រាជធានីភ្នំពេញ ៖ អនុវត្តតាមការកំណត់របស់គណៈកម្មាធិការជាតិរៀបចំការបោះឆ្នោត(គ.ជ.ប) នាព្រឹកថ្ងៃទី១៨ ឧសភា ២០១២ គណបក្សនយោបាយទាំង១០ដែលទទួលស្គាល់ដោយគ.ជ.បបានចាប់ផ្តើមបើកយុទ្ធនាការឃោសនារកសំឡេងឆ្នោតគាំទ្រពីប្រជាពលរដ្ឋទៅតាមលទ្ធភាពរៀងៗខ្លួន ។ នៅរាជធានីភ្នំពេញ គេសង្កេតឃើញគណបក្សនយោបាយនានាបានធ្វើការឃោសនាយ៉ាងកងរំពងតាមដងវិថីនានាក្នុងនោះគណបក្សប្រជាជនកម្ពុជាបានជួបជុំ និងចេញឃោសនាលេចធ្លោជាងគេក្នុងចំណោមគណបក្សនយោបាយទាំងអស់ ។
សមាជិក សមាជិកាគណបក្សប្រជាជនកម្ពុជារាជធានីភ្នំពេញ ដឹកនាំដោយលោកកែប ជុតិមា ប្រធានគណៈកម្មាធិការបក្សរាជធានី បានប្រមូលផ្តុំ និងជួបជុំគ្នាទ្រង់ទ្រាយធំនៅមជ្ឈមណ្ឌលកោះពេជ្រ ដែលមានសមាជិក សមាជិកាមកពីបណ្តាសង្កាត់ ខណ្ឌទូទាំងរាជធានីប្រមាណ១ម៉ឺននាក់ និងធ្វើមិទ្ទិញខ្លីមួយ រួចដង្ហែក្បួនចេញ ពីកោះពេជ្រឆ្ពោះទៅតាមបណ្តាសង្កាត់ ខណ្ឌរៀងៗខ្លួន ដោយប្រើប្រាស់មធ្យោបាយរថយន្តចំនួន១៣២គ្រឿង ម៉ូតូប្រមាណ៣ពាន់គ្រឿង ។ ចំណែកឯសមត្ថកិច្ចជាកងកម្លាំងនគរបាល និងកងរាជអាវុធហត្ថវិញ មានការខិតខំប្រឹងប្រែងក្នុងការសម្រួលចរាចរណ៍នៅតាមដងផ្លូវនានាឱ្យគ្រប់គណបក្សដែលបានហែក្បួនឆ្លងកាត់ ។
តាមប្រភពព័ត៌មានពីមន្ត្រី គ.ជ.ប ឱ្យដឹងថា គ.ជ.ប បានប្រកាសទទួលស្គាល់គណបក្សនយោបាយឈរឈ្មោះបោះឆ្នោតមានចំនួន១០ដែលមានបេក្ខជនសរុប១១១.០៥៦នាក់ក្នុងនោះស្ត្រីចំនួន២៨.៤៨១នាក់ ចំពោះសន្លឹកឆ្នោតមាន១.៦៣៣ប្រភេទសម្រាប់១.៦៣៣ឃុំ-សង្កាត់នៅទូទាំងប្រទេស ។ សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៣នេះ ការឃោសនាមានរយៈពេល១៥ថ្ងៃ គិតចាប់ពីថ្ងៃទី១៨ ឧសភា ដល់ថ្ងៃទី១ មិថុនា ឆ្នាំ២០១២ ហើយថ្ងៃទី៣ មិថុនា ឆ្នាំ២០១២ ជាថ្ងៃបោះឆ្នោត ។
