ខេត្តប៉ៃលិន ៖ ជនសង្ស័យម្នាក់ ត្រូវបានលោក ប៊ិន សក្តា ចៅក្រមស៊ើបសួរនៃសាលាដំបូងខេត្តប៉ៃលិន ដាក់ឱ្យស្ថិតនៅក្រោមការពិនិត្យពីបទញ៉ុះញ៉ង់ឱ្យប្រព្រឹត្តិឧក្រិដ្ឋជាអាទិ៍ កាលពីថ្ងៃទី១១ រហូតដល់ថ្ងៃទី១៨…
ខេត្តប៉ៃលិន ៖ ជនសង្ស័យម្នាក់ ត្រូវបានលោក ប៊ិន សក្តា ចៅក្រមស៊ើបសួរនៃសាលាដំបូងខេត្តប៉ៃលិន ដាក់ឱ្យស្ថិតនៅក្រោមការពិនិត្យពីបទញ៉ុះញ៉ង់ឱ្យប្រព្រឹត្តិឧក្រិដ្ឋជាអាទិ៍ កាលពីថ្ងៃទី១១ រហូតដល់ថ្ងៃទី១៨ ខែមករា ឆ្នាំ២០២១ ដែលប្រព្រឹត្តិនៅភូមិអូរច្រាកណ្តាល សង្កាត់ទួលល្វា ក្រុងប៉ៃលិន ខេត្តប៉ៃលិន ជាបទល្មើសព្រហ្មទណ្ឌ ដែលមានចែង និងឱ្យផ្តន្ទាទោសតាមបញ្ញាត្តិមាត្រា លេខ ៤៩៤ និង ៤៩៥ នៃក្រមព្រហ្មទណ្ឌ នៃព្រះរាជាណាចក្រកម្ពុជា ។
ហេតុការណ៍នាំខ្លួនជនសង្ស័យម្នាក់ខាងលើនេះ បានធ្វើឡើងកាលពីវេលាម៉ោង១រសៀលថ្ងៃទី២៥ ខែមករា ឆ្នាំ២០២១ ដោយកម្លាំងជំនាញការិយាល័យសន្តិសុខផ្ទៃក្នុង នៃផែនការងារសន្តិសុខ ស្នងការដ្ឋាននគរបាលខេត្តប៉ៃលិន ។
តាមប្រភពព័ត៌មានបានឱ្យដឹងថា ៖ ជនសង្ស័យមានឈ្មោះ គង់ រិទ្ធ ហៅចូច ភេទប្រុស អាយុ៤១ឆ្នាំ ជាកម្មករ មានស្រុកកំណើតនៅភូមិស្វាយតាហែន ឃុំរកាគយ ស្រុកកងមាស ខេត្តកំពង់ចាម បច្ចុប្បន្នស្នាក់នៅបណ្តោះអាសន្ន ក្នុងខេត្តឈុនបុរី ប្រទេសថៃ មានប្រពន្ធឈ្មោះ ម៉ី ជូ មានកូនចំនួន២នាក់ ។
បើតាមប្រភពដីការបស់លោក ប៊ិន សក្តា ចៅក្រមស៊ើបសួរ នៃសាលាដំបូងខេត្តប៉ៃលិន បានឱ្យដឹងថា ៖ តាមដីកាលេខ៣៩ ត.ព្រ/២១ ចុះថ្ងៃទី២៥ ខែមករា ឆ្នាំ២០២១ ខាងលោកបានសម្រេចបញ្ជា ឱ្យភ្នាក់ងារមានសមត្ថកិច្ច នៃកម្លាំងសាធារណ: ធ្វើការនាំខ្លួនជនត្រូវចោទ ឈ្មោះ គង់ រិទ្ធ (មានសាវតាជាតិដូចខាងលើ) ទៅពន្ធនាគារខេត្តប៉ៃលិន ដោយអនុវត្ត ឱ្យបានត្រឹមត្រូវតាមនីតិវិធីនៃច្បាប់ ។
តាមប្រភពបន្តទៀតថា បង្គាប់ឱ្យលោកប្រធានពន្ធនាគារខេត្តប៉ៃលិន ទទួល និងឃុំខ្លួន ជននេះ រយ:ពេលអតិបរិមា មិនលើសពី៤ខែ ដោយគិតចាប់ពីថ្ងៃទី២៥ ខែមករា ឆ្នាំ២០២១ តទៅ បង្គាប់ឱ្យគ្រប់ភ្នាក់ងារ នៃកម្លាំងសាធារណ:ទាំងអស់ នៅពេលត្រូវបានបង្ហាញដីកានេះ សហការអនុវត្តឱ្យបានល្អនៅក្នុងករណីចាំបាច់ ។
តាមប្រភពបញ្ជាក់ថា លោកចៅក្រមសាលាដំបូងខេត្តប៉ៃលិន ក៏បានជូនជារបារយការណ៍ ដល់លោកជំទាវ បាន ស្រីមុំ អភិបាល នៃគណ:អភិបាលខេត្តប៉ៃលិនជ្រាបជាដំណឹងផងដែរ ៕
ចែករំលែកព័តមាននេះ