ខេត្តក្រចេះ ៖ លោក សរ ចំរ៉ុង អតីតអភិបាលរងខេត្តក្រចេះ ត្រូវបានប្រកាសតែងតាំងមុខតំណែងជាអភិបាលនៃគណៈអភិបាលខេត្តក្រចេះថ្មី កាលពីរសៀលថ្ងៃទី១៧ ឧសភា នៅសាលមហោស្រពខេត្ត ក្រោមអធិបតីភាពលោកទេសរដ្ឋមន្ត្រី អ៊ឹម ឈុនលឹម រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាតំណាងដ៏ខ្ពស់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
លោកសរ ចំរ៉ុង អតីតអភិបាលរងខេត្តបន្ទាយមានជ័យ ហើយបានមកកាន់មុខតំណែងជាអភិបាលរងខេត្តក្រចេះក្នុងរយៈពេលជាងមួយឆ្នាំមុន និងត្រូវបានប្រកាសមុខតំណែងជាអភិបាលនៃគណៈអភិបាលខេត្តក្រចេះនៅថ្ងៃទី១៧ ឧសភា ក្រោយពេលលោកខាំ ភឿន អតីតអភិបាលខេត្ត បានទទួលមរណភាពក្នុងឧប្បត្តិហេតុគ្រោះថ្នាក់ចរាចរណ៍ដោយក្រឡាប់រថយន្ត កាលពី១០ថ្ងៃមុននេះ។
បន្ទាប់ពីមានការឡើងប្តេជ្ញាចិត្តពីសំណាក់លោក សរ ចំរ៉ុង អភិបាលខេត្តថ្មីរួចមក លោកទេសរដ្ឋមន្ត្រី អឹុម ឈុនលឹម រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ជាតំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា កន្លងមកការខិតខំប្រឹងប្រែងរបស់សពលោក ខាំ ភឿន អតីតអភិបាលខេត្តបានបង្ហាញពីការយកចិត្តទុកដាក់យ៉ាងសកម្ម ក្នុងការចូលរួមដឹកនាំគ្រប់គ្រង និងអភិវឌ្ឍន៍ខេត្ត ក៏ដូចជាប្រទេសជាតិ ជាពិសេសការងារ និងសមិទ្ធផលសំខាន់ៗជាច្រើនដែលបានរួមចំណែកជាមួយរាជរដ្ឋាភិបាល និងប្រជាពលរដ្ឋទូទាំងខេត្តក្រចេះ ។
លោកទេសរដ្ឋមន្ត្រីបានសម្តែងសេចក្តីសង្ឃឹមថា លោកអភិបាលខេត្តដែលទើបឡើងកាន់តំណែងថ្មីនេះ នឹងខិតខំប្រឹងប្រែងប្រមូលបទពិសោធន៍បញ្ញាញាណ និងកម្លាំងកាយចិត្ត ដើម្បីរួមជាមួយក្រុមប្រឹក្សាខេត្ត និងមន្ត្រីរាជការគ្រប់លំដាប់ថ្នាក់នៅក្នុងខេត្តក្រចេះ ដោយសហការគ្នាយ៉ាងជិតស្និទក្នុងការអភិវឌ្ឍខេត្តនេះ ឱ្យកាន់តែមានការរីកចម្រើនបន្ថែមទៀត ៕
ចែករំលែកព័តមាននេះ