មន្ត្រី គ.ជ.ប ដដែលបានបញ្ជាក់ថា គណបក្សនយោបាយទាំង១០នោះបានដាក់បេក្ខជនរបស់ខ្លួនចូលរួមប្រកួតប្រជែងយកតំណែងក្រុមប្រឹក្សាឃុំ-សង្កាត់អាណត្តិទី៣ នេះមាន គណបក្សប្រជាជនកម្ពុជាដាក់នៅគ្រប់ឃុំ-សង្កាត់ទូទាំងប្រទេសចំនួន១.៦៣៣ឃុំ-សង្កាត់ គណបក្សសម រង្ស៊ី ១.៦១៥ឃុំ-សង្កាត់ គណបក្សហ៊្វុនស៊ីនប៉ិច ១.៤១៣ឃុំ-សង្កាត់ គណបក្សនរោត្តម រណឫទ្ធិ ១.០២៩ឃុំ-សង្កាត់ គណបក្សសិទ្ធិមនុស្ស ១.០៧០ឃុំ-សង្កាត់ គណបក្សសម្ព័ន្ធដើម្បីប្រជាធិបតេយ្យ១៦៤ឃុំ គណបក្សសាធារណរដ្ឋប្រជាធិបតេយ្យ៩ឃុំ គណបក្សសញ្ជាតិកម្ពុជា២២៥ឃុំ គណបក្សចលនាប្រជាធិបតេយ្យ២ឃុំ និងគណបក្សខ្មែរឈប់ក្រ ដាក់បេក្ខភាពរបស់ខ្លួន២៣ឃុំ-សង្កាត់ ។
ចំណែកបទបញ្ជាផ្ទៃក្នុង ក្នុងការឃោសនារកសំឡេងឆ្នោតនេះ គ.ជ.ប បានធ្វើការណែនាំដល់គណបក្សនយោបាយទាំងអស់ ហាមប្រើប្រាស់មធ្យោបាយដឹកជញ្ជូនដែលជាសម្បត្តិរបស់រដ្ឋដើម្បីធ្វើការឃោសនា ហាមប្រើឯកសណ្ឋានការងារធ្វើយុទ្ធនាការ ហាមប្រើប្រាស់ឧបករណ៍បំពងសំឡេងចាប់ពីម៉ោ១២ថ្ងៃត្រង់ដល់ម៉ោង២រសៀលជាដើម ។
នៅក្នុងពិធីបើកយុទ្ធនាការហែក្បួនរបស់គណបក្សប្រជាជនរាជធានីភ្នំពេញ លោកកែប ជុតិមាប្រធានគណៈកម្មាធិការបក្សដែលដឹកនាំហែក្បួនបានលើកឡើងថា ជាង៣៣ឆ្នាំមកនេះគណបក្សប្រជាជនកម្ពុជាដឹកនាំដោយសម្តេចទាំងបីបានផ្សារភ្ជាប់រួមសុខរួមទុក្ខជាមួយប្រជាជនជានិច្ចនៅគ្រប់កាលៈទេសៈ ពុះពារដឹកនាំឆ្លងកាត់រាល់ឧបសគ្គ និងការលំបាកសព្វបែបយ៉ាងតាំងពីដំណាក់កាលសង្គ្រោះជាតិ ពីរបបប្រល័យពូជសាសន៍ប៉ុល ពត ចេញពីចំណុចសូន្យ កសាងទឹកដីឡើងវិញ រហូតដល់ដំណាក់កាលសន្តិភាពបង្រួបបង្រួមជាតិប្រជាធិបតេយ្យនិងអភិវឌ្ឍន៍រហូតដល់ពេលបច្ចុប្បន្ននេះ ។ មិនតែប៉ុណ្ណោះសម្តេចតេជោ ហ៊ុន សែន បានលើកស្ទួយកិត្យានុភាពប្រទេសជាតិ និងប្រជាជនកម្ពុជាឱ្យមានភាពល្បីរន្ទឺរុងរឿងនៅលើឆាកអន្តរជាតិទៀត ផង ។
ដោយឡែកគណបក្សប្រជាជនកម្ពុជាខណ្ឌប្ញស្សីកែវ បន្ទាប់ពីជួបជុំគ្នានៅកោះពេជ្រ ក៏បានដង្ហែជាក្បួននៅតាមមូលដ្ឋានរបស់ខ្លួន ដើម្បីស្វែងរកសំឡេងគាំទ្រ ដោយមានសមាជិកសមាជិកាបក្សចូលរួមប្រមាណ១.៦០០នាក់ ក្នុងនោះមានរថយន្តចំនួន៦០គ្រឿង និងម៉ូតូចំនួន៥០០គ្រឿង ដែលដឹកនាំដោយលោកឃ្លាំង ហួត ប្រធានគណៈកម្មាធិការបក្សខណ្ឌប្ញស្សីកែវ លោកស្រីទូច សារ៉ុម អនុប្រធានក្រុមការងារចុះជួយខណ្ឌប្ញស្សីកែវ និងលោកឧកញ៉ាអូស្មាន ហាស្សាន់ អនុប្រធានក្រុមការងារចុះជួយខណ្ឌប្ញស្សីកែវ ព្រមទាំងក្រុមការងារជាច្រើនរូបទៀត។
