រាជធានីភ្នំពេញ ៖ ការដោះដូរសាលាសង្កាត់បឹងកក់ទី១ នៅមិនទាន់ដោះស្រាយចប់នៅឡើយទេ ដោយសារតែប្រជាពលរដ្ឋដែលស្នាក់នៅចំនួន៣គ្រួសារបានទាមទារក្នុងតម្លៃខ្ពស់ គឺក្នុង១គ្រួសារ៣០មុឺនដុល្លារ ហើយក្រុមហ៊ុនបានងាកទៅចាត់ការតាមផ្លូវច្បាប់ ។ ទន្ទឹមនោះ រយៈពេល២ថ្ងៃមកហើយ គឺថ្ងៃទី៩និង១០ សីហា បាតុភាពបានផ្ទុះឡើងដោយសារតែប្រជាពលរដ្ឋបានហៅអ្នកបឹងកក់មកជួយតវ៉ា បន្ទាប់ពីមានទំនាស់គ្នាសាជាថ្មីម្តងទៀត ។
តាមព័ត៌មានឱ្យដឹងថា សាលាសង្កាត់បឹងកក់ទី១ ត្រូវបានដោះស្រាយដូរទីតាំងដោយប្រគល់ទៅក្រុមហ៊ុន ឃុន សៀ អុីមផត អុិចផត ជាអ្នកដោះដូរនៅពេលថ្មីៗកន្លងមកនេះ ។ បន្ទាប់ពីទទួលសិទ្ធិ ក្រុមហ៊ុនបានដោះស្រាយជូនប្រជាពលរដ្ឋចំនួន៧គ្រួសារ ដោយក្នុង១គ្រួសារៗចំនួន១៥.០០០ដុល្លារ ហើយមាន៤គ្រួសារទទួលយកការឧបត្ថម្ភ ចំណែក៣គ្រួសារទៀត គឺ១-ឈ្មោះ លី ស៊ាខេង ភេទប្រុស ២-ឈ្មោះ សុខ ហ៊ុច ភេទស្រី និង៣-ឈ្មោះ អ៊ុង ហឿង ភេទប្រុស បានទាមទារតម្លៃខ្ពស់រហូតដល់៣០មុឺនដុល្លារក្នុង១គ្រួសារ ទើបព្រមចេញ ។ លោក នួន សុខ័ណ្ណារ៉ា តំណាងឱ្យក្រុមហ៊ុនឃុន សៀ អុីមផត អុិចផត បានឱ្យដឹងថា ក្រុមហ៊ុននៅតែប្រកាន់ជំហរដោះស្រាយជូនប្រជាពលរដ្ឋដែលនៅសល់ តែប្រជាពលរដ្ឋមានចេតនាមិនទទួលយកការដោះស្រាយសោះ ដោយទាមទារតម្លៃខ្ពស់ដែលមិនអាចទទួលយកបាន ហើយបានទៅពឹងអ្នកបឹងកក់មួយចំនួនមកជួយតវ៉ា និងបានបង្វែរទៅជារឿងនយោបាយទៅវិញ ។ ក្នុងចំណោមប្រជាពលរដ្ឋដែលនៅសល់មានគ្រួសារឈ្មោះ លី ស៊ាខេង គាត់បានជួលសាលាសង្កាត់ស្នាក់នៅ ហើយលួចស្នើសុំធ្វើប្លង់កាន់កាប់ជាច្រើនលើកតែអាជ្ញាធរ មិនធ្វើឱ្យព្រោះជាដីរបស់សង្កាត់ ។ មិនតែប៉ុណ្ណោះ ឈ្មោះ លី ស៊ាខេង និងក្រុមគ្រួសារបានរារាំងក្រុមហ៊ុនមិនឱ្យធ្វើរបងតាមការអនុញ្ញាតរបស់សាលារាជធានីភ្នំពេញទៀតផង ។
តំណាងក្រុមហ៊ុនរូបនោះ បានឱ្យដឹងទៀតថា ក្រុមហ៊ុនមានឯកសារគ្រប់គ្រាន់ដើម្បីចាត់ការតាមផ្លូវច្បាប់ ហើយសំណុំរឿងស្ថិតនៅសាលាដំបូងរាជធានីភ្នំពេញនៅឡើយ ។ ដោយមើលឃើញថា តាមផ្លូវច្បាប់មិនឈ្នះ ទើបប្រជាពលរដ្ឋចំនួន៣គ្រួសារបានទៅពឹងពាក់អ្នកបឹងកក់ឱ្យនាំគ្នាមកតវ៉ាតែម្តង ។ ចំណែកលោក លី ស៊ាខេង ដែលជាអ្នកតវ៉ាបានសំណូមពរយ៉ាងទទូចឱ្យមានការដោះស្រាយឱ្យបានសមរម្យ ព្រោះគាត់បានស្នាក់នៅក្នុងសាលាសង្កាត់នេះតាំងពីឆ្នាំ១៩៩៧ មកម៉្លេះ ៕
ចែករំលែកព័តមាននេះ