ខេត្តកំពង់ស្ពឺ ៖ យ៉ាងហោចណាស់មានលំនៅឋានចំនួន៩៩ខ្នង ស្ថិតនៅក្នុងភូមិចំនួន៥នៃឃុំរលាំងគ្រើល ស្រុកសំរោងទង បានដួលរលំដោយខ្យល់ព្យុះបក់បោកយ៉ាងខ្លាំងជាមួយភ្លៀងមួយមេធំ កាលពីវេលាម៉ោង២និង១១នាទីរសៀលថ្ងៃទី១៣ ឧសភា ។
អភិបាលស្រុកសំរោងទង លោកហង្ស គីមញ៉េន មានប្រសាសន៍ឱ្យដឹងថា មានលំនៅឋានក្នុងភូមិចំនួន៥នៃស្រុកសំរោងទង រងការខូចខាតដោយព្យុះភ្លៀងខ្លះរលំទាំងស្រុង ខ្លះរបើកដំបូល ខ្លះរបើកក្បឿងមួយចំហៀងផ្ទះ ។ ភូមិទាំង៥ក្នុងឃុំរលាំងគ្រើល ដែលទទួលរងនូវគ្រោះមហន្តរាយនេះ មាន១-ភូមិអង្គមេត្រី ២- ភូមិកំណប់ ៣- ភូមិក្រាំងស្វាយ ៤- ភូមិព្រៃសាលា និង៥- ភូមិចំបក់ផ្អែម ។ លំនៅឋានដែលរងការខូចខាតទាំងស្រុងខូចខាតមធ្យម និងខូចខាតស្រាលសរុបទាំងអស់មានចំនួន៩៩ខ្នង ។ នៅព្រឹកថ្ងៃទី១៤ ឧសភា ទាំងថ្នាក់ស្រុក ថ្នាក់ខេត្ត និងក្រុមកាកបាទក្រហមបានចុះសួរសុខទុក្ខ និងធ្វើកំណត់ហេតុនៃការខូចខាតដោយសារខ្យល់ព្យុះនេះ ក្នុងនោះអគារសិក្សាអនុវិទ្យាល័យហ៊ុន សែន ក៏រងការខូចខាត អស់ចំនួន៣ខ្នងដែរ គឺខូចខាតធ្ងន់ធ្ងរ២ខ្នង ដោយរបើកដំបូលទាំងស្រុង ។
លោកអភិបាលស្រុកសំរោងទង បន្តទៀតថា គ្រោះធម្មជាតិដោយព្យុះភ្លៀងនេះបានកួចយកដើមចេក ដើមស្វាយ តាមដងផ្លូវបាក់អស់ជាច្រើនដើម និងបង្កឱ្យមានការរាំងស្ទះចរាចរណ៍តាមផ្លូវលំផងដែរ ។ ទន្ទឹមនេះ ការរលំផ្ទះនោះ ក៏បង្កឱ្យស្ត្រីចំណាស់ម្នាក់ឈ្មោះម៉ិញ ញ៉េន អាយុ៦៨ឆ្នាំ នៅក្នុងភូមិក្រាំងស្វាយ រងរបួសធ្ងន់រហូតដើរពុំរួចកំពុងទទួលការព្យូរសេរ៉ូម ព្រោះពេលកើតហេតុគាត់អង្គុយនៅក្រោមផ្ទះជាមួយចៅស្រីអាយុ៤ឆ្នាំ ហើយនៅពេលនោះគាត់យកខ្លួនរងពីលើចៅស្រី ទើបចៅស្រីពុំមានគ្រោះថ្នាក់។
លោកឃុត សុផល អធិការនគរបាលស្រុកសំរោងទង បាននិយាយថា ចំពោះករណីខ្យល់ព្យុះបំផ្លិចបំផ្លាញផ្ទះសម្បែងប្រជាពលរដ្ឋនេះលោកមិនទាន់ដឹងចំនួនពិតប្រាកដទេ ព្រោះសមត្ថកិច្ចតាមប៉ុស្តិ៍កំពុងតែចុះស្រង់ស្ថិតិផ្លូវការដើម្បីផ្តល់ជំនួយសង្គ្រោះនាពេលឆាប់ៗខាងមុខនេះ ។
