សហរដ្ឋអាមេរិក-កូរ៉េខាងជើង ៖ យោងតាម YONHAPថា ប្រធានាធិបតីអាមេរិកលោកដូណាល់ ត្រាំ កាលពីថ្ងៃទី១៧ មិថុនា បានប្រកាសពន្យារពេលដាក់ទណ្ឌកម្មប្រឆាំងកូរ៉េខាងជើង១ឆ្នាំទៀត ដោយលើកពីការគំរាមកំហែងខុសពីទម្លាប់ និងវិសាមញ្ញមួយពីសំណាក់ក្រុងព្យុងយ៉ាង ។
ក្នុងកំណត់ហេតុមួយជូនដល់សភា លោកត្រាំសរសេរថា លោកបន្តភាពអាសន្នជាតិចំពោះកូរ៉េ
ខាងជើង ដែលប្រកាសជាលើកដំបូងកាលពីថ្ងៃទី២៦ មិថុនា ឆ្នាំ២០០៨ ក្នុងបទបញ្ជាប្រតិបត្តិលេខ១៣៤៦៦ ។ បទបញ្ជាប្រតិបត្តិនោះដែលបន្តក្រោមរដ្ឋាភិបាលលោកត្រាំនិងរដ្ឋការមុនៗ ទាមទារឲ្យដាក់ទណ្ឌកម្មប្រឆាំងកូរ៉េខាងជើង ដោយសារកម្មវិធីនុយក្លេអ៊ែរនិងមីសីុលរបស់ប្រទេសនោះ ។
លោកត្រាំសរសេរទៀតថា បណ្ដាសកម្មភាព និងនយោបាយរបស់រដ្ឋាភិបាលកូរ៉េខាងជើង បន្ត
ចោទជាការគំរាមកំហែងមិនធម្មតានិងវិសាមញ្ញមួយដល់សន្តិសុខជាតិហើយនាំឲ្យមានគ្រោះថ្នាក់ដល់កងទ័ពអាមេរិក បណ្ដាសម្ព័ន្ធមិត្តនិងដៃគូពាណិជ្ជកម្មទាំងឡាយក្នុងតំបន់ ពិសេសបំផុតលោកលើកពីការបន្តកម្មវិធីនុយក្លេអ៊ែរនិងមីស៊ីលព្រមទាំងសកម្មភាពឯទៀតៗ និងនយោបាយបង្កហេតុ បង្កអស្ថេរភាព និងគាបសង្កត់របស់រដ្ឋាភិបាលកូរ៉េខាងជើង ។
ក្រុងព្យុងយ៉ាងបានលើកហេតុផលពីបណ្ដាសកម្មភាពរបស់ខ្លួន ក្នុងនោះមានការដាក់គ្រឿងផ្ទុះកម្ទេចចោលការិយាល័យទំនាក់ទំនងអន្តរកូរ៉េដោយចោទប្រកាន់ក្រុងសេអ៊ូលថាពុំអាចរារាំងពួករត់ចោលជួរកូរ៉េខាងជើងបញ្ជូនសារឃោសនាប្រឆាំងក្រុងព្យុងយ៉ាងមកកាន់កូរ៉េខាងជើង ៕ ដកស្រង់ចេញពីវេបសាយ ៖ yna (កែសម្រួលដោយ ៖ បុប្ផា)
ចែករំលែកព័តមាននេះ