សម្ដេចតេជោ ៖ កម្ពុជានិងអាមេរិកនៅមានសក្ដានុពលពង្រីកកិច្ចសហប្រតិបត្ដិការ
ដោយ ៖ អប្សរា
ថ្ងៃចន្ទ ទី១៩ ខែកក្កដា ឆ្នាំ២០១០ ម៉ោង ១៤:៥៣
ច័ន្ទថា
សម្ដេចតេជោជួបសវនាការជាមួយមន្ដ្រីជាន់ខ្ពស់ក្រសួងការបរទេសអាមេរិក
រាជធានីភ្នំពេញ ៖ លោកអ៊ាង សុផល្លែត ជំនួយការសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានប្រាប់ឱ្យដឹងថា នៅក្នុងជំនួបពិភាក្សាការងារជាមួយសម្ដេចតេជោនាយកមន្ដ្រី ហ៊ុន សែន នារសៀលថ្ងៃ ទី១៧ កក្កដា ឆ្នាំ២០១០ នៅទីស្ដីការគណៈ រដ្ឋមន្ដ្រី លោក WILLIAM J.BURNS អនុរដ្ឋមន្ដ្រីក្រសួងការបរទេសសហរដ្ឋអាមេរិក បានជំរាបសម្ដេចតេជោនាយករដ្ឋមន្ដ្រីថា លោកសប្បាយរីករាយយ៉ាងខ្លាំងចំពោះ ទំនាក់ទំនងកិច្ចសហប្រតិបត្ដិការរវាងសហរដ្ឋអាមេរិក និងកម្ពុជា ។ លោកមានជំនឿជឿ ជាក់យ៉ាងខ្លាំងថា ទំនាក់ទំនងកិច្ចសហប្រតិបត្ដិការរវាងប្រទេសទាំងពីរនឹងមានការរីក ចំរើនថែមទៀត ជាពិសេសលើវិស័យកសិកម្ម ដែលជាវិស័យមួយសំខាន់បំផុតផ្ដោតលើសន្ដិសុខស្បៀង ក៏ដូចជាកិច្ចសហប្រតិបត្ដិការជា មួយកម្ពុជាផងដែរលើបញ្ហាតំបន់ទាំងមូល ។
ជាការឆ្លើយតប សម្ដេចតេជោនាយករដ្ឋមន្ដ្រី ហ៊ុន សែន បានសំដែងការយល់ព្រមជាមួយការវិភាគ ការវិវឌ្ឍ និងកិច្ចសហប្រតិបត្ដិ ការល្អរវាងប្រទេសទាំងពីរ ។ សម្ដេចបានថ្លែងអំណរគុណចំពោះសហរដ្ឋអាមេរិក ដែលបានជួយដល់កម្ពុជាតាមរយៈការផ្ដល់ជំនួយ ដើម្បីប្រយុទ្ធប្រឆាំងអំពើភេរវកម្ម ក៏ដូចជាអភិវឌ្ឍធនធានមនុស្ស បញ្ហាសុខភាព សិទ្ធិមនុស្ស និងប្រជាធិបតេយ្យ...។ លើសពីនេះទៀត សម្ដេចបានមាន ប្រសាសន៍ថា ប្រទេសទាំងពីរ សហរដ្ឋអាមេរិក និងកម្ពុជា ក៏នៅមានសក្ដានុពលដទៃទៀត ដែលអាចពង្រីកកិច្ចសហប្រតិបត្ដិការទៀតបាន ។ នៅក្នុងសន្និសីទកាសែតកាលពីថ្ងៃទី១៨ កក្កដា ឆ្នាំ២០១០ នៅឯសារមន្ទីរជាតិ លោក វីលៀម ប៊ន អនុរដ្ឋមន្ដ្រីក្រសួងការបរទេសអាមេរិក មានប្រសាសន៍ថា ប្រទេសកម្ពុជា-អាមេរិកនាពេលបច្ចុប្បន្ននេះមានទំនាក់ទំនងល្អប្រសើរផ្នែកការទូត ដែលទំនាក់ទំនងនេះ មានរយៈពេល៦០ឆ្នាំកន្លងមកហើយ ។ ការថ្លែងរបស់មន្ដ្រីអាមេរិករូបនេះធ្វើឡើងនៅក្រោយពេលដែលអាមេរិក បានប្រគល់រូបចម្លាក់ខ្មែរ ចំនួន៧ដែលអាមេរិកចាប់បានពីឈ្មួញនៅឯ ទឹកដីអាមេរិក ប្រគល់ឱ្យសារមន្ទីរជាតិ ។
