ប្រជាសហគមន៍បារម្ភពីវារីអគ្គិសនីទន្លេសេសានខ្លាចមានទឹកជំនន់
ដោយ ៖ អប្សរា
ថ្ងៃអាទិត្យ ទី២៣ ខែឧសភា ឆ្នាំ២០១០ ម៉ោង ១៤:២៩
រស្មី
ទន្លេសេសានជាទន្លេមួយដែលហូរចាក់ចូលទៅក្នុងទន្លេមេគង្គ
ខេត្ដរតនគីរី ៖ ទន្លេសេសានជាទន្លេមួយដែលហូរចាក់ចូលទៅក្នុងទន្លេមេគង្គ និងមានប្រភពទឹកស្ថិតនៅក្នុងខ្ពង់រាបនៃប្រទេសវៀតណាម ដែលទន្លេសេសាននេះ បានហូរបត់បែនឆ្លងកាត់ចូលមកក្នុងខេត្ដរតនគីរី និង ខេត្ដស្ទឹងត្រែងនៃប្រទេសកម្ពុជា មុនប្រសព្វគ្នាជាមួយទន្លេមេគង្គ ។ មានទន្លេចំនួន២ទៀត ដែលសំខាន់នោះ គឺទន្លេស្រែពក និងទន្លេសេកុង ដែលបានហូរចូលទន្លេសេសាន មុនជួបប្រសព្វគ្នាជាមួយទន្លេមេគង្គដែរ ។
នៅក្នុងខេត្ដរតនគីរី ទន្លេសេសានបានហូរកាត់ស្រុកចំនួន៤ គឺស្រុកអូរយ៉ាដាវ ស្រុកអណ្ដូងមាស ស្រុកតាវែង និងស្រុកវើនសៃ ដែលនៅតាមដងទន្លេនោះមានជនជាតិភាគតិចជាច្រើនរស់នៅដូចជា ជនជាតិគ្រឹង ព្រៅ ឡាវ កាចក់ ចារ៉ាយ ទំពួន និងកាវ៉េត ជាដើម ។
អ្នកភូមិដែលជាជនជាតិទាំងនោះ ពួកគាត់ពឹងផ្អែកទៅលើធនធានធម្មជាតិស្ទើរតែទាំងស្រុង គឺក្រៅពីធ្វើស្រែចំការដាំស្រូវពួកគាត់ដាំដំណាំពោត សណ្ដែក ដំឡូង ត្រប់ និងរកអនុផលព្រៃឈើខ្លះៗមកចិញ្ចឹមជីវិត និងប្រើប្រាស់ទឹកទន្លេសេសានជាប្រពៃណី។ ទន្លេសេសាននេះក៏ជាប្រភពស្បៀងអាហារ សំរាប់ចិញ្ចឹមជីវិតប្រចាំថ្ងៃរបស់ពួកគាត់ផងដែរ គឺការប្រើប្រាស់សំរាប់ដឹកជញ្ជូន នេសាទ ត្រី ងូតទឹក និងលេងទឹកកំសាន្ដតាមទំនៀមទំលាប់តាំងពីសម័យដើមមក ។ ប៉ុន្ដែនៅក្នុងអំឡុងឆ្នាំ១៩៩៣ ប្រទេសវៀតណាម បានសាងសង់ទំនប់វារីអគ្គិសនីយ៉ាលី ដែលមានកំលាំងថាមពល៧២០មេហ្គាវ៉ាត់ ស្ថិតនៅចំងាយប្រមាណ៨០គីឡូម៉ែត្រពីព្រំដែនប្រទេសកម្ពុជា ។
ក្រោយពីដំណើរការសាងសង់ទំនប់វារីអគ្គិសនីនៅយ៉ាលីប្រទេសវៀតណាមនោះរួចមកបានធ្វើឱ្យលំហូរទឹក និងគុណភាពទឹកទន្លេសេសាន មានការប្រែប្រួល ដូចជាកាលពីឆ្នាំ១៩៩៦ មានទឹកជំនន់យ៉ាងធំ បានកើតឡើងធ្វើឱ្យមានផលប៉ះពាល់ដល់ ប្រព័ន្ធអេកូឡូស៊ីនៅតាមដងទន្លេសេសាននេះ គឺមិនត្រឹមតែបាត់បង់ទ្រព្យសម្បត្ដិ គោ ក្របី ដំណាំកសិកម្មរបស់ប្រជាសហគមន៍ជនជាតិភាគតិចដែលរស់នៅតាមដងទន្លេនោះ ប៉ុណ្ណោះទេ គឺថែមទាំងប៉ះពាល់សុខភាពពួកគាត់យ៉ាងខ្លាំងទៀតផង