ខេត្តបាត់ដំបង ៖ យុវនិស្សិតម្នាក់បានបង្ហាញពីទេពកោសល្យគួរឱ្យភ្ញាក់ផ្អើលដោយគ្រាន់តែប្រើដៃម្ខាងកាន់បំពង់ទុយោជ័រប្រវែង១ម៉ែត្រធ្វើឱ្យគេមើលទៅហាក់ដូចជាអង្គុយលើខ្យល់ផុតពីដី ។ និស្សិតផ្នែក “IT” រូបនេះបានបង្ហាញពីភាពអស្ចារ្យរបស់ខ្លួន កាលពីយប់ថ្ងៃទី១៨ វិច្ឆិកា ២០១២ នៅលើសួនច្បារខាងមុខវត្តកណ្តាល ក្នុងក្រុងបាត់ដំបង ដែលមានមនុស្សរាប់សិបនាក់ចោមរោមមើល ។
ការបង្ហាញមុខតាមរយៈការសម្តែងរបស់យុវជនរូបនេះមនុស្សជាច្រើនហាក់ដូចមិនធ្លាប់ស្គាល់មុខ ឬសាវតារយុវជននេះទេ បើទោះជាគេអះអាងថា មានស្រុកកំណើតនៅក្នុងក្រុងបាត់ដំបងនេះក្តី ។ អ្នកចោមរោមមើលការសម្តែងភាពអស្ចារ្យរបស់យុវនិស្សិតរូបនេះ សុទ្ធតែជញ្ជក់មាត់ស្ងើចសរសើរថា «ខ្លាំង» ដែលមិនធ្លាប់ជួបប្រទះអ្នកបង្ហាញទេពកោសល្យមិនគួរឱ្យជឿបែបនេះឡើយ ។
ស្ថិតក្នុងសម្លៀកបំពាក់ដូចរ៉ូបពណ៌ស្រគាំរលើបរលោង យុវជនវ័យ២០ឆ្នាំ រូបនេះ បានអង្គុយពែនភ្នែនរបៀបស្មឹងស្មាធិ៍នៅលើខ្យល់កម្ពស់ផុតពីការ៉ូឡាប្រហែលកន្លះម៉ែត្រ ដោយប្រើដៃខាងស្តាំម្ខាងច្រត់ទប់នឹងបំពង់ទុយោជ័រប្រវែង១ម៉ែត្រប៉ុណ្ណោះ ។ ប៉ុន្តែមុនពេលបង្ហាញភាពអស្ចារ្យឱ្យគេមើល យុវជននេះ ស្ថិតក្នុងការហ៊ុមព័ទ្ធដោយសំពត់ខ្មៅ លុះពេលអ្នករៀបចំទម្លាក់សំពត់ខ្មៅនោះចុះ ក៏លេចរូបយុវជននេះអង្គុយលើខ្យល់ភ្លាមដែរ ។ អ្នកចោមរោមមើលជាច្រើនបានបង្ហាញពីចម្ងល់គ្រប់ៗគ្នា ថែមទាំងបានយកដៃរាវផ្នែកខាងក្រោមទៀតផង ក្រែងយុវជននេះអង្គុយលើវត្ថុអ្វីម្យ៉ាង តែគ្មានអ្វីបន្តិចឡើយ ។ នេះជាភាពអស្ចារ្យដែលធ្វើឱ្យមនុស្សរាប់សិបនាក់មានការភ្ញាក់ផ្អើលកាន់តែខ្លាំង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