នាំនាងចូលផ្ទះសំណាក់បានកន្លះម៉ោងប្រុសស្នេហ៍គាំងបេះដូងស្លាប់
ដោយ ៖ អប្សរា
ថ្ងៃអង្គារ ទី២៥ ខែមករា ឆ្នាំ២០១១ ម៉ោង ១៦:៣៥
បូព៌ា
សពបុរសចំណាស់ម្នាក់បានគាំងបេះដូងស្លាប់ នៅក្នុងផ្ទះសំណាក់ «ពន្លឺពេជ្រ» បន្ទប់លេខ១០៧០ សង្កាត់ស្វាយប៉ោ ក្រុងបាត់ដំបង
ខេត្តបាត់ដំបង ៖ បុរសចំណាស់ម្នាក់បានគាំងបេះដូងស្លាប់ បន្ទាប់ពីនាំស្រីស្នេហ៍ចូលផ្ទះសំណាក់ដើម្បីនែបនិត្យបានប្រហែលតែកន្លះម៉ោងប៉ុណ្ណោះ ហើយបានធ្វើឱ្យមានការភ្ញាក់ផ្អើលក្នុងគ្រាដែលស្រីស្នេហ៍បញ្ជូនបុរសនោះទៅកាន់មន្ទីរពេទ្យឯកជនមួយទាំងស្លៀកខោស្លីប ប៉ុន្តែគាត់បានស្លាប់ទៅហើយ ។ បើតាមការអះអាងរបស់សមត្ថកិច្ចបានឱ្យដឹងថា ហេតុការណ៍នេះបានកើតឡើងកាលពីវេលាម៉ោង៣រសៀល ថ្ងៃទី ២៤ មករា នៅក្នុងផ្ទះសំណាក់ «ពន្លឺពេជ្រ» បន្ទប់លេខ១០៧០ ស្ថិតនៅភូមិកម្មករ សង្កាត់ស្វាយប៉ោ ក្រុងបាត់ដំបង ។
ក្រុមសមត្ថកិច្ចនិយាយថា គេមិនបានដឹងអំពីហេតុការណ៍នេះពីដំបូងទេ ប៉ុន្តែសមត្ថកិច្ចបានដឹងក្រោយពីមានសេចក្តីរាយការណ៍ពេលស្ត្រីម្នាក់បញ្ជូនបុរសរងគ្រោះដល់មន្ទីរពេទ្យឯកជន «សុវណ្ណ» ។ សមត្ថកិច្ចគ្រប់ស្ថាប័នបានចុះទៅដល់កន្លែងកើតហេតុ ប៉ុន្តែមិនត្រូវបានម្ចាស់ផ្ទះសំណាក់ពន្លឺពេជ្រ ផ្តល់កិច្ចសហការភ្លាមៗទេ ហើយបន្ទប់ដែលជនរងគ្រោះស្នាក់នៅត្រូវបានគេរៀបរយឡើងវិញយ៉ាងស្អាតរួចទៅហើយ ។ សមត្ថកិច្ចបានប្រាប់ថា បុរសរងគ្រោះនោះឈ្មោះមួង វណ្ណឌី អាយុ៤៣ឆ្នាំ រស់នៅភូមិស្លាកែត សង្កាត់ស្លាកែត ក្រុងបាត់ដំបង រីឯស្រីស្នេហ៍របស់គាត់មិនត្រូវបានេគស្គាល់ឈ្មោះទេ ព្រោះក្រោយពីបញ្ជូនបុរសនេះដល់មន្ទីរពេទ្យនាងបានគេចខ្លួនភ្លាមដែរ សូម្បីតែម៉ូតូម៉ាកឆាលីរបស់នាងដែលទុកនៅផ្ទះសំណាក់ក៏មិនមកយកផង ។
អ្នកទទួលខុសត្រូវក្នុងផ្ទះសំណាក់ពន្លឺពេជ្រអ្នកស្រីរាយ ហៀក អាយុ៤៦ឆ្នាំ បាននិយាយប្រាប់សមត្ថកិច្ចថា នៅរសៀលម៉ោង២នៃថ្ងៃកើតហេតុនោះ គាត់បានឃើញនារីវ័យក្មេងនោះជិះម៉ូតូម៉ាកឆាលីមកមុនដៃគូរបស់គាត់ ហើយប្រហែលកន្លះម៉ោងក្រោយទើបឃើញបុរសជាដៃគូមកតាមក្រោយ ។ ស្ត្រីមេការរូបនោះបានឱ្យដឹងថា ក្រោយពីបុរសនោះចូលដល់បន្ទប់ជួបជាមួយដៃគូរបស់គាត់បានប្រហែល២០នាទីប៉ុណ្ណោះ ក៏ស្រាប់តែមានការភ្ញាក់ផ្អើលពេញផ្ទះសំណាក់ ដោយសារតែនារីរូបនោះចេញមកប្រាប់ថា