ដូចជាមានកើតជំងឺ រាករូស កមរមាស និងខូចបរិស្ថានទៀតផង។ ជាពិសេសនោះកាលពីចុងឆ្នាំ២០០៩ ក្នុងអំឡុងចុងខែសីហាដើមខែកញ្ញា ទន្លេសេសានបានជន់លិចស្រុកតាវែង ធ្វើឱ្យប្រជាសហគមន៍ជនជាតិភាគតិចជួបការលំបាកយ៉ាងខ្លាំង និងបាត់បង់ទ្រព្យសម្បត្ដិ គោ ក្របី ស្រូវ ដំណាំផ្សេងៗយ៉ាងធ្ងន់ធ្ងរផងដែរ។
ទន្ទឹមគ្នានេះដែរកន្លងមក រាជរដ្ឋាភិបាលកម្ពុជាមានគំរោងអភិវឌ្ឍន៍ទំនប់វារីអគ្គិសនី ចំនួន៣ នៅតាមដងទន្លេសេសានដើម្បីអភិវឌ្ឍន៍ប្រទេសជាតិ ។ ដោយសារបានទទួលព័ត៌មានក្នុងការអភិវឌ្ឍន៍វារីអគ្គិសនី ប្រជាសហគមន៍ជាច្រើនដែលរស់នៅតាមដងទន្លេសេសាន ទន្លេសេកុង ទន្លេស្រែពក ក្នុងខេត្ដរតនគីរី បាននិងកំពុងមានការព្រួយបារម្ភ ថែមទៀត ព្រោះកន្លងមកគ្រាន់តែប្រទេសវៀតណាមសាងសង់វារីអគ្គិសនីនៅយ៉ាលី ប្រជាសហគមន៍ជួបប្រទះគ្រោះទឹកជំនន់ជារៀងរាល់ឆ្នាំ ។ លោកផែង ក្រុង អាយុ៣៧ឆ្នាំ ជាជនជាតិព្រៅ រស់នៅភូមិតាង៉ាច ឃុំតាវែងក្រោម ស្រុកតាវែង ខេត្ដរតនគីរី បានឱ្យដឹងថា កន្លងមកមានក្រុមការងារជាតិ និងអន្ដរជាតិមួយចំនួនបានចុះមកត្រួតពិនិត្យទន្លេសេសាន ត្រង់ចំណុចខាងក្រោយផ្ទះរបស់គាត់ ហើយគេនិយាយថា នឹងសាងសង់ទំនប់វារីអគ្គិសនីនៅទីនេះ ។
បើពិតដូច្នេះមែនអ្នក ស្រុកតាវែង នឹងជួបគ្រោះទឹកជំនន់លិចលង់ មិនអាចរស់នៅបានឡើយ ហេតុនេះប្រជាសហគមន៍ក្នុងស្រុកតាវែងទាំងមូលបានសំណូមពរឱ្យរាជរដ្ឋាភិបាលពិចារណា និងរកដំណោះស្រាយឱ្យពួកគាត់បានកន្លែងរស់នៅស្រួលផង ។ លោកប៉ាវ ហមផាន អភិបាលខេត្ដរតនគីរី បានមានប្រសាសន៍ថា ការអភិវឌ្ឍន៍សាងសង់ទំនប់វារីអគ្គិសនីកន្លងមកឮតែប្រជាសហគមន៍និយាយប៉ុណ្ណោះ ចំពោះខេត្ដមិនទាន់បានទទួលលិខិតស្នើសុំពីក្រុមហ៊ុនណាមួយនោះទេ ប៉ុន្ដែបើរាជរដ្ឋាភិបាលមានគំរោងអភិវឌ្ឍន៍សាងសង់វារីអគ្គិសនីនៅតាមទន្លេសេសាន ក្នុងខេត្ដរតនគីរីមែននោះ រដ្ឋាភិបាលក៏មិនឱ្យប្រជាសហគមន៍រងគ្រោះនោះដែរ គឺរដ្ឋាភិបាលនឹងរៀបចំទីកន្លែងដែលមាន សុវត្ថិភាពបំផុតឱ្យពួកគាត់រស់នៅ ។ ការអភិវឌ្ឍន៍ប្រទេសជាភារកិច្ចរបស់រដ្ឋាភិបាល ដូច្នេះអ្វីដែលមានការរីកចំរើនសំរាប់ប្រជាជនសំរាប់ប្រទេសជាតិនោះ យើងទាំងអស់គ្នាត្រូវតែចូលរួមអភិវឌ្ឍន៍ទាំងអស់គ្នា ។
