ខេត្តស្វាយរៀង ៖ កាលពីព្រឹកថ្ងៃទី១៩ ឧសភា នៅទីស្នាក់ការគណៈកម្មាធិការបក្សខេត្តមានរៀបចំពិធីបើកយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៣ ក្រោមអធិបតីភាពលោកជំទាវម៉ែន សំអន សមាជិកាគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារគណៈកម្មាធិការកណ្តាលចុះជួយខេត្តស្វាយរៀង ។
ចូលរួមក្នុងពិធីនោះមាន លោកជៀង អំ ប្រធានគណៈកម្មាធិការបក្សខេត្ត លោកម៉ឹង សំផន ប្រធានក្រុមការងារចុះជួយស្រុកចន្ទ្រា ព្រមទាំងសមាជិកសមាជិកាគណបក្សខេត្ត, ក្រុង, ស្រុក, ឃុំ, សង្កាត់ សុបជាង៥.០០០នាក់ ។លោកជៀង អំ បានថ្លែងក្នុងសុន្ទរកថា ឱ្យដឹងថា ក្នុងខេត្តស្វាយរៀងមានសមាជិកសមា ជិកាបក្សសរុបចំនួន២៨៩.២៩៦នាក់ (ស្រី១៥៥.៣៨១នាក់) ស្មើនឹង៧៤,៩១ភាគរយនៃចំនួនអ្នកបោះឆ្នោតសរុបដែលមានឈ្មោះក្នុងបញ្ជីបោះឆ្នោតឆ្នាំ២០១១ ។ បេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៣នេះសរុបមានចំនួន១.១៧១នាក់ (ស្រី២៣៩នាក់) ក្នុងនោះបេក្ខជនពេញសិទ្ធិមាន៥១៨នាក់ (ស្រី១១៦នាក់) ។ លោកបានប្តេជ្ញាថា នៅថ្ងៃទី៣ មិថុនា ខាងមុខនឹងរក្សាការពារឱ្យបាន៤៦០អាសនៈ ឬច្រើនជាងនេះ ។
លោកជំទាវម៉ែន សំអន បានមានមតិសំណេះសំណាលថា សម្តេចទាំង៣ គឺសម្តេចអគ្គមហាធម្មពោធិសាល ជា ស៊ីម, សម្តេចអគ្គមហាសេនាបតីតេជោ ហ៊ុន សែន, សម្តេចអគ្គមហាពញាចក្រី ហេង សំរិន បានផ្តាំផ្ញើសួរសុខទុក្ខ បងប្អូនប្រជាពលរដ្ឋក៏ដូចជាសមាជិកសមាជិកាបក្សទាំងអស់ ហើយសម្តេចទាំង៣បានជូនពរសូមឱ្យបងប្អូនមានសុខភាពល្អ ប្រាជ្ញាឈ្លាសវៃ ជោគជ័យគ្រប់ភារកិច្ច ។ ជាមួយនេះ សម្តេចទាំង៣ក៏បានផ្ញើសេចក្តីទុកចិត្តលើថ្នាក់ដឹកនាំបក្សទាំងអស់ ជាពិសេសអស់លោក ជាបេក្ខជន និងសាខាបក្ស ក្រុមបក្ស ទាំងអស់សូមបំពេញការងារទទួលបានជោគជ័យតាមការប្តេជ្ញាចិត្តរបស់យើង ជាពិសេសថ្ងៃទី១៩ ឧសភា នេះយើងមានសមាជិកសមាជិកាក្រុមបក្សមកចូលរួមក្នុងយុទ្ធនាការចំនួនជាង៥ពាន់នាក់នេះបង្ហាញថា យើងពិតជាមានប្រៀបឈ្នះយ៉ាងពិតប្រាកដ ។ នេះគឺដោយសារអំពើល្អរបស់ថ្នាក់ដឹកនាំគ្រប់លំដាប់ថ្នាក់ ដូច្នេះយើងបន្តប្រពៃណីធ្វើអំពើល្អ ដោយផ្សព្វផ្សាយអំពីគោលនយោបាយរបស់គណបក្សប្រជាជនកម្ពុជាជូនដល់ប្រជាពលរដ្ឋឱ្យបានយល់កាន់តែច្បាស់ ។ គណបក្សប្រជាជនកើតមកពីប្រជាជន ធ្វើការដើម្បីប្រជាជន បោះឆ្នោតជូនគណបក្សប្រជាជន គឺដើម្បីអភិវឌ្ឍន៍ភូមិ-ឃុំរបស់យើង ។
នៅេវលាម៉ោង១០ព្រឹក ក្បួនយុទ្ធនាការឃោសនាបានដង្ហែតាមរថយន្តចេញពីទីស្នាក់ការគណបក្សខេត្ត កាត់តាមរង្វង់មូលឯករាជ្យ ទៅទីស្នាក់ការគណបក្សក្រុងស្វាយរៀង ផ្លូវជាតិលេខ១ កាត់ស្រុកស្វាយទាប ឆ្ពោះទៅកាន់ច្រកទ្វារអន្តរជាតិបាវិត ក្រុងបាវិត ដោយមានរថយន្តតូចធំចំនួន៥០០គ្រឿង ម៉ូតូជាង៣០០គ្រឿង អ្នកចូលរួមសុរប ជាង៥.០០០នាក់ មកពីស្រុក-ក្រុងចំនួន៦ទូទាំងខេត្ត ។ នៅតាមដងផ្លូវ តាមទីប្រជុំជន និងនៅមុខទីស្នាក់ការគណបក្សឃុំ-សង្កាត់ មានប្រជាពលរដ្ឋ និងសមាជិក សមាជិកាបក្សរាប់ពាន់នាក់ឈរចាំអបអរសាទរជាមួយនឹងការស្រែកជយឃោសយ៉ាងកងរំពង ៕
ចែករំលែកព័តមាននេះ