ខេត្តកំពង់ឆ្នាំង ៖ បុរសម្នាក់បានចង.កសម្លាប់ខ្លួន នៅចន្លោះម៉ោង៧ទៅម៉ោង៨យប់ ថ្ងៃទី១៩ ឧសភា នៅផ្ទះរបស់គាត់ ស្ថិតក្នុងភូមិព្រះរាមរង្សី ឃុំជ្រៃបាក់ ស្រុករលាប្អៀរ។
បុរសរូបនោះឈ្មោះឃឹម យឺន អាយុ៦៣ឆ្នាំ មានប្រពន្ធឈ្មោះនូវ ហុត អាយុ៦១ឆ្នាំ ។ ស្ត្រីជាប្រពន្ធបាននិយាយថា ពួកគាត់ទាំងពីរនាក់ប្តីប្រពន្ធពុំមានកូនចៅនោះទេ ។ ប្តីគាត់ជាមនុស្សងងឹតភ្នែកមើលអ្វីមិនសូវច្បាស់ និងជាមនុស្សញៀនស្រាទៀតផង ។ នៅថ្ងៃកើតហេតុ ប្តីបានត្រឡប់ពីផឹកស្រាវិញ ហើយគាត់បានស្តីបន្តោសតិចតួច ធ្វើឱ្យប្តីគាត់ខឹងមិនព្រមពិសាបាយទេ ទោះជាគាត់ហៅយ៉ាងណាក្តី ។ លុះយប់បន្តិចក៏ទៅដេករៀងខ្លួន រហូតដល់ម៉ោងប្រហែល៨យប់ គាត់ក៏ក្រោកទៅមើលប្តីស្រាប់តែឃើញប្តីគាត់ចង.កនឹងក្រមាភ្ជាប់ទៅឃ្នាបផ្ទះស្លាប់បាត់ទៅហើយ ។
អ្នកជិតខាងនិយាយថា បុរសចំណាស់រូបនោះស្រវឹងស្រារាល់ថ្ងៃ គ្មានស្វាងទេ ។ តាមប្រភពក្រៅផ្លូវការបាននិយាយថា បុរសចំណាស់នោះត្រូវប្រពន្ធហៅពិសាបាយ តែប្តីមិនឮ រវល់ស្តាប់វិទ្យុ ពេលនោះប្រពន្ធបានដើរទៅបិទវិទ្យុ ទើបបណ្តាលឱ្យប្តីខឹង ហើយក៏មិនមកពិសាបាយ លុះយប់ឡើងបានចង.កសម្លាប់ខ្លួនតែម្តង ។ មន្ត្រីប៉ូលិសនិយាយថា បុរសចំណាស់នោះពិតជាបានចង.កសម្លាប់ខ្លួនឯងមែន ៕
ចែករំលែកព័តមាននេះ