ខេត្តបាត់ដំបង ៖ ប្រជាពលរដ្ឋនៅស្រុកភ្នំព្រឹកបាននិយាយថា ពួកគេកំពុងមានការព្រួយបារម្ភយ៉ាងខ្លាំង ដោយសារក្រុមអ្នកធ្វើអាជីវកម្មរែងមាសខុសច្បាប់ បាននិងកំពុងបង្ហូរទឹកថ្នាំមានជាតិគីមីចូលកន្លែងទំនាបពាសពេញក្នុងភូមិ ធ្វើឲ្យប៉ះពាល់ដល់សុខភាពប្រជាពលរដ្ឋ យ៉ាងធ្ងន់ធ្ងរនិងកំពុងសម្លាប់សត្វពាហនៈនៅក្នុងមូលដ្ឋាន ។
ប្រជាពលរដ្ឋលោកសារ៉ាយ ហ៊ាន នៅស្រុកភ្នំព្រឹកបានប្រាប់កោះសន្តិភាព កាលពីល្ងាចថ្ងៃទី១៣ ឧសភា ថា ក្រុមអ្នកធ្វើអាជីវកម្មរែងមាសគ្មានច្បាប់ទម្លាប់នៅក្នុងស្រុកភ្នំព្រឹកកំពុងបង្កបញ្ហាធ្ងន់ធ្ងរណាស់ដល់សុខភាពប្រជាពលរដ្ឋ និងសត្វពាហនៈនៅក្នុងមូលដ្ឋាន ដោយសារការបង្ហូរទឹកថ្នាំចម្រាញ់យកមាស ដែលមានជាតិគីមីពាសពេញនៅក្នុងភូមិ។ លោកបានប្រាប់ថា កាលពីថ្ងៃទី១១ ឧសភា កន្លងទៅនេះ គោអ្នកភូមិចំនួន៣ក្បាលបានងាប់ និង២ក្បាលទៀតកំពុងសង្គ្រោះនៅឡើយ ដោយសារសត្វទាំងនេះផឹកទឹកដែលបង្ហូរចេញពីកន្លែងរែងមាសខាងលើនោះ ។ ប្រជាពលរដ្ឋរូបនោះបានបញ្ជាក់ថា បច្ចុប្បន្នក្រុមអ្នកធ្វើអាជីវកម្មរែងមាសអនាធិបតេយ្យកំពុងធ្វើសកម្មភាពភ្លូកទឹកភ្លូកដីនៅក្នុងឃុំភ្នំព្រឹក និងឃុំបារាំងធ្លាក់ ដោយគ្មានការទប់ស្កាត់ទេ។ ប្រជាពលរដ្ឋនៅតំបន់នោះកំពុងមានការព្រួយបារម្ភយ៉ាងខ្លាំងចំពោះទឹកថ្នាំចម្រាញ់យកមាសដែលមានជាតិគីមី បានបែកធ្លាយពីទីតាំងរែងមាសហូរចូលក្នុងមូលដ្ឋាន ហើយសត្វពាហនៈ និងមនុស្សកំពុងប្រឈមមុខយ៉ាងធ្ងន់ធ្ងរ ។
មន្រ្តីស្រុកម្នាក់និយាយថា សត្វគោដែលផឹកទឹកមានជាតិគីមីនេះបានប្រកាច់ងាប់ជាបន្តបន្ទាប់ រីឯ២ក្បាលទៀតម្ចាស់កំពុងសង្គ្រោះនៅឡើយ ។ មន្រ្តីរូបនោះបន្តថា ក្នុងរដូវវស្សាបែបនេះទឹកថ្នាំដែលមានជាតិពុលទាំងនេះ បានហូរចេញពីទីតាំងរែងមាសមកសាច់ពេញភូមិ ដែលជះក្លិនឈូលមិនអាចទ្រាំបាន ហើយថាសត្វគ្រប់ប្រភេទដែលផឹកទឹកនេះអាច នឹងប្រកាច់ងាប់ភ្លាម ។ ប្រភពដដែលនេះនិយាយថា បញ្ហាខាងលើបើគ្មានការទប់ស្កាត់ទេ ប្រជាពលរដ្ឋនៅតំបន់នោះអាចនឹងប៉ះពាល់សុខភាពធ្ងន់ធ្ងរ រីឯសត្វពាហនះក៏អាចនឹងងាប់ហិនហោចដែរ។ មន្ត្រីរូបនោះបញ្ជាក់ថា ក្រុមអ្នកធ្វើអាជីវកម្មរែងមាសនេះបានធ្វើសកម្មភាពជាច្រើនឆ្នាំហើយ តែគ្មានស្ថាប័នណាមួយបង្រ្កាបទេ គឺមានតែអ្នកទទូលផលពីបទល្មើសទាំងនេះ ។
លោកសួន គឿន អភិបាលស្រុកភ្នំព្រឹកហាក់ដូចជាអល់អែកក្នុងការបំភ្លឺជុំវិញសត្វគោ៣ក្បាល ដែលងាប់ដោយពុលថ្នាំគីមីដែលហូរចេញពីកន្លែងរែងមាសអនាធិបតេយ្យនេះ ។ លោកអភិបាលស្រុក បានប្រាប់តាមទូរស័ព្ទថា មិនមែនរឿងនេះលោកក្ដាប់មិនជុំទេ ដោយលោកជំរុញឲ្យទៅសួរលោកប៉ិច ឆុន អភិបាលរងស្រុកវិញ ព្រោះគាត់បានចុះធ្វើការងារនេះផ្ទាល់ ។