ក្បួនគណបក្សប្រជាជនកម្ពុជាខណ្ឌ បានដង្ហែចេញពីកោះពេជ្រឆ្ពោះមកផ្លូវជាតិលេខ៥ ឆ្លងកាត់តាមសង្កាត់នានារហូតដល់ស្ពានព្រែកព្នៅ និងត្រឡប់មកវិញតាមផ្លូវលេខ៥៩៨ មកអង់តែនទូរទស្សន៍ជាតិ ហើយឆ្លងកាត់តាមផ្លូវលំនានាក្នុងសង្កាត់ទួលសង្កែ និងបានបំបែកគ្នានៅវេលាម៉ោង១១ព្រឹកនៅតាមផ្លូវជាតិលេខ៥ ។ នៅក្នុងការដង្ហែជាក្បួន ក៏មានរថយន្តប្រគំតន្ត្រីអមដំណើរក្បួនតាមដងផ្លូវ និងមានសមាជិកសមាជិកាប្រគំតន្ត្រី និងអបអរសាទរយ៉ាងសប្បាយរីករាយនៅតាមដងផ្លូវ ហើយឮសូរតែសំឡេងទះដៃហ៊ោកញ្ច្រៀវស្វាគមន៍អបអរសាទរ ។
ដោយឡែកនៅក្នុងខណ្ឌទួលគោកវិញ គណបក្សប្រជាជនកម្ពុជាខណ្ឌ ក៏បានបើកយុទ្ធនាការឃោសនាដូចគ្នានេះដែរ ។ គណៈកម្មាធិការបក្សខណ្ឌទួលគោកបានដង្ហែជាក្បួនឃោសនាដោយមានសមាជិកសមាជិកាចូលរួមចំនួន៧២០នាក់មកពីសង្កាត់ទាំង១០ ក្នុងនោះមានរថយន្តចំនួន២៤គ្រឿង និងម៉ូតូ២១០គ្រឿង ។ ក្រៅពីនេះ ក៏មានសមាជិកសមាជិកាចំនួនជាង១.០០០នាក់ចូលរូមគាំទ្រតាមដងផ្លូវនៅតាមសង្កាត់ ដោយបែងចែកជា២គោលដៅ និងមានការប្រគំតន្ត្រីកំដរចំនួន២គោលដៅគឺនៅមុខអង់តែនទូរទស្សន៍ជាតិ និងនៅមុខវិទ្យាល័យជា ស៊ីម សាមគ្គី ។ ការដង្ហែជាក្បួនរបស់សមាជិក សមាជិកាគណបក្សប្រជាជនកម្ពុជាខណ្ឌទួលគោកនេះ ដឹកនាំដោយលោកឧត្តមសេនីយ៍នាង ផាត ប្រធានក្រុមការងារចុះជួយខណ្ឌទួលគោក និងលោកសេង រតនៈ ប្រធានគណៈកម្មាធិការបក្សខណ្ឌទួលគោក។
ចំពោះគណបក្ស សម រង្ស៊ី នៅរាជធានីភ្នំពេញក៏មានបើកយុទ្ធនាការគគ្រឹកគគ្រេងដែរ ប៉ុន្តែមិនធំដុំប៉ុន្មានទេ បើប្រៀបធៀបជាមួយគណបក្សប្រជាជនកម្ពុជា ។ រីឯគណបក្សសិទ្ធិមនុស្សក៏មានក្បួនដង្ហែបង្ហាញឥទ្ធិពលដូចគេដែរ ដោយមានទ្រង់ទ្រាយតូចល្មមសមតាមមាឌ មិនគគ្រឹកគគ្រេងពេកទេ ដោយហែចេញពីតំបន់ត្រឡោកបែកកាត់តាមវិថីនានា ។
