ម៉ូតូគុប មួយគ្រឿងបុកធុងសំរាមរបួសធ្ងន់ម្នាក់ ឯមួយគ្រឿងទៀតពន្លះជាមួយសេ125របួសធ្ងន់3នាក់
បញ្ចូលអត្ថបទ ៖ ស្រីណា កោះ
ថ្ងៃអង្គារ ទី៧ ខែសីហា ឆ្នាំ២០១២ ម៉ោង ១០:០០
កោះសន្តិភាព
ទិដ្ឋភាពក្រោយពេលកើតហេតុ
រាជធានីភ្នំពេញ ៖ គ្រោះថ្នាក់ចរាចរណ៍២ករណីនៅកន្លែងដោយឡែកពីគ្នាបណ្តាលឱ្យមនុស្សដួលបោកទៅលើថ្នល់របួសធ្ងន់៤នាក់ ដែលហេតុការណ៍ទី១ ម៉ូតូគុប ពណ៌ទឹកប៊ិច១គ្រឿង បើកដោយបុរសម្នាក់ក្នុងល្បឿនលឿនបានវាក់ជាមួយបុរសម្នាក់កំពុងដើរឆ្លងថ្នល់ក៏ឆក់ចង្កូតគេចជ្រុលទៅបុកធុងសំរាមដែលដាក់នៅតាមចិញ្ចើមផ្លូវពេញទំហឹង បណ្តាលឱ្យដួលបោកក្បាលទៅលើថ្នល់សន្លប់បាត់មាត់ឈឹង ត្រូវរថយន្តសាមុយដឹកយកទៅសង្គ្រោះនៅមន្ទីរពេទ្យឯកជនមួយ កាលពីវេលាម៉ោង២និង៣៥នាទីយប់ឈានចូលថ្ងៃទី៣ សីហា តាមបណ្តោយផ្លូវ១៩៨៦ សង្កាត់ភ្នំពេញថ្មី ខណ្ឌសែនសុខ មុខយានដ្ឋានខាត់វិរ័ត្នទី២ ។
ប្រភពព័ត៌មានពីសមត្ថកិច្ចខណ្ឌសែនសុខ បានឱ្យដឹងថា មុនពេលកើេតហេតុ ម៉ូតូគុប ពណ៌ទឹកប៊ិច បើកបរដោយបុរសម្នាក់បានបើកយ៉ាងលឿនក្នុងទិសដៅពីលិចទៅកើត តាមបណ្តោយផ្លូវលេខ១៩៨៦ ស្រាប់តែមកដល់កន្លែងកើេតហេតុ ក៏វាក់ជាមួយបុរសម្នាក់កំពុងដើរឆ្លងថ្នល់ ហើយបានឆក់ចង្កូតម៉ូតូបើកគេចក៏ជ្រុលទៅបុកធុងសំរាមតាមផ្លូវមុខយានដ្ឋានខាត់វិរ័ត្នទី២ ពេញទំហឹងបណ្តាលឱ្យដួលបោកក្បាលនឹងថ្នល់សន្លប់ស្តូកស្តឹងត្រូវរថយន្តសាមុយដឹកយកទៅសង្គ្រោះនៅមន្ទីរពេទ្យឯកជនមួយ ។
ក្រោយពេលកើតហេតុ ប៉ូលិសចរាចរបានចុះទៅវាស់វែង និងយកម៉ូតូទៅរក្សាទុកនៅអធិការដ្ឋានខណ្ឌសែនសុខ ។
ដោយឡែកករណីទី២ ម៉ូតូឌ្រីមសេ១២៥ពណ៌ខ្មៅ ស៊េរី២០០៧ មួយគ្រឿងបើកបរដោយបុរសម្នាក់យ៉ាងលឿន ហើយបើកវ៉ាម៉ូតូមួយគ្រឿងនៅពីមុខក៏ជ្រុលទៅបុកគ្នាជាមួយម៉ូតូគុប ពណ៌ទឹកប៊ិចមួយគ្រឿងទៀតជិះគ្នា២នាក់ ស្រីម្នាក់ ប្រុសម្នាក់ ក្នុងដំណើរបញ្ច្រាសទិសគ្នាចំពីមុខពេញទំហឹង បណ្តាលឱ្យភាគីទាំងសងខាងដួលរងរបួសធ្ងន់ទាំង៣នាក់ កាលពីវេលាម៉ោង១២និង៥នាទីថ្ងៃត្រង់ ថ្ងៃទី៣១ កក្កដា តាមបណ្តោយផ្លូវបេតុងភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ ខាងកើតវត្តទឹកថ្លា ។
បុរសបើកម៉ូតូគុបដែលរងរបួសធ្ងន់ឈ្មោះ ងៀង សុភ័ក្រ្ត អាយុ២២ឆ្នាំ ជានិស្សិត ស្នាក់នៅខណ្ឌចំការមន និងស្រីម្នាក់ទៀតជិះពីក្រោយរងរបួសធ្ងន់ដូចគ្នាឈ្មោះហួត សួគា៌ អាយុ២៤ឆ្នាំ ជានិស្សិត ស្នាក់នៅផ្ទះលេខ២៩ ផ្លូវលេខ១៩៨៦ សង្កាត់ភ្នំពេញថ្មី ខណ្ឌសែនសុខ ។ ឯបុរសបើកម៉ូតូឌ្រីមសេ១២៥ ពណ៌ខ្មៅ ស៊េរី២០០៧ ឈ្មោះខេន ហេង អាយុ២០ឆ្នាំ រងរបួសធ្ងន់ ។
លោក ហឿង រឿន នាយរងផ្នែកសណ្តាប់ធ្នាប់ចរាចរណ៍ជើងគោកខណ្ឌសែនសុខ បានប្រាប់កោះសន្តិភាពឱ្យដឹងថា មុនពេលកើតហេតុម៉ូតូឌ្រីមសេ១២៥ ពណ៌ខ្មៅ ស៊េរី២០០៧មួយគ្រឿង បើកបរដោយបុរសម្នាក់យ៉ាងលឿនតាមផ្លូវបេតុង ក្នុងទិសដៅពីជើងទៅត្បូង ពេលមកដល់ចំណុចកើតហេតុ ក៏ព្យាយាមបើកវ៉ាម៉ូតូមួួយគ្រឿងទៀតនៅពីមុខក៏ជ្រុលចង្កូតទៅបុកជាមួយម៉ូតូគុបពណ៌ទឹកប៊ិច ជិះដោយមនុស្សប្រុសស្រី២នាក់ ចំពីមុខពេញទំហឹង បណ្តាលឱ្យម៉ូតូទាំងពីរគ្រឿងដួលបោកមនុស្សទាំង៣នាក់ទៅលើថ្នល់របួសធ្ងន់ ត្រូវរថយន្តសាមុយដឹកយកទៅសង្គ្រោះនៅមន្ទីរពេទ្យព្រះកុសុមៈ ។ក្រោយពេលកើតហេតុ ប៉ូលិសចរាចរបានចុះទៅវាស់វែងនិងយកម៉ូតូទាំង២គ្រឿងទៅរក្សាទុកនៅអធិការដ្ឋានខណ្ឌសែនសុខ រង់ចាំការដោះស្រាយជាក្រោយ៕
