ខេត្តបាត់ដំបង ៖ យុវជនម្នាក់ដែលម្ដងធ្វើឆ្កួតម្ដងធ្វើជាត្រូវបានសមត្ថកិច្ចឃាត់ខ្លួន កាលពីវេលាម៉ោង៩ព្រឹកថ្ងៃទី១១ មេសា ២០១៣ ក្រោយពីមានបណ្ដឹងថា ជននេះបានព្យាយាមទូរស័ព្ទអស់រយៈពេលជាងមួយសប្ដាហ៍ ដើម្បីគំរាមទារប្រាក់ រហូតដល់៣០ម៉ឺនដុល្លារពីបុគ្គលិកផ្នែកម៉ាស្សារបស់ក្រុមហ៊ុនកូរ៉េមួយដែលមានទីតាំងនៅខាងជើងផ្សារបឹងឈូក ក្នុងសង្កាត់ស្វាយប៉ោ ក្រុងបាត់ដំបង ដែលជាថ្នូរ និងមិនទម្លាយរឿងអាស្រូវ និងមិនកម្ទេចទីតាំងម៉ាស្សានេះចោល ។
សមត្ថកិច្ចនិយាយថា ជនសង្គមងងឹតនេះឈ្មោះហែម សុភ័ក្រ អាយុ២០ឆ្នាំ នៅភូមិសួសអី ឃុំពាមឯក ស្រុកឯកភ្នំ។ ជននេះហាក់មានសតិមិនប្រក្រតី បន្ទាប់ពីត្រូវឃាត់ខ្លួនដែលគេសង្ស័យថា ជាការធ្វើឆ្កួតដោយចេតនា ដើម្បីចៀសពីការចោទប្រកាន់តាមផ្លូវច្បាប់។ សមត្ថកិច្ចបន្តថា ជននេះត្រូវស្រ្តីបុគ្គលិកផ្នែកម៉ាស្សារបស់ក្រុមកូរ៉េឈ្មោះ «VIGEN MEDICAL» មានទីតាំងខាងលើប្ដឹងឲ្យចាប់ខ្លួន ក្រោយពីពួកគេទទួលការហៅទូរស័ព្ទចូលជាង៦០លើកពីជនឡប់សតិនេះ ដើម្បីគំរាមទារប្រាក់ចាប់ពី៥ម៉ឺនដុល្លារ រហូតដល់៣០ម៉ឺនដុល្លារ ព្រោះតែមានភាពយឺតយ៉ាវក្នុងការប្រគល់ប្រាក់។ ប៉ុន្តែចុងក្រោយធា្លក់មកនៅត្រឹម៦.០០០ដុល្លារ ដោយកំណត់ពេលប្រគល់ប្រាក់នៅម៉ោង១២និង៤៥នាទីថ្ងៃទី១១ មេសា ក្នុងព្រលានយន្តហោះ វាលបែកចាន ក្រុងបាត់ដំបង តែត្រូវសមត្ថកិច្ចឃាត់ខ្លួនមុនម៉ោងកំណត់ គ្រាដែលជននេះបន្លំខ្លួនចូលក្នុងហាងម៉ាស្សារបស់ក្រុមហ៊ុនដែលបុគ្គលិកបានស្គាល់ច្បាស់៕
ចែករំលែកព័តមាននេះ