លោកប៉ិច ឆុន អភិបាលរងស្រុកភ្នំព្រឹក បានប្រាប់កោះសន្តិភាពតាមទូរស័ព្ទនៅរសៀលថ្ងៃទី១៤ ឧសភា ថា ពិតជាមានគោងាប់ដោយសារពុលទឹកថ្នាំចម្រាញ់មាសនោះមែន។ លោកនិយាយថា ទឹកថ្នាំនោះបានហូរចេញពីកន្លែងរែងមាសនៅក្បែរជើងភ្នំ ។ លោកថា សព្វថ្ងៃទឹកថ្នាំគីមីនេះមានក្លិនឈួលស្ទើរតែមិនអាចទៅក្បែរបាន ជាពិសេសអ្នកមានរោគបេះដូង ពិតជាគួរឱ្យព្រួយបារម្ភបំផុត ។ លោកអភិបាលរងបានបញ្ជាក់ថា ក្រុមអ្នកធ្វើអាជីវកម្មរែងមាសទាំងនេះគ្មានច្បាប់អនុញ្ញាតទេ ។ ពួកគេបានប្រើប្រាស់ម៉ាស៊ីនពាក់បណ្ដាលស្វ័យប្រវត្តិ ក្នុងការរែងយកមាស ដែលមានយ៉ាងតិចជាង១០កន្លែង ប៉ុន្តែសព្វថ្ងៃបានថមថយខ្លះហើយ ដោយសារក្ស័យធន ។ លោកប្រាប់ថា កន្លងមកអាជ្ញាធរធ្លាប់ចុះណែនាំពួកគេដែរ អំពីការធ្វើអាជីវកម្មខុសច្បាប់នេះ តែពួកគេមិនស្ដាប់ឡើយ។ ពាក់ព័ន្ធនឹងការចោទថា អាជ្ញាធរ និងស្ថាប័នមួយចំនួនបានទទូលប្រាក់សំណូកពីក្រុមធ្វើអាជីវកម្មរែងមាសខុសច្បាប់នេះ លោកប៉ិច ឆុន បានពន្យល់ថា អាជ្ញាធរស្រុករបស់លោកមិនពាក់ព័ន្ធទេ តែលោកថា បើសមត្ថកិច្ច ឬស្ថាប័នផ្សេងៗ លោកមិនហ៊ាថាឡើយ ប្រហែលជាអាចមានខ្លះមើលទៅ ។
ពាក់ព័ន្ធនឹងបញ្ហានេះលោក ជឺ ឈៀង ប្រធានមន្ទីរឧស្សហកម្មរ៉ែ និងថាមពលខេត្តមិនអាចទំនាក់ទំនងសុំការបំភ្លឺបានឡើយ កាលពីរសៀលថ្ងៃទី១៤ ឧសភា ។ ប៉ុន្តែកាលពីអំឡុងឆ្នាំ២០១១ លោក ជឺ ឈៀង ប្រធានមន្ទីរជំនាញខាងលើនេះ ធ្លាប់បានប្រាប់កោះសន្តិភាពថា មានតែក្រុមហ៊ុនចិនមួយទេដែលមានច្បាប់អនុញាតឲ្យធ្វើការរុករករ៉ែមាសនៅស្រុកភ្នំព្រឹកនេះ ។ ក្រៅពីនេះគ្មានច្បាប់អនុញាតឡើយ ។ លោកប្រធានមន្ទីរបានបញ្ជាក់ប្រាប់កាលណោះថា ចំពោះក្រុមធ្វើអាជីវកម្មរែងមាសខុសច្បាប់ទាំងនោះ ក្រុមការងាររបស់លោក និងអាជ្ញាធរមូលដ្ឋានធ្លាប់បានចុះណែនាំពួកគេបន្តបន្ទាប់ឲ្យបញ្ឍប់សកម្មភាព តែពួកគេនៅតែលួចធ្វើអាជីវកម្មទៀត ហើយកាលណោះលោកអះអាងថា នឹងធ្វើការបង្រ្កាបជាថ្មី ប៉ុន្តែរហូតមកទល់ពេលនេះ ក្រុមរែងមាសទាំងនេះនៅតែធ្វើសកម្មភាពដដែល ។
បើតាមប្រភពព័ត៌មានប្រាប់ថា នៅដំណាច់ខែម្ដងៗគេតែងឃើញសមត្ថកិច្ច ស្ថាប័នពាក់ព័ន្ធ និងអាជ្ញាធរគ្រប់លំដាប់ថ្នាក់បានដើរប្រមូលប្រាក់សំណូកពីថៅកែរែងមាសទាំងនេះ បណ្ដាក់គ្នាដូចខ្យង ដោយទីតាំងរែងមាសមួយកន្លែងត្រូវចំណាយប្រាក់រាប់លានរៀលក្នុងមួយខែៗដើម្បីសូកប៉ាន់ បើមិនដូច្នេះទេ មិនអាចបានសុខឡើយ ។
ចំពោះបញ្ហាខាងលើនេះ ប្រជាពលរដ្ឋបានសំណូមពរដល់អាជ្ញាធរមេត្តាចុះបង្រ្កាបក្រុមអ្នករែងមាសទាំងនេះផង ព្រោះពេលនេះកំពុងបង្កផលប៉ះពាល់ធ្ងន់ធ្ងរណាស់ដល់សុខភាពមនុស្ស និងសត្វនៅក្នុងមូលដ្ឋាន ។ លោកប៉ិច ឆុន អភិបាលរងស្រុកភ្នំព្រឹកក៏បានបញ្ជាក់ដែរថា លោកបានធ្វើរបាយការណ៍ដាក់ជួនលោកអភិបាលខេត្តរួចហើយ ដើម្បីចាត់វិធានការលើករណីនេះ ៕
ចែករំលែកព័តមាននេះ