ខេត្តបន្ទាយមានជ័យ ៖ នគរបាលក្រុងសិរីសោភ័ណ សហការជាមួយនគរបាលការិយាល័យប្រឆាំងគ្រឿងញៀន បានចុះប្រតិបត្តិការបង្រ្កាបករណីចែកចាយ និងប្រើប្រាស់គ្រឿងញៀនដោយឃាត់ខ្លួនជនសង្ស័យប្រុស-ស្រីចំនួន៥នាក់ កាលពីវេលាម៉ោង៤និង៤៥នាទីល្ងាចថ្ងៃទី១៥ ឧសភា ឆ្នាំ២០១២ នៅចំណុចភូមិសែសិន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ បញ្ជូនទៅសាលាដំបូងខេត្តចាត់ការតាមច្បាប់។ ក្នុងការចុះបង្ក្រាបនេះ មានការសម្របសម្រួលពីលោកស្រីកែវ សុគន្ធា ព្រះរាជអាជ្ញារងអមសាលាដំបូងខេត្ត ។
លោករ៉ែម វីរៈ អធិការនគរបាលក្រុងសិរីសោភ័ណបានឲ្យដឹងថា ជនសង្ស័យទាំង៥នាក់ ដែលជាប់ចោទពីបទចែកចាយ និងប្រើប្រាស់គ្រឿងញៀន ហើយត្រូវបានចាប់ឃាត់ខ្លួននេះ១-ឈ្មោះយ៉ន ស្រីណុច ភេទស្រី អាយុ៣៣ឆ្នាំ ជាអ្នកលក់ផ្លែឈើ នៅភូមិសែសិន សង្កាត់អូរអំបិល ២-ឈ្មោះវិន ផាវី ភេទស្រីអាយុ២៩ឆ្នាំ ជាអ្នកលក់ផ្លែឈើ នៅភូមិសាមគ្គី ខេត្តបាត់ដំបង ៣-ឈ្មោះគឹម ពៅ ភេទស្រី អាយុ២៥ឆ្នាំ មុខរបរនិងទីលំនៅមិនពិតប្រាកដ ៤-ឈ្មោះស៊ូ ចន្ថា ហៅឌ្រិត ភេទប្រុស អាយុ២៧ឆ្នាំ ជាកម្មករ និង៥-ឈ្មោះហ៊ឹម ស៊ីឌី ភេទប្រុសអាយុ២៦ឆ្នាំជាកម្មករ ទាំង២នាក់ រស់នៅភូមិស្ទឹងចាស់ ឃុំគយម៉ែង ស្រុកមង្គលបុរី ។ ក្នុងការចុះបង្រ្កាបនេះកម្លាំងសមត្ថកិច្ចបានធ្វើការស្រាវជ្រាវ និងដកហូតបានវត្ថុតាងថ្នាំញៀនប្រភេទមេតំហ្វេតាមីន ពណ៌ក្រហម មានអក្សរ WY ច្រកក្នុងបំពង់បឺត ចំនួន៧គ្រាប់ និងឧបករណ៍សម្រាប់ជក់មួយចំនួនទៀត ។
លោកអធិការបានបញ្ជាក់ថា ក្នុងការចុះប្រតិបត្តិការទទួលបានលទ្ធផលនេះ ដោយមានបទ បញ្ជាយ៉ាងម៉ឺងម៉ាត់ពីលោកឧត្តមសេនីយ៍ស្នងការនគរបាលខេត្ត បានឲ្យគ្រប់កម្លាំងនគរបាលស្រុក-ក្រុង ត្រូវតែបង្រ្កាបឲ្យខាងតែបានចំពោះមុខសញ្ញាជួញដូរ និងចែកចាយគ្រឿងញៀនឲ្យដូចជាភ្លៀងរលឹម ចំពោះកន្លែងដែលធ្លាប់បង្រ្កាបហើយមិនឲ្យងើបក្បាលឡើងវិញបានទេ ហើយមន្ត្រីនគរបាលក៏មិនត្រូវនៅពីក្រោយខ្នងនៃបទល្មើសនោះដែរ ។
ទាក់ទិនទៅនឹងការបង្រ្កាបករណីគ្រឿងញៀននេះដែរ កាលពីវេលាម៉ោង៤ល្ងាចថ្ងៃទី១៥ ឧសភា មានពលរដ្ឋខ្មែរម្នាក់នៅភូមិសិលាខ្មែរ ឃុំអូរបីជាន់ ស្រុកអូរជ្រៅ ត្រូវជាប់ចោទពីបទជួញដូរគ្រឿងញៀន ហើយត្រូវបានទាហានថៃចាប់ឃាត់ខ្លួននៅក្នុងទឹកដីថៃ ក្នុងភូមិល្អាងសិលា ឃុំគោកធ្យូង ស្រុកអារញ្ញ ខេត្តស្រះកែវ។ ក្នុងការចាប់ឃាត់ខ្លួននេះសមត្ថកិច្ចថៃបានឆែកឆេររកឃើញថ្នាំញៀនប្រភេទមេតំហ្វេតាមីនចំនួន១១៥គ្រាប់។ នេះបើយោងតាមរបាយការណ៍របស់អធិការដ្ឋាននគរបាលស្រុកអូរជ្រៅបានឲ្យដឹងកាលពីល្ងាចថ្ងៃទី១៦ ឧសភា៕
ចែករំលែកព័តមាននេះ