កុមារកំព្រាលោតបោះបាល់ធ្លាក់បោកក្បាលនឹងថ្មនាំទៅដល់ពេទ្យស្លាប់
ដោយ ៖ អប្សរា
ថ្ងៃព្រហស្បត្ត៏ ទី២ ខែកញ្ញា ឆ្នាំ២០១០ ម៉ោង ១៧:០៥
ថ្មកែវ
សពបានធ្វើពិធីបូជានៅវត្តពាលញែក សង្កាត់ផ្ទះព្រៃ ក្រុងពោធិ៍សាត់
ខេត្តពោធិ៍សាត់ ៖ ក្មេងប្រុសរស់នៅក្នុងមជ្ឈមណ្ឌលកុមារកំញ្រពោធិ៍សាត់ ម្នាក់ដែលលោតលេងបាល់បោះជាមួយកុមារកំញ្រជាច្រើននាក់ទៀត បានធ្លាក់បោកក្បាលនឹងជ្រុងថ្មរបួសធ្ងន់ និងសន្លប់បាត់ស្មារតី ។ រយៈពេលប្រហែល១០នាទីក្រោយមកគេបានស្លាប់ ពេលបញ្ជូនទៅដល់មន្ទីរពេទ្យ ។ ហេតុការណ៍នេះបានកើតឡើងកាលពីថ្ងៃទី៣១ សីហា ២០១០ វេលាម៉ោង៩និង១៥នាទីយប់ នៅក្នុងមជ្ឈមណ្ឌលកុមារកំញ្រស្ថិតក្នុងភូមិចំការចេកខាងជើង សង្កាត់ផ្ទះព្រៃ ក្រុងពោធិ៍សាត់ ។
លោកទិត្យ សេងនាថ ប្រធានស្តីទីមជ្ឈមណ្ឌលកុមារកំញ្រពោធិ៍សាត់ ឱ្យដឹងថា ក្មេងរងគ្រោះឈ្មោះព្រំ នីសុភត្រា ភេទប្រុស អាយុ១៦ឆ្នាំ ស្នាក់នៅមណ្ឌលកុមារកំញ្រពោធិ៍សាត់ រយៈពេលជាងពីរឆ្នាំមកហើយ ដោយគ្មានបញ្ហាសុខភាពអ្វីទេ ។ នៅយប់នោះដោយខែភ្លឺក្មេងៗនាំគ្នារត់ប្រលែងគ្នាលេង ខ្លះលេងបាល់បោះ ខ្លះលេងបាល់ទាត់ ខ្លះលេងបិទពួនទៅតាមទំលាប់របស់ពួកគេ ។ ចំណែកក្មេងប្រុសរងគ្រោះបានលេងបាល់បោះ ហើយនៅពេលលោតបោះបាល់ចូលក្នុងរង្វង់កន្ត្រកដែកដែលមានកំពស់២,៥០ម៉ែត្រ ពេលធ្លាក់មកវិញទាក់ជើងគ្នាបណ្តាលឱ្យដួលបោកក្បាលលើកំរាលស៊ីម៉ង់ត៍របួសយ៉ាងធ្ងន់ធ្ងរ ។ ពេលងើបឡើងបានបន្តិចក្មេងរងគ្រោះនោះបានពោលប្រាប់គេឯងថា វិលមុខខ្លាំងណាស់ រួចហើយក៏ដួលទៅវិញ ផ្កាប់មុខលើជ្រុងថ្មសន្លប់បាត់មាត់ឈឹង ។
ភ្លាមៗនោះក្មេងៗដែលលេងជាមួយបាននាំគ្នាលើកគក់រឹតច្របាច់ដៃច្របាច់ជើងនៅតែមិនដឹងខ្លួន ហើយលោកក៏យករថយន្តដឹកទៅសង្គ្រោះនៅមន្ទីរពេទ្យ ប៉ុន្តែពេលទៅដល់គ្រូពេទ្យមិនទាន់បានពិនិត្យព្យាបាលផង ក៏ស្លាប់តែម្តងទៅ ។នៅព្រឹកថ្ងៃទី១ កញ្ញា ឆ្នាំ២០១០ ប៉ូលិសបច្ចេកទេសបានពិនិត្យសពឃើញនៅលើផ្ទៃមុខមានស្នាមរលាត់ និងនៅលើស្មងជើងទំនងជាកូតលើផ្ទៃស៊ីម៉ង់ត៍នៃតារាងបាល់បោះនោះ ប៉ុន្តែអ្វីដែលធ្ងន់ធ្ងរនោះគឺបោកក្បាលខ្លាំងនឹងថ្ម ។ សពបានធ្វើពិធីបូជានៅវត្តពាលញែក សង្កាត់ផ្ទះព្រៃ ក្រុងពោធិ៍សាត់ បន្ទាប់ពីសមត្ថកិច្ចធ្វើកោសល្យវិច័យរួច ៕