ទោះជាយ៉ាងណាក៏ដោយ ការបើកយុទ្ធនាការឃោសនាសម្តែងឫទ្ធានុភាពថ្ងៃទី១នេះនៅរាជធានី មិនឃើញមានបាតុភាពហឹង្សាណាមួយកើតមានទេ ហើយក៏អត់មានបង្កឱ្យស្ទះចរាចរណ៍គួរឱ្យកត់សម្គាល់ដែរ ព្រោះអាជ្ញាធររាជធានីភ្នំពេញរបស់លោកកែប ជុតិមា ត្រៀមកម្លាំងរួចជាស្រេច ធ្វើឱ្យបរិយាកាសនៃយុទ្ធនាការរបស់គណបក្សទាំង៣ប្រព្រឹត្ត យ៉ាងទៅរលូន ។
សមាជិក សមាជិកា គណបក្សប្រជាជនកម្ពុជាទាំង១១សង្កាត់ នៅក្នុងខណ្ឌដូនពេញ បានបើកយុទ្ធនាការឃោសនារកសំឡេងឆ្នោតដឹកនាំដោយលោកសុខ សម្បត្តិ ប្រធានគណៈកម្មាធិការគណបក្សប្រជាជនកម្ពុជា ខណ្ឌដូនពេញ កាលពីព្រឹកថ្ងៃទី១៨ ឧសភា ឆ្នាំ២០១២ ។
លោកសុខ សម្បត្តិ បានមានប្រសាសន៍ថា នៅក្នុងយុទ្ធនាការរកសំឡេងឆ្នោតសម្រាប់ការបោះឆ្នោតក្រុមប្រឹក្សាសង្កាត់ ដែលជាថ្ងៃដំបូងនេះ មានសមាជិក សមាជិកាចំនួន១.០០០នាក់ចូលរួមឃោសនា និង៤៥០នាក់ទៀតឈរតាមដងវិថីចំនួន៦ទីតាំងដើម្បីអបអរសាទរដោយមានរថយន្ត១៣០គ្រឿងព្រមទាំងម៉ូតូ៥០០គ្រឿងអមដំណើរផងដែរ ។ លោកប្រធានគណបក្សខណ្ឌដូនពេញក្រៅពីលើកឡើងនូវស្នាដៃជាច្រើននិងសមិទ្ធផលនានារបស់គណបក្សប្រជាជនកម្ពុជា ក៏បានអំពាវនាវឲ្យសមាជិក សមាជិកាទាំងអស់ទៅចូលរួមបោះឆ្នោតឲ្យបានគ្រប់ៗគ្នា ។
លោកគួច ចំរើន ប្រធានគណៈកម្មាធិការគណបក្សប្រជាជនកម្ពុជាខណ្ឌមានជ័យ ក៏បានចូលរួមដង្ហែក្បួនឃោសនាទៅជួបជុំគ្នានៅមជ្ឈមណ្ឌលកោះពេជ្រ រួចត្រឡប់មកក្នុងមូលដ្ឋានវិញ តាមបណ្តោយផ្លូវជាតិលេខ២ ។ ពេលដង្ហែក្បួននោះបានជួបគ្នាជាមួយក្បួនឃោសនារបស់គណបក្សសម រង្ស៊ីដែលហែត្រឡប់មកពីក្រុងតាខ្មៅវិញក្នុងទិសដៅពីត្បូងទៅជើង ហើយក្បួនគណបក្សប្រជាជនកម្ពុជាហែឃោសនាលើផ្លូវជាតិលេខ២ក្នុងទិសដៅពីជើងទៅត្បូងម្ខាងម្នាក់ ។ ប៉ុន្តែអ្វីជាការកត់សម្គាល់នោះ គឺគណបក្សធំទាំង២មិនបានធ្វើអ្វីឱ្យរំខានដល់ក្បួនឃោសនារបស់គណបក្សផ្សេងឡើយ ។
លោកគួច ចំរើន និងសមាជិក សមាជិកាទាំងអស់បានស្រែកជយឃោសក្នុងការដណ្តើមជ័យជម្នះនាថ្ងៃបោះឆ្នោតខាងមុខ ។ លើសពីនេះទៀតសមាជិក សមាជិកាទាំងអស់បានសម្តែងការគាំទ្របេក្ខភាពសម្តេចតេជោហ៊ុន សែន ជានាយករដ្ឋមន្ត្រីក្នុងអាណត្តិថ្មីបន្តទៀត។
