កម្ពុជាអាចបញ្ចេញលក់កាបូនព្រៃឈើទៅទីផ្សារអន្ដរជាតិនៅឆ្នាំ២០១១
ដោយ ៖ អប្សរា
ថ្ងៃសុក្រ ទី២៣ ខែកក្កដា ឆ្នាំ២០១០ ម៉ោង ១០:៤៤
សំណាង
ឆ្នាំ២០១១កម្ពុជាអាចបញ្ចេញលក់កាបូនព្រៃឈើទៅទីផ្សារអន្ដរជាតិ
ខេត្ដសៀមរាប ៖ មន្ដ្រីរដ្ឋបាលព្រៃឈើ ជាន់ខ្ពស់នៃព្រះរាជាណាចក្រកម្ពុជាបានថ្លែងថា គំរោងការលក់កាបូនបានមកពីវិស័យព្រៃឈើទៅឱ្យបណ្ដាក្រុមហ៊ុន ដែលបំពុលបរិស្ថាននានាក្នុងប្រទេសអភិវឌ្ឍន៍អាចនឹងចាប់ផ្ដើមដំណើរការនៅចុងឆ្នាំនេះឬឆ្នាំ២០១១ខាងមុខ ។ ប្រធានរដ្ឋបាលព្រៃឈើកម្ពុជា លោកឆេង គឹមស៊ុន បានមានប្រសាសន៍ប្រាប់កាល ពីវេលាម៉ោង១១និង៤៧នាទី ថ្ងៃទី១៩ កក្កដា ឆ្នាំ២០១០ថា យើងសង្ឃឹមថា នៅចុងឆ្នាំនេះ ឬក្នុងឆ្នាំ២០១០ខាងមុខ ប្រទេសកម្ពុជាអាចនឹងលក់កាបូនបានមកពីព្រៃឈើដ៏ច្រើនសន្ធឹកសន្ធាប់ជាលើកដំបូងទៅឱ្យបណ្ដា ប្រទេសមានឧស្សាហកម្មលូតលាស់លើពិភពលោកដែលតែងតែបញ្ចេញជាតិពុល ឬហៅថាឧស្ម័នផ្ទះកញ្ចក់ទៅក្នុងបរិយាកាសយ៉ាងច្រើនលើសលប់ក្នុងមួយឆ្នាំ ។
លោកបញ្ជាក់ថា គម្របព្រៃឈើរបស់ប្រទេសកម្ពុជានាពេលចុងក្រោយនេះនៅសល់ចំនួន៥៩,០៩ភាគរយនៃផ្ទៃប្រទេស ដែលអាចទាញយកឧស្ម័នរាប់សិបលានតោនឯណោះ ប៉ុន្ដែដំណាក់កាលដំបូងយើងបានរៀបចំធ្វើកាបូនព្រៃឈើតាមបែបសហគមន៍នៅខេត្ដឧត្ដរមានជ័យចំនួន៦ម៉ឺនហិកតា ហើយនៅស្រុកកែវសីមាក៏មានផែនការដូចគ្នាដែរ ។ លោកឆេង គឹមស៊ុន បានពន្យល់ទៀតថា តាមការសិក្សាស្រាវជ្រាវលើផ្ទៃដីព្រៃឈើ ចំនួន៦ម៉ឺនហិកតានោះយើងអាចទាញយកកាបូនបានប្រមាណជាង៨លានតោនក្នុងរយៈ ពេល៣០ឆ្នាំដែលពេលនេះកំពុងតែធ្វើការ ចរចាដាក់លក់ ប៉ុន្ដែតម្លៃមិនទាន់ដឹងនៅឡើយ អាស្រ័យទៅលើការបញ្ជាទិញញតាម របៀបលើកទឹកចិត្ដក្រុមហ៊ុននានា ក្នុងប្រទេសអភិវឌ្ឍន៍ ដើម្បីឱ្យការបញ្ចេញកាបូន របស់ពួកគេមានតុល្យភាពដោយការបង់ ប្រាក់ទៅឱ្យប្រទេសកំពុងអភិវឌ្ឍន៍ធ្វើការការពារព្រៃឈើ ។
លោកថ្លែងថា សម្បត្ដិធនធានធម្មជាតិព្រៃឈើមានតម្លៃជាសាកលសំខាន់បំផុត សំរាប់ជីវៈចំរុះ ជាពិសេសទាក់ទិនទៅនឹង ជីវភាពរស់នៅរបស់មនុស្ស ហើយវាក៏អាចផ្ដល់មកវិញនូវកំណើនសេដ្ឋកិច្ចជាតិផងដែរ ដូច្នេះរាល់គំរោងអភិវឌ្ឍន៍ទាំងឡាយណា ដែលប៉ះពាល់ដីព្រៃឈើត្រូវតែមានការសិក្សាវាយតម្លៃពីផលប៉ះពាល់ឱ្យបានម៉ត់ចត់បំផុត ចៀសវាងការខាតបង់ទៅថ្ងៃអនាគត ។ រដ្ឋមន្ដ្រីក្រសួងបរិស្ថាននៃប្រទេសកម្ពុជា លោកម៉ុក ម៉ារ៉េត ធ្លាប់បានមានប្រសាសន៍ ទាក់ទិនជាមួយការបាត់បង់ព្រៃឈើយ៉ាងថា យោងតាមរបាយការណ៍របស់អង្គការ “GLOBAL BIODIVERSITY OUT LOOK3-GB03” បានបង្ហាញថា គ្រាន់តែតម្លៃនៃការបាត់បង់ប្រចាំឆ្នាំ ដោយសារការកាប់បំំផ្លាញព្រៃឈើ និងភាពថយចុះនៃ ព្រៃឈើ គឺស្មើនឹង២.