ភ្លៀងមួយមេធំលាយឡំដោយខ្យល់ព្យុះ បណ្តាលឱ្យរលំផ្ទះប្រជាពលរដ្ឋ៥ខ្នងនៅ ចាក់អង្រែលើ
រាជធានីភ្នំពេញ ៖ លំនៅឋានតូចៗចំនួន៥ខ្នង ធ្វើអំពីកូនឈើប្រក់ស័ង្កសី នៅភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ ត្រូវខ្យល់ព្យុះបោកបក់រលំទាំងស្រុង និងផ្ទះប្រជាពលរដ្ឋតូចៗជាប់គ្នាចំនួន២៩ខ្នងផ្សេងទៀត ក៏ត្រូវខ្យល់ព្យុះបក់កួចប៉ើងដំបូលអស់ កាលពីល្ងាចថ្ងៃទី១៣ ឧសភា ឆ្នាំ២០១២ ប៉ុន្តែមិនបណ្តាលឱ្យមានមនុស្សណាម្នាក់រងគ្រោះថ្នាក់ឡើយ ។
ក្នុងគ្រាអាសន្នខាងលើនេះ លោកគួច ចំរើន អភិបាលខណ្ឌមានជ័យ និងលោកកែវ សាវឿន ចៅសង្កាត់ចាក់អង្រែលើ បាននាំយកអំណោយរបស់អនុសាខាកាកបាទក្រហមខណ្ឌមានជ័យ ទៅចែកជូនបងប្អូនប្រជាពលរដ្ឋនាព្រឹកថ្ងៃទី១៤ ឧសភា ក្នុងនាមជាអង្គការមនុស្សធម៌ឆ្លើយតបទៅនឹងអនុសាសន៍របស់សម្តេចអគ្គមហាសេនាបតីតេជោ ហ៊ុន សែន និងលោកជំទាវ ។
ដោយឡែកនៅសង្កាត់ច្បារអំពៅទី១ និងសង្កាត់ច្បារអំពៅទី២ ក៏មានលំនៅឋានបងប្អូនប្រជាពលរដ្ឋក្រីក្រចំនួន១២ខ្នង រងការខូចខាតដោយសារខ្យល់ព្យុះបក់ប៉ើងដំបូលស័ង្កសីខ្ទាចចេញពីលំនៅឋានរបស់ខ្លួនដែរ ប៉ុន្តែមិនធ្ងន់ធ្ងរដូចនៅសង្កាត់ចាក់អង្រែឡើយ ។
បាក់រលំជញ្ជាំងឥដ្ឋអគាររោងចក្រយីងដុង សង្កត់បន្ទប់ផ្ទះជួលរបួសស្ត្រីពីរនាក់ម្តាយនិងកូន
រាជធានីភ្នំពេញ ៖ ស្ត្រីម្នាក់រងរបួសស្រាលឯកូនស្រីតូចអាយុ៣ឆ្នាំរងរបួសធ្ងន់ ដោយសារជញ្ជាំងអគាររោងចក្រកាត់ដេរ យីងដុង ដែលកំពុងសាងសង់បាក់រលំសង្កត់ ខណៈពេលស្ត្រីរូបនោះ និងកូនស្រីកំពុងស្ថិតនៅក្នុងបន្ទប់ផ្ទះជួលមួយក្បែរជញ្ជាំងសំណង់អគាររោងចក្រនោះ ។ ក្រោយពេលកើតហេតុ ជនរងគ្រោះត្រូវបានគេបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ ឯមេការសំណង់ម្នាក់ត្រូវបានប៉ូលិសប៉ុស្តិ៍ចោមចៅឃាត់ខ្លួននាំទៅធ្វើការសួរនាំផងដែរ ។
