ខេត្តកំពង់ស្ពឺ ៖ ក្នុងគោលបំណងអប់រំដល់ប្រជាពលរដ្ឋក្នុងប្រទេសកម្ពុជា ឱ្យមានការយល់ដឹងច្បាស់អំពីជំងឺមហារីកមាត់ស្បូននិងវិធីបង្ការជំងឺនេះ ក្រសួងសុខាភិបាលបានសហការជាមួយមន្ទីរពេទ្យកាល់ម៉ែត សហភាពសហព័ន្ធយុវជនកម្ពុជា និងសមាគមន៍នាវាយុវជនអាស៊ីអាគ្នេយ៍កម្ពុជារ់ៀបចំបើកយុទ្ធនាការប្រយុទ្ធប្រឆាំងនឹងជំងឺមហារីកមាត់ស្បូនលើស្ត្រីកម្ពុជា នៅក្នុងឃុំខ្សេមខ្សាន្ត ស្រុកឧត្ដុង្គ ខេត្តកំពង់ស្ពឺ កាលពីថ្ងៃទី១២ ឧសភា ២០១៣។ ពិធីនេះបានប្រព្រឹត្តទៅក្រោមអធិបតីភាពលោក ហ៊ុន ម៉ានី លេខាផ្ទាល់សម្ដេចអគ្គមហាសេនាបតីតេជោ ហ៊ុន សែន និងជាប្រធានសហភាពសហព័ន្ធយុវជនកម្ពុជា លោកស្រីសាស្ត្រាចារ្យ គ្រុយ លាងស៊ីម អនុរដ្ឋលេខាធិការក្រសួងសុខាភិបាលទទួលបន្ទុកកម្មវិធីជាតិប្រយុទ្ធប្រឆាំងនឹងជំងឺមហារីមាត់ស្បូន និងជាទីប្រឹក្សាផ្នែករោគស្ត្រីនិងសម្ភពនៃមន្ទីរពេទ្យកាល់ម៉ែត និងលោកស្រីប្រាក់ ពិសិដ្ឋ រង្សី ប្រធាននាយកដ្ឋានការពារសុខភាពនៃក្រសួងសុខាភិបាល។
តាមរបាយការណ៍ភ្នាក់ងារអន្តរជាតិសម្រាប់ការស្រាវជ្រាវអំពីជំងឺមហារីក (Globocan/IARC)បានបង្ហាញថាប្រទេសកម្ពុជាមានអត្រាកើត និងស្លាប់ដោយសារជំងឺមហារីកមាត់ស្បូនច្រើនជាងគេ។ យុទ្ធនាការនេះ ប្រារព្ធធ្វើឡើងស្របពេលដែលពិភពលោកទាំងមូលប្រារព្ធទិវាមាតាសាកលផងដែរ។ នៅក្នុងតំបន់អាស៊ីអាគ្នេយ៍ ជារៀងរាល់ឆ្នាំមានស្ត្រីប្រហែល១៥០០នាក់កើតជំងឺនេះ ហើយក្នុងនោះ៦០ភាគរយ ពោលគឺប្រហែល៨០០នាក់បានស្លាប់។ បើផ្អែកលើស្ថិតិពិភពលោកជារួមនៅរៀងរាល់នាទីគឺមានស្ត្រីម្នាក់បានកើតជំងឺមហារីកមាត់ស្បូន ហើយអ្វីដែលគួរឱ្យព្រួយបារម្ភបំផុតនោះគឺរៀងរាល់២នាទីម្ដងមានស្ត្រីម្នាក់ស្លាប់ដោយសារជំងឺនេះ៕
ចែករំលែកព័តមាននេះ