រាជធានីភ្នំពេញ ៖ យុវជនម្នាក់ត្រូវឪម៉ាល់ទិចចំនួន៣០មេ ខណៈពេលយកកន្ត្រៃទៅកាត់ស្លឹកឈើជិតសម្បុកឪម៉ាល់ដើម្បីយកការុងទៅច្រក ស្រាប់តែធ្លាយសម្បុកបណ្តាលឱ្យឪម៉ាល់ហើរដេញជុំវិញផ្ទះទិចស្ទើរពេញខ្លួន ។ ហេតុការណ៍នេះកើតឡើងកាលពីវេលាម៉ោង៤រសៀលថ្ងៃទី១១ ឧសភា នៅក្នុងភូមិគ្រឹះលេខ៧ ផ្លូវលេខ៦០០ សង្កាត់បឹងកក់ទី២ ខណ្ឌទួលគោក ។
យុវជនដែលត្រូវឪម៉ាល់ទិចនេះឈ្មោះយី ខេន អាយុ២០ឆ្នាំ ស្នាក់នៅ និងធ្វើការក្នុងផ្ទះខាងលើ មានស្រុកកំណើតនៅភូមិច្រកផ្តៅ ឃុំ ទូកមាស ស្រុកបន្ទាយមាស ខេត្តកំពត ។ តាមប្រភពព័ត៌មានពីមិត្តភក្តិស្នាក់នៅជាមួយគ្នាឱ្យដឹងថា កាលពីថ្ងៃទី៩ ឧសភា បន្ទាប់ពីរាំងភ្លៀងមានអ្នកនៅផ្ទះជាមួយគ្នាដើរកាត់ក្រោមដើមឈើក្នុងទីធ្លាផ្ទះ ស្រាប់តែឪម៉ាល់ហើរចេញពីសម្បុកវាយប្រហារដោយទិចពី៥ទៅ៦មេ ។ ពេលនោះជនរងគ្រោះខាងលើនិយាយថា រូបគេនឹងកម្ទេចសម្បុកឪម៉ាល់នេះមិនឱ្យមានតទៅទៀតទេ ។ លុះនៅរសៀលថ្ងៃទី១១ ឧសភា ជនរងគ្រោះបានយកការុង និងកន្ត្រៃសម្រាប់កាត់ស្មៅឡើងទៅលើផ្ទះជាន់ទីមួយដើម្បីកាត់មែកឈើដែលនៅជាប់នឹងសម្បុកចេញហើយយកការុងនោះច្រកឱ្យជាប់ ។
ប្រភពដដែលរៀបរាប់ទៀតថា ពេលយកការុងច្រកប៉ះមែកឈើមិនអាចច្រកបានក៏យកកន្ត្រៃទៅកាត់មែកឈើចេញតែពេលកាត់នោះប៉ះនឹងសម្បុកបណ្តាលឱ្យផ្អើលឪម៉ាល់ក្នុងសម្បុកហើរចេញយ៉ាងប្រសាចមកដេញទិចធ្វើឱ្យជនរងគ្រោះរត់ចុះទៅក្រោមហើយរត់ព័ទ្ធផ្ទះជាច្រើនជុំ ប៉ុន្តែឪម៉ាល់នៅតែដេញតាមទិចដែរ ។ ពេលនោះអ្នកនៅក្នុងផ្ទះស្រែកឃាត់មិនឱ្យរត់ចូលក្នុងផ្ទះទេ ខ្លាចឪម៉ាល់ទិចដល់អ្នកនៅក្នុងផ្ទះទៀតទើបជនរងគ្រោះចេះតែរត់ព័ទ្ធជុំវិញរោងដាក់រថយន្តយកដៃវាសបណ្តេញឪម៉ាល់នោះបណ្តាលឱ្យឪម៉ាល់ទិចដៃទាំងសងខាងហើម និងទិចក មុខ និងខ្នង ទម្រាំមានអ្នកជួយដេញផ្អើលទៅវិញអស់ ដោយការប្រើថ្នាំបាញ់មូស ហើយសម្បុកឪម៉ាល់នោះក៏ត្រូវបានបំផ្លាញចោលដែរ។
ក្រោយពេលកើតហេតុ ជនរងគ្រោះត្រូវបានបញ្ជូនទៅព្យាបាលនៅមន្ទីរពេទ្យព្រះកុសុមៈដោយសារត្រូវឪម៉ាល់ទិចសរុប៣០មេ ប៉ុន្តែធ្ងន់ធ្ងរជាងគេ គឺដៃទាំងសងខាង ៕
ចែករំលែកព័តមាននេះ