ជីវិតអភ័ព្វមុខដូចនាយចយអត់ទឹកត្រឹមតែ១ម៉ោងប្រកាច់ភ្លាម
ដោយ ៖ សាម៉ន
ថ្ងៃអាទិត្យ ទី១៨ ខែមេសា ឆ្នាំ២០១០ ម៉ោង ១៦:៥៥
កោះសន្តិភាព
យុវជនអ៊ុយ ហន អាយុ២៥ឆ្នាំមានមុខមាត់ដូចនាយចយ
ខេត្ដកំពង់ឆ្នាំង ៖ ស្ថិតក្នុងទឹកមុខស្លេកស្លាំង សក់ក្បាលស្ដើង ស្បែកស្ងួត បញ្ជាក់ថា ជាមនុស្សពុំសូវមានសុខភាពល្អ ឯមុខមាត់ដូចទៅនឹងអ្នកកំប្លែងម្នាក់ គឺនាយ “ចយ” ប៉ុន្ដែយុវជនម្នាក់នេះ គឺចម្លែកអត់ទឹកមិនបានបើខ្វះទឹកត្រឹមតែ១ម៉ោងច្បាស់ជាត្រូវប្រកាច់មិនខាន ។
យុវជនដ៏កំសត់នេះនិយាយថា រូបគេឈ្មោះអ៊ុយ ហន អាយុ២៥ឆ្នាំ មានបងប្អូន៣នាក់ ម្ដាយឈ្មោះអ៊ុយ ហៀក អាយុ៥៥ឆ្នាំ ឪពុកស្លាប់ចោលតាំងពីររូបគេនៅតូចៗម្ល៉េះ សព្វថ្ងៃរស់នៅភូមិអូរសណ្ដាន់ ឃុំទឹក ហូត ស្រុករលាប្អៀរ ។ រូបគេសព្វថ្ងៃប្លែកខុសគេ គឺអត់ទឹកមិនបានដែលរៀងរាល់កន្លះ ម៉ោងត្រូវងូតទឹកម្ដង ឬត្រូវយកទឹកចាក់លើក្បាលម្ដង ព្រោះបើមិនអ៊ីចឹងទេ គឺត្រូវក្ដៅខ្លាំង ហើយនឹងត្រូវប្រកាច់មិនខាន ។ ក្រៅពីមានភាពចម្លែកដែលពិបាកក្នុងការរស់នៅនេះហើយ គឺស្បែកមិនមានរន្ធញើសទេ ដែលប្រហែលមកពីកត្ដានេះហើយទើបរូបគេត្រូវការទឹកជាប្រចាំនោះ ។
យុវជនរូបនេះបន្ដថា ដោយឃើញនាយចយតាមកញ្ចក់ទូរទស្សន៍ដែលមានមុខមាត់ដូចរូបគេបែបនេះ រូបគេក៏ចង់ក្លាយខ្លួនជាអ្នកកំប្លែង ឬសំដែងដែរ ប៉ុន្ដែមើលទៅមិនអាចទៅរួចទេ ព្រោះតែរូបគេចាញ់ថ្ងៃ និងត្រូវការទឹកជាប្រចាំយ៉ាងនេះ ។ សព្វថ្ងៃរូបគេមិនហ៊ានចេញដើរទៅណាឆ្ងាយៗទេ គឺនៅផ្ទះ និងត្រៀមឱ្យមានទឹកជាប្រចាំ ។ ដោយសារតែបែបនេះហើយគួបផ្សំនឹងគ្រួសារមានជីវភាពក្រីក្រផង ទើបរូបគេពុំបានចូលរៀនសូត្រនឹងគេ ។ ក្នុងចំណោមបងប្អូន៣នាក់ (ប្រុស២ ស្រី១) គឺរូបគេចម្លែកតែម្នាក់ឯងទេ ចំណែកបងប្អូន២នាក់ទៀត មានកាយសម្បទាត្រឹមត្រូវ ។ ពេលសួរថា តើចង់មានគូស្រករទេ? នាយអ៊ុយ ហន ដែលមុខមាត់ ដូចនាយចយឆ្លើយថា “ចង់មានប្រពន្ធដែរ តែតើនរណាគេនឹងស្រលាញ់ខ្ញុំ? សំរាប់រូបខ្ញុំ គឺមានលទ្ធភាព... ថ្វីបើរូបខ្ញុំប្លែកខុសគេមែនក៏ដោយ” ៕
