខាងក្នុងតែម្ដង។ ប្រធានក្រុមស៊ើបអង្កេតទើបតែរាយការណ៍ជូនលោកកាលពីប៉ុន្មានថ្ងៃមុននេះ។

លោកថាគេរកឃើញអម្បែងគ្រាប់បែកនៅលើខ្លួនសាកសពរបស់ជនរងគ្រោះ។ ពេលនោះ យន្តហោះមិនបានទទួលរងការវាយប្រហារពីខាងក្រៅទេ។ ការអះអាងនេះផ្ទុយពីការលើកឡើងរបស់មន្ត្រីរដ្ឋាភិបាលអាមេរិកដែលថាយន្តហោះត្រូវបានបាញ់ទម្លាក់ដោយគ្រាប់មីស៊ីល។ លោកពូទីនមិនបាននិយាយពិស្ដារអំពីការផ្ទុះគ្រាប់បែកនោះកើតឡើងយ៉ាងដូចម្ដេចទេ។

ប៉ុន្តែលោកគិតថាក្រុមអ្នកស៊ើបអង្កេតនៅមានចំណុចខ្វះចន្លោះ១។ លោកថាអ្នកស៊ើបអង្កេតមិនបានឆែកមើលទៅលើដងខ្លួនរបស់សាកសពជនរងគ្រោះដើម្បីកំណត់ថាតើពួកគេ (ជនរងគ្រោះ) បានទទួលទានគ្រឿងស្រវឹង ឬប្រើប្រាស់គ្រឿងញៀនដែរឬទេ។ តាមយោបល់របស់លោក លោកយល់ថាក្រុមអ្នកស៊ើបអង្កេតគួរណាស់ពិនិត្យមើលសារធាតុទាំងនេះ។

លោករំលេចឱ្យឃើញត្រង់ចំណុចនេះព្រោះភ្នាក់ងារចារកម្មរបស់រុស្ស៊ីបានចុះឆែកឆេរទីស្នាក់ការរបស់ក្រុមហ៊ុនទាហានស៊ីឈ្នួលវ៉ាកណឺគ្រុប និងរកឃើញក្រដាសប្រាក់រូប (roubles) របស់រុស្ស៊ីចំនួនដប់ពាន់លានរូប ឬស្មើនឹង១រយលានដុល្លារអាមេរិក។ ក្រៅពីនេះ គេរកឃើញគ្រឿងញៀនប្រភេទកូកាអ៊ីនទម្ងន់៥គីឡូក្រាម នៅក្នុងចំណោមរបស់របរដទៃទៀត។

រហូតមកដល់ពេលនេះ ក្រុមស៊ើបអង្កេតមិនទាន់ផ្សព្វផ្សាយលទ្ធផលស្រាវជ្រាវរបស់ខ្លួននៅឡើយទេ។ ជាពិសេស ពាក់ព័ន្ធនឹងមូលហេតុនៃការធ្លាក់យន្តហោះ។ អ្នកសារព័ត៌មានព្យាយាមទាក់ទងក្រុមគ្រួសាររបស់លោកព្រីហ្គោហ្ស៊ីន និងក្រុមហ៊ុនវ៉ាកណឺគ្រុបដើម្បីចង់ដឹងថាពួកគេយល់យ៉ាងណាចំពោះការលើកឡើងរបស់លោកពូទីន។ ប៉ុន្តែមិនអាចទាក់ទងបានទេ។

ចំពោះសំណួរថាតើអនាគតនៃក្រុមទាហានស៊ីឈ្នួលវ៉ាកណឺគ្រុបនឹងទៅជាយ៉ាងណា លោកពូទីនថ្លែងថាដោយសារប្រទេសរុស្ស៊ីគ្មានច្បាប់អនុញ្ញាតឱ្យមានទាហានឯកជនបែបនេះទេ។ ដូច្នេះ ការបើកដំណើរការទាហានទាំងនេះហាក់ដូចជាមិនសូវសមទំនង។ ប៉ុន្តែលោកថាឥឡូវនេះ យុទ្ធជនរបស់វ៉ាកណឺរាប់ពាន់នាក់បានចុះកិច្ចសន្យាចូលបម្រើនៅក្នុងជួរកងទ័ពរុស្ស៊ី។

បើពួកគេចង់ប្រឡូកនៅក្នុងសមរភូមិ ពួកគេអាចធ្វើបែបនេះបាន។ កាលពីសប្ដាហ៍មុន, អ៊ុយក្រែនអះអាងថាទាហានរបស់ក្រុមវ៉ាកណឺដែលឥឡូវនេះបានក្លាយជាទាហានរដ្ឋាភិបាលរុស្ស៊ី ចាប់ផ្ដើមវិលត្រឡប់ទៅកាន់អាវុធចូលសមរភូមិសាជាថ្មី។ ប៉ុន្តែពួកគេបើកប្រតិបត្តិក្រោមឱវាទរបស់ក្រសួងការពារជាតិ។ ពោលគឺមិនមែនជាក្រុមទាហានស្វយ័តនៅក្នុងកងឯកភាពដាច់ដោយឡែកដូចពីមុនទេ។ រដ្ឋាភិបាលទីក្រុងម៉ូស្គូចាប់ផ្ដើមរៀបយុទ្ធសាស្ត្រគ្រប់គ្រងក្រុមទាហានស៊ីឈ្នួលទាំងនេះឱ្យបានពេញដៃក្រោយព្រឹត្តិការណ៍បះបោរកាលពីខែសីហា។ ទង្វើរបស់ពួកគេនៅក្នុងគ្រានោះជាការចេញមុខប្រឆាំងនឹងរដ្ឋអំណាចរបស់លោកពូទីនខ្លាំងជាងពេលណាៗទាំងអស់នៅក្នុងសករាជរបស់លោកពូទីនរយៈពេល២៣ឆ្នាំចុងក្រោយនេះ៕

ប្រភព៖ Rueters, The Guardian
https://www.reuters.com/world/europe/putin-hand-grenade-fragments-found-bodies-prigozhin-plane-crash-2023-10-05/
https://www.theguardian.com/world/2023/oct/05/hand-grenade-explosion-caused-plane-crash-that-killed-wagner-boss-says-putin