ខេត្តព្រះសីហនុ ៖ បុរសម្នាក់ត្រូវបានកម្លាំងកងរាជអាវុធហត្ថស្រុកព្រៃនប់ឃាត់ខ្លួនរួចបញ្ជូនទៅកាន់ទីបញ្ជាការកងរាជអាវុធហត្ថខេត្ត បន្ទាប់ពីបុរសម្នាក់នេះ បានធ្វើសកម្មភាពលួចយកម៉ូតូមួយគ្រឿង ។ ហេតុការណ៍នេះបានកើតឡើងកាលពីវេលាម៉ោង១២និង៣០នាទីថ្ងៃត្រង់ថ្ងៃទី១៧ ឧសភា ស្ថិតក្នុងភូមិព្រៃនប់ ស្រុកព្រៃនប់ ។
លោកអនុសេនីយ៍ឯក ញ៉ែម ចំរើន មេបញ្ជាការកងរាជអាវុធហត្ថស្រុកព្រៃនប់ឱ្យដឹងថា បុរសដែលត្រូវឃាត់ខ្លួននេះឈ្មោះ វា៉ា សម្បតិ្ត អាយុ៣១ឆ្នាំ មុខរបរនិងទីលំនៅមិនច្បាស់លាស់ ។ មុនពេលឃាត់ខ្លួនគេបានសុំផ្ទះឪពុកមាម្នាក់នៅស្រុកកំពង់សិលាស្នាក់នៅ និងបានធ្វើសកម្មភាពលួចម៉ូតូមួយគ្រឿងម៉ាកសេ១២៥ ផលិតនៅប្រទេសចិន ពណ៌ខ្មៅ គ្មានលេខ របស់បុរសម្នាក់ឈ្មោះអាន ប្រុស អាយុ៤៣ឆ្នាំ មានទីលំនៅភូមិដីក្រហម ឃុំកំពង់សិលា ស្រុកកំពង់សិលា ខេត្តព្រះសីហនុ ។
លោកមេបញ្ជាការបន្តទៀតថា ជនសង្ស័យខាងលើនេះ ជាមុខសញ្ញាខាងលួចម៉ូតូ ហើយកន្លងមកជននេះធ្លាប់ជាប់ពន្ធនាគារខេត្តម្តងរួចមកហើយ តែមិនព្រមរាងចាលនៅតែប្រព្រឹត្តល្មើសដដែលជាដដែល ។ ម្ចាស់ម៉ូតូបានឱ្យដឹងថា នៅថ្ងៃទី១៦ ឧសភា មុនពេលចាប់ខ្លួនជនសង្ស័យមួយថ្ងៃ គាត់និងមនុស្សមួយចំនួនទៀតមានទាំងជនសង្ស័យរូបនេះផងដែរ បាននាំគ្នាចូលព្រៃទៅរកកាប់ឈើ ដោយទុកម៉ូតូនិងទូរស័ព្ទដៃនៅកន្លែងតង់ដែលពួកគាត់ចងសម្រាប់សម្រាក ។ ពេលចូលដល់ក្នុងព្រៃបានមួយសន្ទុះ ជនសង្ស័យបានគេចត្រឡប់មកក្រោយវិញតែពួកគាត់ពុំបានចាប់អារម្មណ៍អ្វីទេ លុះដល់ម៉ោងប្រហែលជិត២រសៀលពួកគាត់ត្រឡប់មកកន្លែងសម្រាកវិញ ក៏ស្រាប់តែបាត់ម៉ូតូតែម្តង ។ ការបាត់នោះត្រូវបានពួកគាត់សង្ស័យទៅលើឈ្មោះ វ៉ា សម្បត្តិ ក៏ត្រឡប់មកផ្ទះវិញប្តឹងសមត្ថកិច្ចផង និងដើរសួរដំណឹងពីជនសង្ស័យខាងលើផង ។
ក្រោយមកក៏បានដឹងថា ជនសង្ស័យតែងឧស្សាហ៍មកលេងនៅម្តុំភូមិកោះខ្យង គាត់ក៏ធ្វើដំណើរមកតាម និងប្តឹងកងរាជអាវុធហត្ថស្រុកព្រៃនប់។ បន្ទាប់មកក៏បានឃើញម៉ូតូគាត់ចតនៅចិញ្ចើមផ្លូវជាតិត្រង់ចំណុចភូមិព្រៃនប់ ក៏ធ្វើការព័ទ្ធចាប់តែម្តង ៕
ចែករំលែកព័តមាននេះ