នៅខណ្ឌ៧មករា ក៏មានការជួបជុំគ្នានៅទីស្នាក់ការគណបក្សប្រជាជនដែរ ដោយមាន រថយន្តតុបតែងសម្រាប់ឃោសនារកសំឡេងឆ្នោតចំនួន១០គ្រឿង និងរថយន្តមិនតុបតែងមួយចំនួនទៀត ម៉ូតូអមដំណើរចំនួន២៤០គ្រឿង ក្នុងនោះមកពីក្រុមការងារបក្ស១សង្កាត់៣០០គ្រឿង និងមានសមាជិក សមាជិកាចូលរួម៦៣០នាក់ ។ ក្បួនបានដង្ហែចេញពីទីស្នាក់ការគណបក្សក្នុងសង្កាត់បឹងព្រលឹតតាមបណ្តោយមហាវិថីព្រះមុនីរ៉េត ដល់ស្ពានស្ទឹងមានជ័យ ទើបត្រឡប់ទៅមូលដ្ឋានរបស់ខ្លួនវិញ ហើយបានរំសាយនៅផ្លូវហ្សាលដឺហ្គោល ។
ពិធីនោះដឹកនាំដោយលោក សោម សុវណ្ណ គណៈអភិបាលខណ្ឌ៧មករា ព្រមទាំងសាខាគណៈពង្រឹងបក្សប្រជាជនកម្ពុជា សង្កាត់ ខណ្ឌ ទាំងមូល ។
ខេត្តកំពង់ចាម៖យុទ្ធនាការឃោសនារកសំឡេងឆ្នោតរបស់ក្រុមប្រឹក្សាឃុំ-សង្កាត់ ដែលបានប្រព្រឹត្តទៅនៅព្រឹកថ្ងៃទី១៨ ឧសភា ២០១២ គេសង្កេតឃើញគណបក្សប្រជាជនកម្ពុជា បានដង្ហែក្បួនតាមម៉ូតូនិងរថយន្តតាមផ្លូវសំខាន់ៗនានាក្នុងក្រុងកំពង់ចាម និងមានភាពអធិកអធមជាងគេក្នុងចំណោមគណបក្សផ្សេងៗទៀត។ ជាមួយនោះដែរ កម្លាំងសមត្ថកិច្ចត្រូវបានដាក់ពង្រាយពីកន្លែងមួយទៅកន្លែងមួយ ដើម្បីការពារ និងសម្រួលដល់ការដង្ហែក្បួនរបស់គណបក្សមិនឲ្យមានការកកស្ទះដោយប្រការណាមួយនោះទេ ហើយក៏មិនមានលេចឮមានបញ្ហាអ្វីកើតឡើងដែរ ។
តាមលោកចេង សុខា ប្រធានគណៈកម្មាធិការបក្សប្រជាជនកម្ពុជាសង្កាត់វាលវង់ មានប្រសាសន៍ថា កាលពីវេលាម៉ោង៧ព្រឹកថ្ងៃខាងលើ សមាជិក និងសកម្មជនយុវជនរបស់គណបក្សប្រជាជនកម្ពុជាប្រមាណជិត៨០០នាក់ បានមកជួបជុំគ្នានៅស្នាក់ការគណបក្សប្រជាជនវាលវង់ រួចបានដង្ហែចេញទៅជួបជុំគ្នានៅទីលានសាធារណៈ ស្ថិតនៅក្បែរគរុកោសល្យខេត្ត ដោយមានការចូលរួមពីសមាជិក សមាជិកាសង្កាត់កំពង់ចាម សង្កាត់បឹងកុក សង្កាត់សំបួរមាស សរុបទាំងអស់ប្រហែលជា២.០០០នាក់ ។