នៅក្នុងសន្និសីទកាសែតជាភាសាអង់គ្លេសដែលកោះសន្ដិភាពបកប្រែក្រៅផ្លូវការ លោកវីលៀម ប៊ន បានថ្លែងថា លោកបានមកបំពេញទស្សនកិច្ចនៅកម្ពុជានាពេលនេះ ដោយមានការយកចិត្ដទុកដាក់ពីមន្ដ្រីជាន់ ខ្ពស់នៃរាជរដ្ឋាភិបាលកម្ពុជា ហើយរូបលោក ក៏បានជួបពិភាក្សា និងសំដែងការគួរសមជាមួយសម្ដេចតេជោហ៊ុន សែន នាយករដ្ឋមន្ដ្រី កាលពីថ្ងៃទី១៧ កក្កដា ឆ្នាំ២០១០ ផងដែរ ។ លោកវីលៀម ប៊ន បានថ្លែងថា អាមេរិក និងកម្ពុជានាពេលនេះមានទំនាក់ទំនងកាន់តែល្អស្ទើរគ្រប់ផ្នែករួមមានការផ្លាស់ប្ដូរទស្សន កិច្ចសិក្សារបស់និស្សិតទៅកាន់សហរដ្ឋអាមេរិក ហើយអាមេរិកក៏បានបញ្ជូនអ្នកស្ម័គ្រចិត្ដជាច្រើនរូបមកជួយបង្រៀនដល់ សិស្សានុសិស្សនៅតាមខេត្ដ-ក្រុងនៃប្រទេសកម្ពុជាផងដែរ ។ ក្រៅពីវិស័យអប់រំ អាមេរិក បានកំពុងជួយលើផ្នែកផ្សេងៗទៀតដល់កម្ពុជា ក្នុងនោះរួមមានដូចជាបញ្ហាការប្រែប្រួលអាកាសធាតុ សេដ្ឋកិច្ច កសិកម្ម និងបរិស្ថានជាដើម ។
ក្នុងសន្និសីទកាសែត លោកវីលៀម ប៊ន អះអាងថា លោកស្រីរដ្ឋមន្ដ្រីក្រសួងការបរទេស ហ៊ីលឡារី គ្លីនតុន មានគំរោងមកបំពេញទស្សនកិច្ចនៅបណ្ដាប្រទេសអាស៊ាន រួមមានប្រទេសកម្ពុជា, វៀតណាម និងឡាវ ។ អាមេរិកនឹងបន្ដជួយដល់កម្ពុជាលើ វិស័យផ្សេងៗទៀត ។ ឆ្លើយនឹងសំណួររបស់អ្នកកាសែតទាក់ទងទៅនឹងបញ្ហាលោកស្រីមូរ សុខហួរ លោក វីលៀម ប៊ន ថ្លែងថា អាមេរិកនៅតែគាំទ្រឱ្យមានការបញ្ចេញមតិ មិនមែនតែកម្ពុជាទេ គឺនៅលើពិភពលោក ។ លោកគ្រោងជួបជា មួយតំណាងគណបក្សនយោបាយ ឬសង្គមស៊ីវិលមួយចំនួនផងដែរនៅកម្ពុជាមុនពេល លោកចាកចេញពីកម្ពុជា ។ ទាក់ទិនបញ្ហា លោកស្រីមូរ សុខហួរ នោះលោកថ្លែងថា “ប្រទេសនីមួយៗមានច្បាប់រដ្ឋធម្មនុញ្ញរបស់ប្រទេសជាតិគេ ដែលពលរដ្ឋត្រូវតែគោរព”។
ដោយឡែកលោកជំទាវឧបនាយករដ្ឋមន្ដ្រីប្រចាំការ មែន សំអន បានថ្លែងថា ទំនាក់ទំនងរបស់កម្ពុជា និងអាមេរិកបាន បង្ហាញភាពល្អប្រសើរក្នុងរយៈពេល៦០ឆ្នាំ កន្លងទៅនេះ ។ តាមរយៈការបញ្ជូនមកវិញនូវ រូបចម្លាក់ខ្មែរនេះបង្ហាញពីគោលនយោបាយទំនាក់ទំនងល្អរបស់រដ្ឋាភិបាលនៃប្រទេសទាំង២ គឺបង្ហាញឱ្យឃើញពីកិច្ចសហប្រតិបត្ដិការបន្ថែមទៀតរវាងកម្ពុជា-អាមេរិក ។ លោកជំទាវមែន សំអន បន្ដទៀតថា ការបញ្ជូនវត្ថុបុរាណមកកម្ពុជាវិញបង្ហាញឱ្យឃើញថា “កម្ពុជាជាប្រទេសនៃវប្បធម៌ ហើយជំរុញឱ្យយើងទាំងអស់គ្នាខិតខំថែរក្សា សម្បត្ដិវប្បធម៌របស់ជាតិខ្មែរយើង” ៕