០០០ទៅ៤.៥០០ពាន់ លានដុល្លារអាមេរិក ប៉ុន្ដែតម្លៃដែលទទួល បានពីការវិនិយោគដោយគ្មាននិរន្ដរភាពនេះវិញ មានត្រឹមតែ៤៥ពាន់លានដុល្លារអាមេរិកប៉ុណ្ណោះ ។ នេះបញ្ជាក់ឱ្យឃើញថា ប្រសិនបើយើងរក្សាទុកនូវព្រៃឈើឱ្យបានល្អ យើងនឹងទទួលបានតម្លៃត្រឡប់វិញ ១លើ១០០ដង ។ លោកមានប្រសាសន៍ដូច្នេះកាលពី ថ្ងៃទី២០ ខែមិថុនា ឆ្នាំ២០១០ ក្នុងពិធីអបអរសាទរ “ទិវាឆ្នាំអន្ដរជាតិនៃជីវៈចម្រុះ នៅប្រទេសកម្ពុជា” ដែលធ្វើឡើងនៅខេត្ដសៀមរាប ។
លោកម៉ុក ម៉ារ៉េត បានបន្ដទៀតថា វាគួរឱ្យសោកស្ដាយណាស់ដោយសារតែជីវៈចម្រុះ មានតម្លៃសេដ្ឋកិច្ចខ្ពស់ តំរូវការប្រើប្រាស់កាន់តែច្រើន កំណើនប្រជាជនកើនឡើងខ្ពស់ គួបផ្សំនឹងការអភិវឌ្ឍដោយគ្មានផែនការត្រឹមត្រូវ និងមិនច្បាស់លាស់បានធ្វើឱ្យ ប្រព័ន្ធអេកូឡូស៊ីជាតិប្រែប្រួល រេចរិលយ៉ាងខ្លាំង និងឈានទៅរកការវិនាសផុតពូជ នៃប្រភេទនានានៅទូទាំងពិភពលោក ដែលគួរឱ្យចាប់អារម្មណ៍ និងព្រួយបារម្ភ ។ តាមការប៉ាន់ប្រមាណ មានប្រហែលជា១០ភាគរយ នៃប្រភេទជីវៈចម្រុះដែលធ្វើការវាយតម្លៃ រួចហើយ បាននិងកំពុងប្រឈមមុខទៅនឹង ហានិភ័យខ្ពស់នៃវិនាសផុតពូជ ។
លោកម៉ុក ម៉ារ៉េត បានបន្ថែមទៀតថា នេះគឺជាការបរាជ័យដ៏ធំធេងមួយដែល បណ្ដាលមកពីភាពក្រីក្រ និងខ្វះការយល់ដឹង អំពីសារសំខាន់និងតម្លៃធនធានជីវៈចម្រុះ និងខ្វះការចូលរួមពពីអ្នកពាក់ព័ន្ធរួមទាំងអ្នកវិនិយោគ សហគមន៍មូលដ្ឋាន និងជនជាតិភាគតិច ។ បទពិសោធន៍ទាំងនេះវាជា មេរៀនមួយសំរាប់ពិភពលោកទាំងមូលគិតពិចារណាឡើងវិញនូវទង្វើរបស់មនុស្សដែល បានទន្ទ្រានលើធនធានធម្មជាតិ និងត្រូវស្វែងរកយុទ្ធសាស្ដ្រថ្មីមានប្រសិទ្ធភាពសំរេចបាន នូវគោលបំណងទាំងបីរបស់អនុសញ្ញាសហប្រជាជាតិស្ដីពីជីវៈចម្រុះ គឺការអភិរក្សផង ការប្រើប្រាស់ប្រកបដោយចីរភាព និងបែងចែកផលប្រយោជន៍នៃការប្រើប្រាស់ធនធាន សេនេទិចឱ្យបានស្មើគ្នាផង ។ ក្រុមសង្គមស៊ីវិលដែលធ្វើការពាក់ព័ន្ធ ទៅលើកិច្ចការពារធនធានធម្មជាតិព្រៃឈើ របស់ប្រទេសកម្ពុជាបានសំដែងនូវការ ស្វាគមន៍ចំពោះគំរោងការផ្ដួចផ្ដើមលក់ចេញ នូវកាបូនព្រៃឈើរបស់ប្រទេសកម្ពុជា ជាលើកដំបូងនេះ ដែលសកម្មភាពនេះវានឹង ក្លាយជាសារយ៉ាងសំខាន់មួយក្នុងការផ្សព្វផ្សាយអំពីសារសំខាន់និងផលប្រយោជន៍ ជាសាកលរបស់ព្រៃឈើ ក្នុងការធានាដល់ ការអភិវឌ្ឍសេដ្ឋកិច្ចជាតិ ដើម្បីបញ្ឈប់ការកាប់បំផ្លាញព្រៃឈើនៅទូទាំងប្រទេស ៕
