រាជធានីភ្នំពេញ ៖ រថយន្តកូរ៉េម៉ាកគៀ មួយគ្រឿងចំណុះ២តោនកន្លះ ពណ៌ស ដឹកផ្លែខ្នុរ និងផ្លែមង្ឃុតទង្ងន់៦តោនបើកចេញពីខេត្តកោះកុងចូលរាជធានីភ្នំពេញយកមកដាក់នៅស្តង់នៅផ្សារនាគមាស មកដល់ខាងត្បូងស្តុបទេពផនប្រមាណ៣០ម៉ែត្រ ស្រាប់តែរថយន្តដាច់កង់ក្រោយចំហៀងខាងឆ្វេង ខ្ទាតចេញពីរថយន្តធ្វើឱ្យរថយន្តក្រឡាប់ផ្អៀងមួយចំហៀងធ្លាក់ផ្លែឈើរាយពេញផ្លូវ កាលពីវេលាម៉ោង៤និង១០នាទីទៀបភ្លឺថ្ងៃទី២៨ វិច្ឆិកា តាមមហាវិថីម៉ៅសេទុង ស្ថិតក្នុងក្រុមទី៨ ភូមិ២ សង្កាត់ទឹកល្អក់ទី៣ ខណ្ឌទួលគោក ។
ព្រូរថយន្តឈ្មោះឆៃ យ៉ា អាយុ២២ឆ្នាំ មានទីលំនៅនៅភូមិឈើទាលភ្លោះ ឃុំព្រៃអំពក ស្រុកគិរីវង្ស ខេត្តតាកែវ បានឱ្យដឹងថា រថយន្តនេះដឹកផ្លែខ្នុរ និងផ្លែមង្ឃុតទម្ងន់៦តោន ចេញពីខេត្តកោះកុងតាំងពីម៉ោង៩យប់ថ្ងៃទី២៧ វិច្ឆិកា បើកបរដោយឈ្មោះជាតិ ភេទប្រុស អាយុ២៤ឆ្នាំ មានស្រុកកំណើតនៅខេត្តព្រៃវែង ។ ខណៈបើកមកដល់ខាងត្បូងស្តុបទេពផនប្រមាណ៣០ម៉ែត្រ ស្រាប់តែរថយន្តដាច់កង់ក្រោយចំហៀងខាងឆ្វេងរួចខ្ទាតចេញពីរថយន្តធ្វើឱ្យរថយន្តដឹកធ្ងន់ផងក៏ក្រឡាប់ផ្អៀងមួយចំហៀងខាងស្តាំធ្លាក់ផ្លែឈើរាយពេញផ្លូវ ។ ចំណែកអ្នកបើកបររថយន្តបានរត់គេចខ្លួនបាត់ស្រមោល ។
លោកអនុសេនីយ៍ទោ ដេ ម៉ៅ ទទួលបន្ទុកចរាចរណ៍ខណ្ឌទួលគោកបានឱ្យដឹងថា ករណីនេះមិនបង្កឱ្យមានការប៉ះពាល់ដល់អ្នកដទៃ និងមិនមានអ្នករងរបួសទេ ដូច្នេះ សមត្ថកិច្ចគ្រាន់តែជួយសម្រួលចរាចរណ៍ធ្វើយ៉ាងណាឱ្យម្ចាស់ផ្លែឈើនោះយករថយន្តមកសេងប្រមូលយកផ្លែឈើចេញកុំឱ្យស្ទះចរាចរណ៍ ។ ចំណែករថយន្តបង្កនោះត្រូវម្ចាស់ស្ទូចយកទៅរក្សាទុកដោយខ្លួនឯង ។
រថយន្តចំណុះត្រឹម២តោនកន្លះ ហើយផ្ទុកទំនិញរហូតទៅ៦តោនជាការប្រឈមនឹងគ្រោះថ្នាក់មួយ ហើយការធ្វេសប្រហែសមិនបានពិនិត្យពីសុវត្ថិភាពយានយន្តដូចជាកង់ សម្បកកង់ និងប្រព័ន្ធហ្វ្រាំងមុនពេលបើកបររឹតតែគ្រោះថ្នាក់ទៀត ៕
ចែករំលែកព័តមាននេះ