រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យលួចស្លាកលេខរថយន្តម្នាក់ ក្នុងចំណោម២នាក់ត្រូវកម្លាំងនគរបាលខណ្ឌដូនពេញ ឃាត់ខ្លួន ក្រោយពេលជនសង្ស័យកំពុងតែដើរដោយដៃកាន់កាបូបខ្មៅ ដោយសង្ស័យកម្លាំងសមត្ថកិច្ចក៏ឃាត់ខ្លួន ដើម្បីឆែកឆេរ ស្រាប់តែរកឃើញស្លាកលេខរថយន្តជាច្រើន…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យលួចស្លាកលេខរថយន្តម្នាក់ ក្នុងចំណោម២នាក់ត្រូវកម្លាំងនគរបាលខណ្ឌដូនពេញ ឃាត់ខ្លួន ក្រោយពេលជនសង្ស័យកំពុងតែដើរដោយដៃកាន់កាបូបខ្មៅ ដោយសង្ស័យកម្លាំងសមត្ថកិច្ចក៏ឃាត់ខ្លួន ដើម្បីឆែកឆេរ ស្រាប់តែរកឃើញស្លាកលេខរថយន្តជាច្រើន បង្កឱ្យការភ្ញាក់ផ្អើលកាលពីម៉ោង១២និង៣០នាទីរំលងអធ្រាត្រឈានចូលថ្ងៃទី២៤ ខែមីនា នៅចំណុចកែងផ្លូវលេខ១៧និង១៩ ស្ថិតក្នុងភូមិ៣ សង្កាត់ផ្សារចាស់ ខណ្ឌដូនពេញ ។
សេចក្តីរាយការណ៍បន្តថា ជនសង្ស័យដែលឃាត់ខ្លួនឈ្មោះ សៅ វណ្ណា ភេទប្រុស អាយុ៣៨ឆ្នាំ មុខរបរមិនពិតប្រាកដ មានទីលំនៅផ្ទះជួលគ្មានលេខ ភូមិ3 សង្កាត់ផ្សារចាស់ ខណ្ឌដូនពេញ ចំណែកវត្ថុតាងចាប់យក ១-ស្លាកលេខរថយន្តចំនួន6គូ ស្មើ12សន្លឹក ២-ឧបករណ៍សម្រាប់កាចសោរកុងតាក់ម៉ូតូចំនួន1 ៣-សោរសម្រាប់ដោះ (ទួលវ៉ីស) ស្លាកលេខរថយន្តចំនួន05ដើម និង៤-កាបូបខ្មៅសម្រាប់ដាក់ស្លាកលេខចំនួន1។
យោងតាមរបាយការណ៍នគរបាលខណ្ឌដូនពេញ បានឲ្យដឹងថា មុនពេលកើតហេតុ កម្លាំងជំនាញខណ្ឌប៉ុស្តិ៍រដ្ឋបាលផ្សារចាស់ នៃអធិការដ្ឋានដូនពេញ បានចេញល្បាតតាមដងផ្លូវក្នុងភូមិសាស្ត្រតាមបណ្តាប៉ុស្តិ៍ ។ លុះពេលកម្លាំងល្បាតមកដល់ចំណុចផ្លូវលេង១៧+១៩ ភូមិ3 សង្កាត់ផ្សារចាស់ ក៏ឃើញជនសង្ស័យម្នាក់ឈ្មោះ សៅ វណ្ណា ភេទប្រុស អាយុ៣៨ឆ្នាំ កំពុងតែដើរដោយដៃមានកាន់កាបូបខ្មៅ ដោយមានការសង្ស័យ កម្លាំងយើងក៏បានធ្វើការឃាត់ខ្លួន ដើម្បីឆែកឆេរត្រួតពិនិត្យ ស្រាប់តែរកឃើញមានស្លាកលេខរថយន្តចំនួន១២សន្លឹក ស្មើរនឹង០៦គូ និងឧបករណ៍សម្រាប់ធ្វើសកម្មភាពមួយចំនួនទៀត។
ប្រភពដដែលបន្តថា ក្រោយកម្លាំងសមត្ថកិច្ចក៏បានធ្វើការឃាត់ខ្លួន រួមទាំងវត្ថុតាងយកមកកាន់ប៉ុស្តិ៍រដ្ឋបាលផ្សារចាស់ ដើម្បីធ្វើការសាកសួរ។
បើតាមចម្លើយជនសង្ស័យបានសារភាពថា ខ្លួនបានធ្វើសកម្មភាពជាមួយឈ្មោះ ឧត្តម ភេទប្រុស អាយុ២២ឆ្នាំ ស្នាក់នៅនិងមុខរបរមិនពិតប្រាកដ ដោយធ្វើសកម្មភាពបានសម្រេចចំនួន4លើក ដោយលើកទី១ កាលពីថ្ងៃទី២០ មីនា ចំណុចស្តុបដេអិន ខណ្ឌ៧មករា លួចបានស្លាកលេខរថយន្ត Toyota Tacoma ភ្នំពេញ 2AU:6487 ។
កទី២ កាលពីថ្ងៃទី២១ មីនា ត្រងចំណុចមុខវត្តមង្គលវន្ត សង្កាត់មនោរម្យ ខណ្ឌ៧មករា លួចបានស្លាកលេខរថយន្តToyota PRIUS។
លើកទី៣ ថ្ងៃទី២២ មីនាចំណុចក្រោយពេទ្យកុមារជាតិ ខណ្ឌទួលគោក លួចបានស្លាកលេខរថយន្តម៉ាកហាយឡេនឌឺ និងលើកទី៤ ថ្ងៃទី២៣ មីនា ចំណុចក្រោយមន្ទីរពេទ្យលោកសង្ឃ ខណ្ឌទួលគោក លួចបានស្លាកលេខរថយន្តម៉ាក Toyota Prius និងស្លាកលេខចំនួន២គូទៀតដែលទិញពីរក្មេងប្រុសមិនស្គាល់ឈ្មោះ ក្នុងតម្លៃមួយគូ២០$ ហើយជនសង្ស័យបានយកស្លាកលេខទៅលក់បន្តឱ្យបុរសម្នាក់មិនស្គាល់ឈ្មោះ និងទីកន្លែងស្នាក់នៅ ដោយក្នុងមួយគូតម្លៃ50$។
នៅចំពោះមុខកម្លាំងជំនាញខណ្ឌ និងប៉ុស្តិ៍ កំពុងប្រើប្រាស់វិធានការសាកសួរយកចម្លើយ ដើម្បីបន្តស្រាវជ្រាវរកបក្សពួក និងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីអនុវត្តន៍តាមនីតិវិធី៕ (កែសម្រួលដោយ ៖ បុប្ផា)
ចែករំលែកព័តមាននេះ