រាជធានីភ្នំពេញ ៖ រថយន្តមែរសឺដេស ពណ៌ខ្មៅ បើកក្នុងល្បឿនលឿនបួងចង្កូតមិនទាន់ជ្រុលទៅបុកដើមត្របែកព្រៃបាក់ជាពីរកំណាត់ រួចជ្រុលទៅបុកគូទរថយន្តឡិចស៊ីស RX300 ចតនៅមុខផ្សារទំនើប BS ហើយបើករត់គេចទាំងរថយន្តបែកកង់មុខខាងស្តាំ តែសន្តិសុខដេញឃាត់បាន កាលពីវេលាម៉ោង១០និង៣០នាទីយប់ថ្ងៃទី៣ តុលា ២០១២ ចំណុចទល់មុខផ្សារទំនើប BS តាមមហាវិថីព្រះមុនីវង្ស ក្នុងសង្កាត់មនោរម្យ ខណ្ឌ៧មករា ។
ប្រភពព័ត៌មានពីសន្តិសុខយាមនៅមុខធនាគារភ្នំពេញពាណិជ្ជជិតកន្លែងកើតហេតុបានឱ្យដឹងថា រថយន្តបង្កបើកតាមមហាវិថីកម្ពុជាក្រោម ពីលិចទៅកើតបត់ស្តាំឆ្ពោះទៅមហាវិថីព្រះមុនីវង្ស ក្នុងល្បឿនលឿនពេកបួងចង្កូតមិនទាន់ជ្រុលទៅបុកដើមត្របែកព្រៃនៅមុខផ្សារទំនើប BS បាក់ជាពីរកំណាត់រលំសង្កត់លើរថយន្តឡិចស៊ីស RX300 ពណ៌ស្ករ ចតនៅមុខផ្សារទំនើបនោះហើយត្រូវរថយន្តបង្កជ្រុលទៅបុកគូទចំហៀងខាងស្តាំក្រពឹតទៀត ធ្វើឱ្យវេរទទឹងទៅជាប់នឹងធនាគារភ្នំពេញពាណិជ្ជ ។
ពេលឃាត់រថយន្តបានម្ចាស់រថយន្តប្រកែកថារូបគាត់មិនបានបុកទេ មានគេជិះរថយន្តដេញតាមបុកគាត់ តែសន្តិសុខបានប្រាប់ថារូបគេឃើញផ្ទាល់ភ្នែក ហើយសូម្បីតែកាមេរ៉ាសុវត្ថិភាពរបស់ធនាគារក៏មានរូបភាពបុកនោះមិនអាចប្រកែកបានឡើយ ។ រថយន្តបង្ក និងរថយន្តឡិចស៊ីសដែលរងការខូចខាតត្រូវសមត្ថកិច្ចស្ទូចយកទៅរក្សាទុកនៅសាលារាជធានីភ្នំពេញ ដើម្បីធ្វើការដោះស្រាយតាមនីតិវិធី ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