លោកវរសេនីយ៍ត្រីសំ ផាត អធិការនគរបាលក្រុងកំពង់ចាម មានប្រសាសន៍ថា នៅក្នុងយុទ្ធនាការឃោសនារកសំឡេងឆ្នោត សម្រាប់ថ្ងៃដំបូងនេះ ឃើញមាន១-គណបក្សប្រជាជនមកពីបណ្តាសង្កាត់ទាំង៤មានសមាជិកចូលរួមដង្ហែរហូតដល់ទៅ២០០០នាក់ ២-គណបក្សនរោត្តម រណឫទ្ធិ មានគ្នាតែ៥នាក់ ជិះរ៉ឺម៉កម៉ូតូ១គ្រឿង ៣-គណបក្សសិទ្ធិមនុស្សមានចំនួន២០នាក់ ៤-គណបក្សហ៊្វុនស៊ិនប៉ិច មានរឺុម៉កម៉ូតូ១គ្រឿងដែរ។ មិនមានសភាពការណ៍អ្វីកើតឡើងនោះទេ ដោយមានកម្លាំងនគរបាលបានដាក់ពង្រាយនៅតាមគោលដៅផ្លូវសំខាន់ៗក្នុងក្រុងកំពង់ចាម ។
សូមបញ្ជាក់ផងដែរ ការដង្ហែក្បួនឃោសនារកសំឡេងឆ្នោតរបស់គណបក្សនៅក្នុងខេត្តព្រះវិហារនាអាណត្តិនេះមានចំនួន៥ ក្នុងនោះរួមមាន គណបក្សប្រជាជនកម្ពុជា គណបក្សសិទ្ធិមនុស្ស គណបក្សសម រង្ស៊ី គណបក្សហ្វុ៊នស៊ិនប៉ិច និងគណបក្សនរោត្តម រណឫទ្ធិ ។ ចំណែកឯសកម្មភាពឃោសនារកសំឡេងឆ្នោតរបស់គណបក្សនីមួយៗនៅទូទាំងខេត្តព្រះវិហារ នាថ្ងៃដំបូងនេះមិនមានផ្ទុះអំពើហិង្សាអ្វីឡើយ ។
ខេត្តបាត់ដំបង ៖ ក្បួនដង្ហែឃោសនារកសំឡេងឆ្នោតរបស់គណបក្សប្រជាជនកម្ពុជាក្នុងស្រុកសង្កែមានសមាជិក សមាជិកាចូលរួមជាង៣ពាន់នាក់ ដឹកនាំដោយលោកឡោក ហ៊ួរ ។ ក្រោយពីក្បួនដង្ហែរបស់គណបក្សប្រជាជនបានត្រឡប់វិញប្រហែលកន្លះម៉ោង ក្បួនគណបក្សសមរង្ស៊ីមានមនុស្សប្រហែល៣រយនាក់បានដង្ហែពីផ្សារមកកាត់តាមតាដំបងគ្រញូងដោយឃើញមានលោកស្រីមូរ សុខហួ ឈរនៅលើរថយន្តលើកដៃសំពះប្រជាពលរដ្ឋជាផងដែរ ។
ក្នុងក្បួនដង្ហែប្រហែលជាងមួយម៉ោងនេះគេឃើញមានប៉ូលិស ប៉េអឹម ជួយរៀបចំសណ្តាប់ធ្នាប់តាមផ្លូវកុំឲ្យមានការកកស្ទះ។ ដោយឡែកគណបក្សហ្វុនស៊ិនប៉ិចមានទីស្នាក់ការនៅខាងត្បូងតាដំបងគ្រញូងនោះ គ្មានមនុស្សមកចូលរួមឡើយ ហើយក៏គ្មានសកម្មភាពអ្វី
ដែរ ។
ខេត្តកំពង់ស្ពឺ ៖ លោកធម្ម គីម អនុប្រធានគណៈកម្មការរៀបចំការបោះឆ្នោតខេត្ត បានឱ្យដឹងថា គណបក្សដែលចុះឈ្មោះចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់មានចំនួន៨គណបក្សនៅក្នុងខេត្តកំពង់ស្ពឺ-គឺ១-គណបក្សប្រជាជនកម្ពុជា ២-គណបក្សសម រង្ស៊ី ៣-គណបក្សសិទ្ធិមនុស្ស ៤-គណបក្សនរោត្តម រណឫទ្ធិ ៥-គណបក្សហ៊្វុនស៊ិនប៉ិច ៦-គណបក្សសម្ព័ន្ធដើម្បីប្រជាធិបតេយ្យ ៧-គណបក្សសញ្ជាតិកម្ពុជា ៨-គណបក្សខ្មែរឈប់ក្រ ។ លោកបន្តថា នៅវេលាព្រឹកថ្ងៃដំបូងនៃយុទ្ធនាការឃោសនារកសំឡេងឆ្នោតនេះ គេសង្កេតឃើញមានតែគណបក្សប្រជាជនកម្ពុជាទេ និងចេញក្បួនដង្ហែតាមគ្រប់ស្រុក-ក្រុងក្នុងខេត្ត ។ ចំណែកគណបក្សផ្សេងៗពុំទាន់ឃើញចេញឃោសនាបានខ្លាំងក្លានៅឡើយទេ ។