ហេតុការណ៍នេះបានកើតឡើងកាលពីល្ងាចថ្ងៃទី១៣ ឧសភា ឆ្នាំ២០១២ នៅក្នុងភូមិអង្គកែវ សង្កាត់ចោមចៅ ខណ្ឌពោធិ៍សែនជ័យ ។ ជនរងគ្រោះជាម្តាយឈ្មោះជិន ភន អាយុ៣៤ឆ្នាំ កូនស្រីឈ្មោះស៊ង នីហ្សា អាយុ៣ឆ្នាំ មានស្រុកកំណើតភូមិស្គុយ ឃុំស្មោង ស្រុកទ្រាំង ខេត្តតាកែវ សព្វថ្ងៃស្នាក់នៅក្នុងភូមិកើតហេតុខាងលើ ។ ដោយឡែកកន្លែងជញ្ជាំងសំណង់អគាររោងចក្រដែលបាក់រលំសង្កត់ផ្ទះជួលបណ្តាលឱ្យមនុស្សរងរបួសនោះតាមការអះអាងថា ជារបស់ក្រុមហ៊ុនរោងចក្រកាត់ដេរយីងដុង ។ រីឯមេការសំណង់ដែលជាអ្នកទទួលខុសត្រូវក្នុងការសាងសង់នោះឈ្មោះហែម ហន ភេទប្រុស អាយុ៣១ឆ្នាំ ត្រូវបានប៉ូលិសប៉ុស្តិ៍ចោមចៅឃាត់ខ្លួននាំទៅធ្វើការសួរនាំរឿងសាងសង់គ្មានលក្ខណៈបច្ចេកទេសនេះផងដែរ ប៉ុន្តែគេមិនទាន់ដឹងថា តើត្រូវមានទោស ឬអត់ឡើយ ។
តាមប្រភពព័ត៌មានបានឱ្យដឹងថា សំណង់អគាររោងចក្រខាងលើ គឺកំពុងដំណើរការសាងសង់មិនទាន់រួចរាល់នៅឡើយទេ ដែលមានកម្ពស់២ជាន់ ហើយការសាងសង់នោះដូចជាគ្មានលក្ខណៈបច្ចេកទេសនោះទេ ។ ម្យ៉ាងទៀតគេអត់បានយកសំណាញ់ ឬស្បៃទៅហ៊ុមព័ទ្ធជុំវិញដើម្បីការពារសុវត្ថិភាពដល់អ្នករស់នៅក្បែរខាងឡើយ ហើយបានបាក់អស់១ប្រឡោះទំហំប្រហែល៥ម៉ែត្របួនជ្រុង ឯបន្ទប់ផ្ទះជួលដែលត្រូវជញ្ជាំងឥដ្ឋបាក់សង្កត់លើនោះបានរងការខូចខាតដំបូលទាំងស្រុងតែម្តង។
ប្រភពដដែលបានបន្តទៀតថា នៅមុនពេលកើតហេតុ ស្ត្រីពីរនាក់ម្តាយ និងកូនបានស្ថិតនៅក្នុងបន្ទប់ផ្ទះជួលនោះ ខណៈនោះមេឃបានធ្លាក់ភ្លៀង និងខ្យល់ផងដែរ។ ក្រោយមកជញ្ជាំងអគាររោងចក្រនោះក៏បានបាក់រលំសង្កត់ទាំងកំរោលបណ្តាលបាក់ដំបូលបន្ទប់ផ្ទះជួលនោះសង្កត់ជនរងគ្រោះ២នាក់ម្តាយនិងកូនរងរបួសធ្ងន់ និងស្រាលបែបនេះតែម្តង ។
ក្រោយពេលកើតហេតុ គេបាននាំជនរងគ្រោះទៅកាន់មន្ទីរពេទ្យដើម្បីសង្គ្រោះបន្ទាន់ បន្ទាប់មកប៉ូលិសប៉ុស្តិ៍បានចុះធ្វើការស្រាវជ្រាវ និងឃាត់ខ្លួនមេការសំណង់យកទៅធ្វើការសួរនាំ និងឃុំខ្លួនបណ្តោះអាសន្ននៅប៉ុស្តិ៍រង់ចាំកសាងសំណុំរឿងបន្ត ៕
ចែករំលែកព័តមាននេះ