ខេត្តបន្ទាយមានជ័យ ៖ បុរសចំណាស់វ័យ៦០ឆ្នាំម្នាក់ត្រូវកម្លាំងនគរបាលស្រុកម៉ាឡៃឃាត់ខ្លួនកាលពីវេលាម៉ោង១១ព្រឹក ថ្ងៃទី៥ មករា ២០១៤ បន្ទាប់ពីទទួលបានពាក្យបណ្តឹងពីស្ត្រីជាម្តាយក្មេងស្រីរងគ្រោះថា បុរសចំណាស់រូបនេះបានលួងលោមក្មេងស្រីរងគ្រោះអាយុ១៥ឆ្នាំរួមភេទបានសម្រេចកាលពីចុងឆ្នាំមុន។
លោកវរសេនីយ៍ត្រី សៅ ប៊ុន អធិការនគរបាលស្រុកម៉ាឡៃបានឱ្យដឹងថា ជនសង្ស័យដែលឃាត់ខ្លួនឈ្មោះនៅ ត្រាច អាយុ៦០ឆ្នាំ មានស្រុកកំណើតនៅភូមិគោកបន្លៃ ឃុំចំណោម ស្រុកមង្គលបុរី មកស្នាក់នៅស៊ីឈ្នួលច្រូតស្រូវនៅភូមិតាគង់ ឃុំតាគង់ ស្រុកម៉ាឡៃ។
លោកអធិការបានបន្តថា ជនសង្ស័យរូបនេះបានធ្វើសកម្មភាពលួងលោមក្មេងស្រីអាយុ១៥ឆ្នាំដែលជាអ្នកមកស៊ីឈ្នួលច្រូតស្រូវនៅទីនោះដូចគ្នាយកទៅរួមភេទបានសម្រេចកាលពីវេលាម៉ោង១០យប់ ថ្ងៃទី២៧ ធ្នូ ២០១៣ នៅលើផ្ទះរបស់ឈ្មោះគីម ប៊ុនធឿន និងប្រពន្ធឈ្មោះភារុំ ហៅឡាត្រង់ចំណុចទួលអំពិល ភូមិតាគង់ ឃុំតាគង់ ស្រុកម៉ាឡៃ។
នៅចំពោះមុខសមត្ថកិច្ចជនសង្ស័យបានសារភាពថា ខ្លួនពិតជាបានធ្វើសកម្មភាពលួងលោមក្មេងស្រីរួមភេទដូចការចោទប្រកាន់ពិតមែន បន្ទាប់ពីខ្លួន និងកម្មករដូចគ្នាផឹកស្រាសអស់២លីត្រ។ បច្ចុប្បន្នជនសង្ស័យត្រូវកម្លាំងជំនាញអធិការដ្ឋាននគរបាលស្រុកម៉ាឡៃរៀបចំសំណុំរឿងបញ្ជូនទៅស្នងការដ្ឋាននគរបាលខេត្តបន្ទាយមានជ័យដើម្បីចាត់ការបន្តតាមនីតិវិធីច្បាប់៕
ចែករំលែកព័តមាននេះ