ខេត្តស្វាយរៀង ៖ កាលពីថ្ងៃទី១២ ឧសភា ឆ្នាំ២០១២ វេលាម៉ោង៦និង៣០នាទីព្រឹក នៅភូមិទទា សង្កាត់ចេក ក្រុងស្វាយរៀង មានការភ្ញាក់ផ្អើលយ៉ាងខ្លាំង ដោយយុវជនម្នាក់បានយកថ្នាំបំពុលកុកមកកូរទឹកផឹកសម្លាប់ខ្លួន បណ្តាលឱ្យប្រកាច់បែកពពុះមាត់សន្លប់ភ្លាមៗនៅនឹងកន្លែង ។
ទាក់ទិនករណីខាងលើ បុរសឈ្មោះផុនចាន់ថន អាយុ៤៥ឆ្នាំ នៅភូមិកើតហេតុខាងលើ ត្រូវជាឪពុកយុវជនរងគ្រោះបានប្រាប់កោះសន្តិភាពថា យុវជនគិតខ្លីផឹកថ្នាំបំពុលសត្វកុកសម្លាប់ខ្លួននេះឈ្មោះផុន ពេជ្រមុន្នី អាយុ២១ឆ្នាំ រៀននៅថ្នាក់ទី១២ នៃវិទ្យាល័យហ៊ុន សែនចេក។ មុនកើតហេតុកាលពីថ្ងៃទី១៣ មេសា ២០១២ កូនគាត់បានចូលរៀននៅម៉ោងភាសាខ្មែរ ស្រាប់តែមានជំងឺឈឺក្បាល ក្រោយមកក៏រៀនលែងកើតគាត់ក៏ឱ្យផ្អាកការរៀនសូត្រនេះ ។
រហូតមកដល់ថ្ងៃទី១១ ឧសភា វេលាម៉ោង៦ល្ងាច ស្រាប់តែនិយាយរវើរវាយ និងចេះតែភ័យខ្លាចក៏រត់ទៅផ្ទះបងស្រី ហើយនិយាយប្រាប់បងស្រីគេឱ្យជួយផង ព្រោះមានគេដេញតាមសម្លាប់ ។ ពេលនោះបងស្រីនិយាយថា គ្មានអ្នកណាតាមសម្លាប់ទេ ទៅផ្ទះវិញទៅហើយរូបគេក៏ដើរត្រឡប់ទៅផ្ទះវិញដេកឃ្លុំភួយទាំងញ័រទទ្រើក ។ លុះដល់ពាក់កណ្តាលយប់ស្រាប់តែគេលោតពីលើផ្ទះមកដីកម្ពស់២ម៉ែត្រកន្លះដួលអុកគូទ ក៏ប៉ុន្តែមិនបណ្តាលឱ្យរងរបួសទេ ហើយពួកគាត់ជាឪពុកម្តាយបានលួងលោមឱ្យកូនឡើងដេកវិញ ។ រហូតដល់ថ្ងៃទី១២ ឧសភា វេលាម៉ោង៧ព្រឹក ពេលងើបពីដេកចុះមកដីគេបានទាញកាំបិតដេញកាប់គាត់ជាឪពុក ហើយម្តាយគេបានលួងលោមឱ្យឡើងទៅដេកវិញ ។ ក្រោយមកពួកគាត់ជាឪពុកម្តាយបានចេញពីផ្ទះបម្រុងទៅរកគ្រូពេទ្យឱ្យមកពិនិត្យព្យាបាល ស្រាប់តែកូនប្រុសគាត់បានយកថ្នាំបំពុលកុកចំនួន៣កញ្ចប់ទៅកូរទឹកផឹក មួយកញ្ចប់ទឹក១កា ផឹកអស់៣កា ក៏ប្រកាច់ដួលសន្លប់បែកពពុះមាត់នៅនឹងកន្លែង ។
បុរសជាឪពុកបន្តទៀតថា ពេលកំពុងយកថ្នាំបំពុលកុកកូរទឹកផឹកនោះ ពុំមានអ្នកណាហ៊ានចូលឃាត់ទេ បានត្រឹមតែនាំគ្នាឈរមើលពីចម្ងាយ ។ក្រោយពីកូនគាត់ដួលសន្លប់ទើបអ្នកស្រុក និងក្រុមគ្រួសារហៅរថយន្តមកដឹកយកទៅកាន់មន្ទីរពេទ្យខេត្ត ដើម្បីសង្គ្រោះ តែលោកគ្រូពេទ្យនិយាយថា សង្ឃឹមរស់តិចណាស់ ៕
ចែករំលែកព័តមាននេះ