រាជធានីភ្នំពេញ ៖ ការផ្ទុះកូវីដ ១៩ បានធ្វើកម្ពុជាក្លាយជាសង្គមឌីជីថលលឿនជាងផែនការ ។ ទំនាក់ទំនង​សង្គម ការធ្វើជំនួញ ពិសេសប្រព័ន្ធសិក្សាធិការ ដែលបានដាក់ឲ្យរៀនតាម​អនឡាញ យ៉ាងទូលំទូលាយ​ប៉ុន្តែការប្រើប្រាស់អ៊ិនធឺណែតរបស់កុមារនិងយុវជន មិនថានៅក្នុង​ពេលសិក្សា ឬកម្សាន្តនោះទេ អាចប្រឈម និងការបៀតបៀន ។

លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍លើកឡើងថា ក្នុងចំណោមអ្នកប្រើប្រាស់សេវាអ៊ីនធឺណែត នៅកម្ពុជា មាន ២៦% ធ្លាប់ទទួលបាន​ការបៀតបៀនតាមប្រព័ន្ធអនឡាញ ដោយក្នុងនោះ កុមារ គឺជាជនរង​គ្រោះខ្លាំង​ជាងគេ ។ លោក ជា វ៉ាន់ដេត បានបញ្ជាក់នៅក្នុងវីដេអូខ្លីមួយរបស់ក្រសួងលោកនោះ បាន​អំនាវនាវដល់មាតាបិតាសិស្សចូលរួមទប់ស្កាត់ការបៀតបៀនកុមារនៅលើអ៊ិនធឺណែត ។ នៅក្នុងវីដេអូ ដែលមានរយៈពេលប្រមាណជាង ២នាទី លោករដ្ឋមន្រ្តីបាន​លើកឡើង​ថា ការរំលោភបំពានតាមបណ្តាញអ៊ីនធឺណែតចំពោះកុមារ​មានសន្ទុះ​កើនឡើងកាន់​តែខ្លាំង នៅទូទាំងសាកលលោក ខណៈការឆ្លងរាលដាលនៃជំងឺកូវីដ-១៩ នៅកម្ពុជា ក៏ដូចនៅក្នុងពិភពលោកបានតម្រូវឱ្យកុមាររៀនតាមអនឡាញ ដោយប្រើប្រាស់នូវ​ប្រព័ន្ធ​អ៊ីនធឺណែតជាប្រចាំ ។ 

លោក ជា វ៉ាន់ដេត ថាដើម្បីធានាបានថា ការតភ្ជាប់ និងការប្រើប្រាស់បច្ចេកវិទ្យា​នាំ​មកនូវផល​វិជ្ជមានប្រកបទៅដោយសុវត្ថិភាពចំពោះកុមារកម្ពុជានោះ ក្រសួងប្រៃស​ណីយ និងទូរគ​មនាគមន៍ បានរៀបចំយុទ្ធនាការណ៍មួយដែលមានឈ្មោះថា «គិតគូរកូន» ជាភាសាបរទេស «KIT KOU KON» ដើម្បីជួយផ្តល់ព័ត៌មានដល់ឪពុកម្តាយ អាណា​ព្យាបាល គ្រូបង្រៀន និងសាធារណជន ក្នុងការការពារកុមារឱ្យចៀសផុតពីហា​និភ័យ​នានា លើប្រព័ន្ធអនឡាញ ។ 

 លោកស្រី ចក់ សុភាព នាយកមជ្ឈមណ្ឌលសិទ្ធិមនុស្សកម្ពុជា បានលើកឡើងថាការ​កំណត់​និយមការ​បៀតបៀនមានភាពខុសគ្នារវាងស្ថាប័ននីមួយៗ ។ ប៉ុន្តែជាទូទៅ​ការ​បៀន បៀតផ្លូវភេទលើកុមារ និងយុវជន នៅពេលប្រើប្រាស់អ៊ិនធឺណែត មាន​ដល់បៀត​បៀនដល់ប្រដាប់ភេទ ដូចជាការលួងលោមឲ្យបង្ហាញ ការលេង ឬជាការគំរាម​កំហែង សម្លុត ប្រមាថជាដើម ។ លោកស្រីបានបញ្ជាក់ថា ដើម្បីទប់ស្កាត់បញ្ហានេះមាតាបិតា​សិស្សគួរ​ចំណាយពេលនៅជាមួយកូនៗឲ្យបានច្រើន ហើយគួរកំណត់កម្មវិធីប្រើ​ប្រាស់​បច្ចេក​វិទ្យារបស់កូនថា កម្មវិធីណាកូនចូលប្រើប្រាស់ និងកម្មវិធីណាមិនអាចចូល​ទៅ​បាន​ ។ លើកពីនេះលោកស្រីបានបញ្ជាក់ថា ឪពុកម្តាយមិនគួរ​បណ្តោយឲ្យ​កូន​ប្រើប្រាស់ទូរស័ព្ទដៃ ឬកុំព្យូរទ័រ ដែលភ្ជាប់អ៊ិនធឺណែត ពេញមួយថ្ងៃ​នោះឡើយ ។

ចំណែកលោករដ្ឋមន្ត្រីក្រសួងប្រៃសណីយ៍រូបនេះ  បានអំពាវនាវដល់ឪពុកម្តាយ អាណាព្យា​បាល គ្រូបង្រៀន សូមតាមដានទំព័រហ្វេសប៊ុកឈ្មោះ «គិតគូរកូន» និង​ទំព័រហ្វេស​ប៊ុកក្រសួង​ប្រៃស​ណីយ៍ និងទូរគមនាគមន៍  ដើម្បីទទួលបានចំណេះដឹង​ជាមូល​ដ្ឋានបន្ថែមទៀត ក្នុងការការពារកូនលោកអ្នក ពីការរំលោភបំពាននានាតាម​ប្រព័ន្ធអនឡាញ ៕