ខេត្តពោធិ៍សាត់ ៖ តាមការផ្តល់ព័ត៌មានពីប៉ូលិសខេត្តពោធិ៍សាត់ឱ្យដឹងថា កាលពីថ្ងៃទី១៦ ឧសភា វេលាម៉ោង៥និង២៥នាទីល្ងាច ក្មេងប្រុសម្នាក់ដែលមានអាយុទើបតែ១ឆ្នាំ៤ខែ បានលង់ទឹកពាងស្លាប់ខណៈពេលម្តាយរវល់លាងចាន ។ ករណីនេះបានកើតឡើងនៅភូមិអូរស្រាវឃុំព្រងិល ស្រុកភ្នំក្រវាញ ។
មន្ត្រីប៉ូលិសឱ្យដឹងថា នៅថ្ងៃនោះម្តាយបានប្រមូលចានលាងនិងបោកខោអាវ ហើយទុកកូនប្រុសតូចអាយុ១ឆ្នាំ៤ខែឱ្យដើរលេងតេះតះក្រោមផ្ទះក្បែរនោះដែរ ។ ខណៈពេលម្តាយកំពុងលាងចាននិងបោកខោអាវនោះ កូនប្រុសតូចបានទៅឡើងធ្លាក់ចូលក្នុងពាងទឹកមួយផ្សេងទៀតចម្ងាយពីគ្នាប្រហែល១០ម៉ែត្រក៏លង់ទឹកស្លាប់បាត់ទៅ ។ ប្រហែល១០នាទីក្រោយទើបម្តាយនឹកឃើញបាត់សំឡេងកូនក៏ដើររក ស្រាប់តែទៅឃើញក្នុងពាងទឹក ប៉ុន្តែពេលស្រង់ចេញមកអ្វីៗហួសពេលទៅហើយ បានត្រឹមតែស្រែកយំបោកខ្លួននិងមានវិប្បដិសារីអស់មួយជីវិតប៉ុណ្ណោះ ។
ដោយឡែកនៅថ្ងៃទី១៧ ឧសភា ២០១២ វេលាម៉ោង៥និង៣០នាទីព្រឹក កម្មករវារីអគ្គិសនីម្នាក់នៅទំនប់ទី៣ ស្ថិតក្នុងភូមិឆាយលូក ឃុំអូរសោម ស្រុកវាលវែងបានត្រូវចរន្តអគ្គិសនីឆក់ស្លាប់ខណៈពេលតខ្សែភ្លើងបូមទឹក ។ជនរងគ្រោះដែលស្លាប់ជាជនជាតិខ្មែរ ឈ្មោះស៊ុម ស៊ីម អាយុ៣៦ឆ្នាំ មានទីលំនៅភូមិមាក់ប្រាង ឃុំបឹងសាលា ស្រុកកំពង់ត្រាច ខេត្តកំពត មកធ្វើកម្មករវារីអគ្គិសនីនៅស្ទឹងអាតៃ ខេត្តពោធិ៍សាត់ ។ នៅព្រឹកព្រលឹមនោះ ជនរងគ្រោះបានតខ្សែភ្លើងដើម្បីបូមទឹក ប៉ុន្តែមិនដឹងថាតខុសបច្ចេកទេសឬក៏ភ្លាត់ស្នៀតយ៉ាងម៉េចក៏ត្រូវចរន្តអគ្គិសនីឆក់ស្លាប់តែម្តង ។
ការស្លាប់ក្មេងតូចអាយុ១ឆ្នាំ៤ខែជាការធ្វេសប្រហែសរបស់ស្ត្រីជាម្តាយ ឯស្លាប់កម្មករវារីអគ្គិសនីជាការធ្វេសប្រហែសដោយខ្លួនឯង៕
ចែករំលែកព័តមាននេះ