នៅឯស្រុកសំរោងទង លោកហង្ស សុភាព ប្រធានដឹកនាំក្បួនដង្ហែឃោសនានារបស់គណបក្សប្រជាជនព្រឹកនោះបានឱ្យដឹងថា ក្នុងស្រុកសំរោងទងយុទ្ធនាការដង្ហែក្បួនឃោសនាថ្ងៃដំបូងមានសមាជិក សមាជិកាចូលរួមចំនួន១.២០០នាក់ មានរថយន្តដង្ហែ៨៥គ្រឿង ម៉ូតូ២២៥គ្រឿង និងមីក្រូ១៧គ្រឿង ។
ខេត្តពោធិ៍សាត់ ៖ សមាជិកសមាជិកាគណបក្សប្រជាជនកម្ពុជាខេត្តពោធិ៍សាត់យ៉ាងច្រើនសន្ធឹកសន្ធាប់ បានមកចូលរួមក្នុងពិធីដង្ហែក្បួនយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៣ នាព្រឹកថ្ងៃទី១៨ ឧសភា ២០១២ ដែលប្រារព្ធធ្វើនៅស្នាក់ការធំគណបក្សប្រជាជនកម្ពុជាខេត្ត ក្រោមអធិបតីភាពលោកស៊ុយ សែម សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារចុះជួយខេត្តពោធិ៍សាត់ និងលោកជំទាវ ។
លោកខូយ សុខា អនុប្រធានគណៈកម្មាធិការបក្សប្រជាជនកម្ពុជាខេត្តបានជម្រាបជូនថា សមាជិកសមាជិកាដែលមកចូលរួមថ្ងៃនេះមានចំនួន៧.៥៦០នាក់ មកពីក្រុងពោធិ៍សាត់ ស្រុកក្រគរ ស្រុកកណ្តៀង ស្រុកបាកាន និងស្រុកភ្នំក្រវាញ លើកលែងតែស្រុកវាលវែងមួយនៅឆ្ងាយ គឺរៀបចំធ្វើនៅទីនោះតែម្តង ក្នុងថ្ងៃជាមួយគ្នានេះដែរ ។
បន្ទាប់ពីពិធីបង្ហោះប៉េងប៉ោងរួចមក ក្បួនរថយន្តទាំងតូចទាំងធំជាង៣០០គ្រឿងដោយមានបិទបដាពាក្យស្លោករូបសញ្ញាគណបក្ស រូបសម្តេចជាស៊ីម សម្តេចហេង សំរិន និងសម្តេចហ៊ុន សែន ដែលជាមេដឹកនាំរបស់គណបក្សប្រជាជនកម្ពុជា បានចាប់ផ្តើមដង្ហែចេញពីកន្លែងប្រារព្ធពិធីឡើងមកផ្លូវជាតិលេខ៥ឆ្ពោះទៅទីរួមខេត្តយ៉ាងមានរបៀបរៀបរយ ដោយសមាជិកសមាជិកានីមួយៗ ពាក់អាវ និងមួកពណ៌ផ្កាឈូកមានរូបសញ្ញាទេវតាបាចផ្កា និងសរសេរអក្សរដាក់ថា គណបក្សប្រជាជនកម្ពុជា ។
