ខេត្តមណ្ឌលគិរី ៖ កំណាត់ឈើប្រណីតប្រភេទធ្នង់ចំនួន១០កំណាត់ដែលមានមុខកាត់ធំៗត្រូវបានមន្ត្រីជំនាញខណ្ឌរដ្ឋបាលព្រៃឈើចាប់បង្ក្រាបបានក្បែរចំណុចច្រករបៀងង៉ាំដី ខណៈដែលក្រុមឈ្មួញកំពុងព្យាយាមដឹកជំលៀសយកទៅលក់ឱ្យថៅកែវៀតណាមតាមព្រំដែន ។ ប្រតិបត្តិការចុះបង្ក្រាបការលួចនាំឈើទៅលក់តាមច្រករបៀងប្រព្រឹត្តទៅនៅវេលាម៉ោង៧និង៣០នាទីព្រឹកថ្ងៃទី១៣ ឧសភា ២០១៣ ស្ថិតក្នុងភូមិឆ្នែង ឃុំស្រែក្ទម្ព ស្រុកកែវសីមា ។
ប្រភពបាននិយាយឱ្យដឹងថា នៅពេលក្រុមឈ្មួញកំពុងដឹកឈើយកទៅច្រកដើម្បីលក់ដូរនោះ ស្រាប់តែម្ចាស់ចម្ការពោតមកទាន់ដោយឃើញឡានដឹកឈើនោះកំពុងបើកកិនដំណាំរបស់ខ្លួន ម្ចាស់ចម្ការក៏បានរាយការណ៍ទៅមន្ត្រីជំនាញដើម្បីចាប់បង្ក្រាបតែម្តង ។ បច្ចុប្បន្នកំណាត់ឈើប្រណីតធ្នង់ត្រូវបានយកទៅរក្សាទុកនៅផ្នែករដ្ឋបាលព្រៃឈើកែវសីមា ប៉ុន្តែពុំទាន់បានដឹងអំពីចំនួនម៉ែត្រគូបនៅឡើយទេ ព្រោះមន្ត្រីជំនាញកំពុងធ្វើការបន្ត ។
បើតាមប្រភពដ៏ច្បាស់ការណ៍បានលួចបង្ហើបឱ្យដឹងថា ជារៀងរាល់យប់ច្រកង៉ាំដីមានសភាពមមាញឹកខ្លាំងណាស់ ព្រោះតែច្រកមួយនេះជាច្រកនាំឈើចេញយ៉ាងសកម្ម ហើយក៏នៅមានច្រកមួយផ្សេងទៀតដែរ ដែលកំពុងចរាចរណ៍ឈើយ៉ាងគគ្រឹកគគ្រេង និងមានទីតាំងនៅជិតគ្នា គឺច្រកង៉ាំបាឡាង ដែលក្នុងមួយយប់ៗមានរថយន្តដឹកឈើចេញទៅប្រទេសវៀតណាមមិនតិចជាង១០គ្រឿងឡើយ ៕
ចែករំលែកព័តមាននេះ