ខេត្តបាត់ដំបង ៖ បុរសជនជាតិកាណាដាម្នាក់ ត្រូវបានកម្លាំងនគរបាលការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋានខេត្ត ឃាត់ខ្លួនកាលពីវេលាម៉ោង១២និង១០នាទីរំលងអធ្រាត្រឈានចូលថ្ងៃទី៥ មករា ក្រោយពីសង្ស័យថា ជនបរទេសរូបនេះនាំក្មេងប្រុសអាយុ១៤ឆ្នាំម្នាក់យកទៅរួមភេទនៅបន្ទប់សណ្ឋាគារមួយនៅខាងជើងផ្សារបឹងឈូក ក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ។
មន្ត្រីនគរបាលការិយាល័យប្រឆាំងការជួញដូរមនុស្ស និងការពារអនីតិជនបានប្រាប់ថា ជនបរទេសនោះឈ្មោះ VADIN SCOD អាយុ៤៣ឆ្នាំ ជាជនជាតិកាណាដា ចូលមកប្រទេសកម្ពុជាក្នុងនាមជាភ្ញៀវទេសចរ ។ ជនបរទេសរូបនេះបាននាំក្មេងប្រុសម្នាក់អាយុ១៤ឆ្នាំ រស់នៅក្នុងសង្កាត់ខាងលើទៅរួមភេទនៅក្នុងបន្ទប់សណ្ឋាគារ «ហាំងឡាយ» ដែលស្ថិតក្នុងសង្កាត់នោះដែរ ជាថ្នូរនឹងប្រាក់ចំនួន៨.២០០រៀលសម្រាប់ផ្តល់ឱ្យក្មេងប្រុសនោះ ។ សមត្ថកិច្ចបន្តថា កម្លាំងជំនាញបានឆ្មក់ចូលទៅបង្ក្រាបក្នុងគ្រាដែលបុរសបរទេសនោះកំពុងស្នាក់នៅក្នុងបន្ទប់ និងចំពេលក្មេងប្រុសនោះចុះពីសណ្ឋាគារក្រោយពីធ្វើសកម្មភាពរួច ។ កោះសន្តិភាព មិនទាន់អាចស្វែងរកការបំភ្លឺពីបុរសជនជាតិកាណាដានោះបានភ្លាមៗទេនៅព្រឹកថ្ងៃទី៥ មករា ដោយសារសមត្ថកិច្ចជំនាញកំពុងសាកសួរនៅឡើយ បុ៉ន្តែបើតាមក្មេងប្រុសបានបំភ្លឺប្រាប់សមត្ថកិច្ចថា ខ្លួនមិនធ្លាប់ស្គាល់ជនបរទេសម្នាក់នេះទេ ។ ជននេះបានជួបនិងសួរនាំខ្លួននៅម៉ោងប្រហែល៨យប់ថ្ងៃទី៤ មករា គ្រាដែលខ្លួនដើរទៅរកទិញបង្អែមហូបនៅម្តុំរង្វង់មូលព្រះនារាយណ៍ ។ ពេលនោះបុរសនោះបានបង្ហាញរូបថតសណ្ឋាគារហាំងឡាយដោយប្រាប់តាមរយៈកាយវិការឱ្យខ្លួនជូនទៅសណ្ឋាគារនោះ ហើយខ្លួនក៏ជូនទៅ ដែលពេលទៅដល់ ជននេះក៏ឡើងទៅលើ រីឯខ្លួនក៏ត្រឡប់មកវិញ ។
ពេលដើរចេញបានបន្តិច ជនបរទេសរូបនេះបានរត់មកហៅខ្លួនហើយធ្វើកាយវិការដូចកាន់ក្បាលមីក្រូច្រៀងខារ៉ាអូខេ រួចចង្អុលទៅលើសណ្ឋាគារ ដោយឃើញកាយវិការបែបនេះខ្លួនស្មានថា បុរសបរទេសនេះបបួលខ្លួនទៅច្រៀង ទើបព្រមទៅតាម ព្រោះនៅជាប់សណ្ឋាគារហាំងឡាយមានហាងខារ៉ាអូខេដែរ ។ បុ៉ន្តែពេលឡើងដល់លើ បែរជាបុរសនេះនាំខ្លួនចូលទៅក្នុងបន្ទប់ដេកដែលមានស្រាបៀរ៣កំបុ៉ងនៅទីនោះ ។ ក្មេងប្រុសរូបនេះរៀបរាប់ទៀតថា បុរសនោះបានឱ្យខ្លួនផឹកស្រាបៀរអស់១កំបុ៉ងកន្លះ រួចឱ្យដេកនៅលើគ្រែ ហើយជននេះក៏មកលេងប្រដាប់ភេទរបស់ខ្លួន និងឱ្យខ្លួនលេងប្រដាប់ភេទគាត់វិញ ដោយប្រើដៃ និងមាត់រហូតបានសម្រេច ។ ក្រោយមកបុរសនេះបានសួរខ្លួនតាមរយៈកាយវិការ និងឱ្យប៊ិកសរសេរលើបាតដៃថា យកលុយបុ៉ន្មាន ? ខ្លួនក៏សរសេរលេខ៤០ម៉ឺនរៀល តែបុរសនេះថាគាត់គ្មានលុយឱ្យទេ ហើយបានដកលុយឱ្យតែ៨.២០០រៀល ខ្លួនក៏យកលុយនោះចុះមកក្រោមវិញ ស្រាប់តែសមត្ថកិច្ចទៅដល់សួរនាំ ទើបខ្លួននាំសមត្ថកិច្ចទៅបន្ទប់របស់ជនបរទេសនោះស្នាក់នៅតែម្តងទៅ ។ ក្រោយពីឃាត់ខ្លួនជនបរទេសរូបនេះកាលពីវេលារំលងអធ្រាត្រ នៅព្រឹកថ្ងៃទី៥ មករា កម្លាំងជំនាញការិយាល័យបច្ចេកទេសវិទ្យាសាស្ត្រ ក៏បានចុះទៅពិនិត្យ និងធ្វើកោសល្យវិច័យរកវត្ថុតាងនៅក្នុងបន្ទប់សណ្ឋាគារខាងលើ ដែលជនបរទេសនេះជួលស្នាក់នៅ បុ៉ន្តែមិនទាន់មានការសន្និដ្ឋានបែបណានៅឡើយទេ ។
នាយការិយាល័យប្រឆាំងការជួញដូរមនុស្ស និងការពារអនីតិជន លោកកុយ ហៀង បានប្រាប់កោះសន្តិភាពនៅព្រឹកថ្ងៃទី៥ មករាថា ក្រោយពីទទួលព័ត៌មាននេះពីមន្ត្រីជំនាញរបស់អង្គការ CPU ដែលជាដៃគូសហការកន្លងមក លោកស្នងការនគរបាលខេត្តបានបញ្ជាភ្លាមៗឱ្យរូបលោកដឹកនាំកម្លាំងចុះទៅអន្តរាគមន៍ និងឃាត់ខ្លួនជនបរទេសរូបនេះដល់បន្ទប់សណ្ឋាគារ រួចនាំក្មេងប្រុសរងគ្រោះ និងជនប្រព្រឹត្តមកកាន់ស្នងការដ្ឋានខេត្តដើម្បីសាកសួរទាំងយប់ ។ តាមការសាកសួរជំហានដំបូង ជនជាតិកាណាដារូបនេះបានឆ្លើយទទួលស្គាល់នូវអ្វីដែលខ្លួនបានប្រព្រឹត្តទៅលើក្មេងប្រុសនោះ ហើយលោកបានរកឃើញលុយចំនួន៨.២០០រៀលនៅក្នុងដៃក្មេងប្រុសនោះផងជាវត្ថុតាងដែលជនបរទេសនេះផ្តល់ឱ្យជាថ្នូរនឹងការរួមភេទ ។
ជុំវិញករណីនេះលោកកុយ ហៀង បញ្ជាក់ថា ជនជាតិកាណាដាឈ្មោះ VIDIN SCOD នេះអាចនឹងត្រូវជាប់សង្ស័យពីបទ «ទិញពេស្យាចារកុមារ» ដែលជនរងគ្រោះស្ថិតក្នុងវ័យអនីតិជន ។ លោកស្នងការខេត្ត បានបញ្ជាឱ្យកម្លាំងជំនាញរបស់លោកកសាងសំណុំរឿងបញ្ជូនជនបរទេសរូបនេះទៅតុលាការនៅថ្ងៃចន្ទទី៦ មករា ៕
ចែករំលែកព័តមាននេះ