មិត្តប្រុសរបស់នាងស្ទះដង្ហើមនិយាយមិនកើត ហើយគ្រានោះអ្នកបំរើការ២នាក់បានទៅជួយគត់ច្របាច់ និងជួយរកម៉ូតូឌុបទៅមន្ទីរពេទ្យភ្លាមៗដែរ ។ អ្នកស្រីរាយ ហៀក បានបញ្ជាក់ថា គាត់មិនបានដឹងអំពីមូលហេតុនេះទេ ប៉ុន្តែគ្រានោះនារីរូបនោះបានប្រាប់គាត់ថា ប្រុសស្នេហ៍របស់នាងតែងមានជំងឺឡើងឈាម និងគាំងបេះដូងញឹកញាប់នាពេលកន្លងមក ។ គាត់បញ្ជាក់ថា គូស្នេហ៍នេះតែងបបួលគ្នាមកក្រេបចន្ទទឹកឃ្មុំនៅទីនេះញឹកញាប់ដែរ ។
ទាក់ទិននឹងការស្លាប់របស់បុរសឈ្មោះមួង សុវណ្ណឌី គ្រូពេទ្យនៅមន្ទីរពេទ្យសុវណ្ណ បានបញ្ជាក់ថា ជនរងគ្រោះត្រូវបានស្ត្រីម្នាក់បញ្ជូនតាមម៉ូតូឌុបមកដល់មន្ទីរពេទ្យនៅម៉ោង៤រសៀលនាថ្ងៃនោះ ប៉ុន្តែជនរងគ្រោះនោះបានស្លាប់បាត់ទៅហើយ ដោយមិនដឹងថា ដាច់ខ្យល់តាំងពីពេលណានោះទេ ។ គ្រូពេទ្យបានបញ្ជាក់បន្ថែមថា គេមិនអាចធ្វើកោសល្យវិច័យបញ្ជាក់ពីមូលហេតុនៃការស្លាប់របស់បុរសរងគ្រោះនោះបានទេ ព្រោះគាត់មិនបានស្លាប់នៅមន្ទីរពេទ្យ ដោយក្រុមគ្រូពេទ្យមិនទាន់បានសង្គ្រោះនៅឡើយ ។ ទោះបីជាបែបណានារីជាដៃគូរបស់បុរសរងគ្រោះបានគេចខ្លួនភ្លាមៗក្រោយពីបញ្ជូនគូស្នេហ៍របស់ខ្លួនដល់មន្ទីរពេទ្យ ដែលជាហេតុធ្វើឱ្យពិបាកដល់សមត្ថកិច្ចក្នុងការបំភ្លឺជុំវិញករណីនេះ ។
សមត្ថកិច្ចបាននិយាយថា ជនរងគ្រោះស្លៀកតែខោស្ល៊ីបប៉ុណ្ណោះ ពេលគេបញ្ជូនទៅកាន់មន្ទីរពេទ្យ ។ នៅក្នុងករណីនេះសមត្ថកិច្ចមិនទាន់ហ៊ានធ្វើការសន្និដ្ឋានបែបណាទេចំពោះការស្លាប់របស់បុរសខាងលើដែលនែបនិត្យជាមួយគូស្នេហ៍ហេងស៊យរបស់គាត់ក្នុងបន្ទប់ ។ ប៉ុន្តែសមត្ថកិច្ចបានអះអាងថា ក្រុមនគរបាលបច្ចេកទេសកំពុងពិនិត្យលើសាកសព និងស្វែងរកនារីជាដៃគូមកបំភ្លឺជុំវិញករណីនេះផងដែរ ។ ទោះបីជាយ៉ាងណាម៉ូតូម៉ាកឆាលី ពណ៌ស ពាក់ស្លាកលេខ ១ណ-២៨៥៩ ភ្នំពេញ១ របស់នារីដែលរត់ចោលគូស្នេហ៍នេះ ត្រូវបានកំលាំងនគរបាលក្រុងយកទៅរក្សាទុកធ្វើការស្រាវជ្រាវបន្ត ។ បើយោងតាមការបំភ្លឺពីនារីជាគូស្នេហ៍បុរសរងគ្រោះខាងលើបានប្រាប់អ្នកបំរើផ្ទះសំណាក់ថា មិត្តប្រុសរបស់ខ្លួនធ្លាប់មានជំងឺឡើងឈាម និងគាំងបេះដូង ។ មតិជាច្រើនបានសង្ស័យថា បុរសនោះអាចគាំងបេះដូងដោយសារតែអារម្មណ៍របស់គាត់រំជើបរំជួលពេលកំពុងត្រេកត្រអាលជាមួយគូស្នេហ៍របស់គាត់ ៕
