រាជធានីភ្នំពេញ ៖ នារីបម្រើការនៅភោជនីយដ្ឋានម្នាក់ បានលេបថ្នាំអស់ជាច្រើនគ្រាប់ប៉ងសម្លាប់ខ្លួនក្រោយពេលឃើញសង្សារដែលជាភ្ញៀវតែងចេញចូលក្នុងហាងជាញឹកញាប់បណ្តើរស្រីថ្មី ។ ហេតុការណ៍នេះបានកើតឡើងកាលពីវេលាម៉ោង១២អធ្រាត្រថ្ងៃទី១១ ឧសភានៅក្នុងភោជនីយដ្ឋានវណ្ណនីរីករាយ តាមបណ្តោយផ្លូវលេខ២០០៤ ស្ថិតក្នុងភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ ។
នារីដែលខូចចិត្ត ហើយលេបថ្នាំប៉ងសម្លាប់ខ្លួន ព្រោះតែគូស្នេហ៍ប្រែចិត្តនេះ ឈ្មោះសុខ ប៊ុននី អាយុ២០ឆ្នាំ មានស្រុកកំណើតនៅខេត្តកំពង់ចាម មកស្នាក់នៅនិងធ្វើការក្នុងភោជនីយដ្ឋានវណ្ណនីរីករាយ ។ ប្រភពព័ត៌មានពីអ្នកយកនាងមកសង្គ្រោះនៅមន្ទីរពេទ្យបានឱ្យដឹងថា នាងទើបតែមកធ្វើការបានរយៈពេល២ខែប៉ុណ្ណោះ ហើយបានស្គាល់គ្នាជាមួយបុរសម្នាក់ដែលជាម៉ូយតែងតែចូលហាងនេះជាប្រចាំ ។ ស្រាប់តែកន្លងមកថ្មីៗនេះ បុរសនោះបានបណ្តើរនារីម្នាក់មកជាមួយ ធ្វើឱ្យនាងមានការអាក់អន់ស្រពន់ចិត្ត ក៏លេបថ្នាំងងុយដេកអស់១០គ្រាប់ ព្រមទាំងថ្នាំប៉ារា៉អស់៥គ្រាប់ទៀត ក្នុងបំណងសម្លាប់ខ្លួន ។
ប្រភពដដែលបានបន្តទៀតថា ពេលដែលលេបថ្នាំហើយ នាងនៅសំងំដេកក្នុងបន្ទប់រហូត និងមានអាការៈចេះតែខ្សោយអស់កម្លាំង ហើយរហូតមកដល់ម៉ោង១និង៣នាទីរំលងអធ្រាត្រឈានចូលថ្ងៃទី១៣ ឧសភា ទើបត្រូវបានបញ្ជូនទៅសង្គ្រោះនៅមន្ទីរពេទ្យព្រះកុសុមៈ ដោយសារតែនាងខ្សោយរហូតដល់សន្លប់ ។ ខណៈពេលមកដល់មន្ទីរពេទ្យ គ្រូពេទ្យបានព្យួរសេរ៉ូម ដើម្បីបណ្តេញជាតិពុលបញ្ចេញតាមទឹកនោម ព្រោះមិនអាចលាងក្រពះបានទេ ដោយសាររយៈពេលនៃការលេបថ្នាំយូរណាស់ទៅហើយ ។
បញ្ហាបេះដូងបែបនេះ វាពិតជាឈឺចាប់ណាស់ តែគេគួរតែគិតថា ការស្រឡាញ់គ្នាបែបសង្សារ ឬជាគូកំណាន់ចិត្តនោះវាគ្មានច្បាប់ឯណាទៅការពារបាននោះទេ ព្រោះមិនទាន់ក្លាយជាប្តីប្រពន្ធស្របច្បាប់ ។ ដូច្នេះភាគីទាំងឡាយ បើស្ម័គ្រចិត្តធ្វើជាស្រីស្នេហ៍នោះក៏ត្រូវតែចុះកុងត្រានឹងការឈឺចាប់ឱ្យហើយទើបល្អ ៕
ចែករំលែកព័តមាននេះ