ខេត្តរតនគិរី ៖ ក្នុងការបោះឆ្នោតក្រុមប្រឹក្សាឃុំ-សង្កាត់លើកនេះ មានគណបក្សចំនួន៣ចូលរួម និងបានចាប់ផ្តើមឃោសនាដោយដង្ហែក្បួន និងប្រមូលផ្តុំនៅព្រឹកថ្ងៃទី១៨ ឧសភា។ សមាជិកសមាជិការបស់គណបក្សនីមួយៗ មានកាន់បដា និងឯកសណ្ឋានសម្គាល់របស់គណបក្សរៀងៗខ្លួន ។ ក្បួនដង្ហែរបស់គណបក្សប្រជាជនកម្ពុជា មានសមាជិកសមាជិកាចូលរួមច្រើនជាងគេ និងបានធ្វើពិធីដង្ហែក្បួនយ៉ាងអធិកអធមមានចាក់បទចម្រៀងឃោសនា និងសិល្បៈរាំច្រៀងអមជាមួយផងដែរ ។ គណបក្សដែលឈរឈ្មោះនៅខេត្តរតនគិរី មាន១ -គណបក្សប្រជាជនកម្ពុជា មានរថយន្តចំនួន១០៧គ្រឿង ម៉ូតូ៧០គ្រឿង សមាជិកសមាជិកាចូលរួមចំនួន៨០០នាក់ ធ្វើការដង្ហែក្បួនតាមសង្កាត់ទាំង៤ ក្នុងក្រុងបានលុង ។ ២-គណបក្សសមរង្ស៊ី មានរថយន្ត១គ្រឿង និងម៉ូតូ៥គ្រឿង សមាជិកសមាជិកាចំនួន១៥នាក់ ដង្ហែចេញពីទីស្នាក់ការគណបក្សសមរង្ស៊ី ស្ថិតនៅក្នុងភូមិ៧មករា ក្នុងសង្កាត់ឡាបានសៀក ក្រុងបានលុង ឆ្ពោះទៅជុំវិញក្រុងបាលុងដោយមានបាចខិត្តប័ណ្ណឃោសនារបស់គណបក្ស ។ ៣-គណបក្សហ៊្វុនស៊ិនប៉ិច បានធ្វើការជួបជុំគ្នានៅក្នុងភូមិអភិវឌ្ឍន៍ ដោយដាក់តុអង្គុយប្រមូលផ្តុំគ្នាចាក់មីក្រូឃោសនាមួយកន្លែងពុំបានធ្វើការដង្ហែក្បួន ដែលមានសមាជិកសមាជិកាចូលរួមចំនួន១០នាក់។
ខេត្តកំពត ៖ តាមក្រុមមន្ត្រីឱ្យដឹងថា មានគណបក្សនយោបាយចំនួន៨ឈរឈ្មោះបោះឆ្នោតក្រុមប្រឹក្សាឃុំ-សង្កាត់សម្រាប់អាណត្តិទី៣នេះនៅខេត្តកំពត ។ ដោយឡែកនៅក្រុងកំពត មានគណបក្សនយោបាយឃោសនារកសំឡេងឆ្នោតតែ៥ទេ ។ តាមការពិនិត្យជារួម នៅក្នុងក្រុងកំពត នៅក្នុងយុទ្ធនាការឃោសនាបោះឆ្នោតក្រុមប្រឹក្សាឃុំ-សង្កាត់ នាថ្ងៃទី១នេះ ពុំទាន់ឃើញគណបក្សនយោបាយណាមួយ បើកយុទ្ធនាការដង្ហែក្បួនតាមរថយន្ត ឬដើរដង្ហែក្បួននៅឡើយទេ គឺគណបក្សនីមួយៗ គ្រាន់តែចាក់មីក្រូឃោសនានៅតាមទីស្នាក់ការរបស់គណបក្សខ្លួនប៉ុណ្ណោះ ។
ដោយឡែកគណបក្សប្រជាជនកម្ពុជា នៅព្រឹកថ្ងៃទី១៨ ឧសភា នោះ គេឃើញមានសមាជិកសមាជិកាជាច្រើនបានមកជួបជុំគ្នាអស់រយៈពេលជាងមួយម៉ោងនៅក្នុងបរិវេណមុខវេទិការង្វង់មូលទុរេនកំពត ដើម្បីស្តាប់មតិសំណេះសំណាលពីអ្នកតំណាងរាស្ត្រមណ្ឌលកំពត៕
ចែករំលែកព័តមាននេះ