រាជធានីភ្នំពេញ ៖ គ្រោះថ្នាក់ចរាចរណ៍២ករណីនៅកន្លែងផ្សេងគ្នា ធ្វើឱ្យមនុស្ស៤នាក់រងរបួសធ្ងន់ និងស្រាល ហើយអ្នករបួសធ្ងន់ត្រូវបានបញ្ជូនទៅសង្គ្រោះនៅមន្ទីរពេទ្យ ដែលហេតុការណ៍ទី១ បុរសម្នាក់ជិះម៉ូតូឌ្រីមសេ១២៥ ស៊េរី២០០៨ ក្នុងល្បឿនលឿន ហើយចាប់ហ្វ្រាំងដៃ បណ្តាលឱ្យដួលបោកទៅនឹងខឿនចិញ្ចើមផ្លូវរងរបួសបែកក្បាល បញ្ជូនទៅមន្ទីរពេទ្យភ្លាមៗ កាលពីវេលាម៉ោង៥និង១០នាទីទៀបភ្លឺ ថ្ងៃទី៥ សីហា តាមបណ្តោយវិថីព្រះសីហនុ ជិតរង្វង់មូលវិមានឯករាជ្យ ក្នុងសង្កាត់ទន្លេបាសាក់ ខណ្ឌចំការមន ។
សាក្សីនៅកន្លែងកើតហេតុបានឱ្យដឹងថាជនរងគ្រោះខាងលើឈ្មោះ សៅ ផានី អាយុ២១ឆ្នាំ បានជិះម៉ូតូសេ១២៥ តាមបណ្តោយវិថីព្រះសីហនុ ពីកើតទៅលិច ក្នុងល្បឿនលឿន ស្រាប់តែមកដល់ជិតរង្វង់មូលវិមានឯករាជ្យបានចាប់ហ្វ្រាំងដៃ បណ្តាលឱ្យបោកក្បាលទៅនឹងខឿនចិញ្ចើមផ្លូវរងរបួសបែកក្បាល ត្រូវបានមិត្តភក្តិបញ្ជូនតាមរថយន្តសាមុយទៅសង្គ្រោះនៅមន្ទីរពេទ្យភ្លាមៗ ចំណែកឯម៉ូតូត្រូវបានក្រុមគ្រួសារយកទៅរក្សាទុក ។
ករណីទី២ បុរស៣នាក់បានជិះម៉ូតូស្គូពី ពណ៌សមួយគ្រឿងតាមបណ្តោយមហាវិថីព្រះមុនីរ៉េត មកដល់ចំណុចស្តុបនាងគង្ហីង ស្រាប់តែមានរថយន្តកាមរីឆ្លាមមួយគ្រឿងបើកមកពីក្រោយ ក្នុងទិសដៅស្របគ្នាពីលិចទៅកើត បុកគូទម៉ូតូបណ្តាលឱ្យដួលរបួសស្រាល កាលពីវេលាម៉ោង១០និង៤០នាទី យប់ថ្ងៃទី៣ សីហា ក្នុងសង្កាត់វាលវង់ ខណ្ឌ៧មករា ។សាក្សីបានឱ្យដឹងថា មុនពេលកើតហេតុបុរស៣នាក់បានជិះម៉ូតូម៉ាកស្គូពី ពណ៌ស តាមបណ្តោយមហាវិថីព្រះមុនីរ៉េត ពីលិចទៅកើត ស្រាប់តែទៅដល់ចំណុចស្តុបនាងគង្ហីង ក៏មានរថយន្តកាមរីឆ្លាមមួយគ្រឿងបើកមកពីក្រោយក្នុងទិសដៅស្របគ្នា ក៏បុកគូទម៉ូតូដួលប្រាវទៅលើថ្នល់ បណ្តាលឱ្យរងរបួសស្រាល ឯម៉ូតូខូចខាតតិចតួច ។ ភ្លាមៗរថយន្តបានបើកគេចបាត់ស្រមោល ។ ចំណែកម្ចាស់ម៉ូតូបានលើកម៉ូតូជិះទៅផ្ទះវិញទាំងក្តៅក្រហាយ ៕
ចែករំលែកព័តមាននេះ