ប្រទេសថៃ ៖ តាម AFP ថា នាពេលកន្លងមកនេះ ពួកភេទទី៣ថៃក៏បានលើកគ្នាចូលរួមធ្វើបាតុកម្មដែរនៅតាមដងវិថីនៃក្រុងបាងកក ទាមទារសិទ្ធិស្មើភាពកាន់តែច្រើន និងលទ្ធិ ប្រជាធិបតេយ្យ ។
កាលពីថ្ងៃទី១៩ កញ្ញា ពួកគេបាននាំគ្នាគ្រវីទង់ឥន្ទធនូក្នុងបាតុកម្មប្រឆាំងរដ្ឋាភិបាលក្នុងក្រុងបាកក ។ នាថ្ងៃទី២៥ តុលា ពួកគេក៏ចូលរួមធ្វើបាតុកម្មដោយគ្រវីទង់ឥន្ទធនូ ។ រួចក្នុងបាតុកម្មថ្ងៃទី៧វិចិ្ឆកា ពួកភេទទី៣ក៏មានវត្តមាន ។ ក្នុងបាតុកម្មថ្ងៃទី១៩ វិច្ឆិកា មានពួកបាតុករលើកទង់ដូចគ្នានោះនៅក្រុងបាងកក ។
ក្នុងបាតុកម្មពួកភេទទី៣តែងនិយមស្លៀករ៉ូបពណ៌ខ្មៅ ផាត់មុខផាត់មាត់ ពាក់គ្រឿងអលង្ការពណ៌ទឹកប្រាក់ និងកាន់មេក្រូអំពាវនាវឲ្យមានសមភាពខាងភេទ និមិត្តរូបរបស់សហគមន៍ភេទទី៣ដែលកាន់តែបង្ហាញខ្លួនច្រើនក្នុងបាតុកម្មស្និទ្ធប្រជាធិបតេយ្យនៅថៃ ។
ក្នុងបាតុកម្មពួកភេទទី៣និយាយថា យើងមិនអាចទទួលបានលទ្ធិប្រជាធិបតេយ្យពិតប្រាកដឡើយ បើសិទ្ធិរបស់ជនភេទទី៣មិនមានថែមទៀតនោះ ។ បាតុករភេទទី៣ម្នាក់អាយុ២១ឆ្នាំអះ
អាងប្រាប់ AFP ថា ខ្ញុំក៏ចូលរួមតស៊ូដែរដើម្បីអនាគតរបស់ខ្ញុំ ។ បាតុករភេទទី៣ម្នាក់ទៀតអះអាងថា សហគមន៍របស់យើងមិនមានសិទ្ធិដូចគ្នាទេ ការទាមទារសំខាន់របស់យើង គឺការរៀបការស្របច្បាប់របស់ភេទទី៣ ដូចនៅតៃវ៉ាន់ដែលអនុញ្ញាតឲ្យមានការរៀបការបែបនោះចាប់តាំងពីឆ្នាំទៅមិញ ។
ប្រៀបធៀបជាមួយប្រទេសជាច្រើន ប្រទេសថៃហាក់មានការអនុគ្រោះច្រើនចំពោះភេទទី៣ និងពួកអ្នកវះកាត់ប្ដូរភេទ ដែលមានកាន់តែច្រើនក្នុងប្រទេស ។ ពួកភេទទី៣ឃើញមានមុខច្រើនក្នុងការផ្សាយពាណិជ្ចកម្ម និងខ្សែភាពយន្ត និងឃើញមានក្នុងទំព័រមុខនៃបណ្ដាទស្សនាវដ្ដីម៉ូដ និងមានរហូតដល់ការប្រកួតជ្រើសរើសបវរកញ្ញាខ្ទើយ ដែលការប្រកួតទាំងនោះតាមដានទស្សនាដោយមនុស្សច្រើនលាននាក់ ។
សហគមន៍ភេទទី៣ថៃបានចេញមុខគាំទ្រ ការទាមទារ របស់បាតុកម្មស្និទ្ធប្រជាធិបតេយ្យ ដូចជាការលាលែងរបស់នាយករដ្ឋមន្ត្រី លោកប្រាយុទ្ធ ចាន់អូចា ការកែប្រែរដ្ឋធម្មនុញ្ញ និងការកាត់បន្ថយអំណាចព្រះមហាក្សត្រជាដើម ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