ខេត្តកំពង់ឆ្នាំង ៖ ស្រ្តី២នាក់ត្រូវរន្ទះបាញ់ស្លាប់ នៅកន្លែង២ផ្សេងគ្នា កាលពីវេលាម៉ោង៥និង៣០នាទីល្ងាចថ្ងៃទី១២ ឧសភា នៅក្នុងឃុំចំនួន២ក្នុងស្រុកកំពង់លែង ។មន្ត្រីប៉ូលិសស្រុកកំពង់លែង បានឱ្យដឹងថា នៅល្ងាចនោះ មេឃចាប់ផ្តើមធ្លាក់ភ្លៀង លាយឡំខ្យល់ និងផ្លេកបន្ទោរផង ហើយក៏មានករណីរន្ទះបាញ់ស្ត្រីពីរនាក់ស្លាប់នៅកន្លែងពីរផ្សេងគ្នា។
ប្រភពដដែលបន្តថា ស្ត្រីឈ្មោះផាត់ ឆាម អាយុ៤៨ឆ្នាំ រស់នៅភូមិក្រាំងជ្រេស ឃុំវាំងចាស់ ស្រុកឧដុង្គ ខេត្តកំពង់ស្ពឺ បានមកស្នាក់នៅស៊ីឈ្នួលច្រូតស្រូវ នៅក្នុងភូមិដា ឃុំដា ស្រុកកំពង់លែង ។ មុនពេលកើតេហតុស្ត្រីខាងលើ កំពុងច្រូតស្រូវនៅចំណុចស្មោញពង ចម្ងាយជាង២គីឡូម៉ែត្រខាងកើតភូមិដា ខណៈពេលមេឃកំពុងធ្លាក់ភ្លៀង ហើយរន្ទះបានបាញ់ស្ត្រីរូបនោះ បណ្តាលឱ្យស្លាប់នៅនឹងកន្លែងច្រូតស្រូវតែម្តង ។
ចំណែកមួយករណីទៀតនៅម៉ោងនិងថ្ងៃដដែល ប្តី-ប្រពន្ធ២នាក់រស់នៅភូមិតាឡាត់ ឃុំស្វាយរំពារ បានជិះម៉ូតូទៅយកកូននៅឯវាលស្រែ លុះមកដល់ចំណុចទួលកន្ធរ ជាង១គីឡូម៉ែត្រពីខាងកើតភូមិតាឡាត ក៏មានភ្លៀងធ្លាក់ បង្កឱ្យផ្លូវរអិល មិនអាចជិះម៉ូតូបាន ។ ពេលនោះប្តីប្រពន្ធក៏ចុះដើរដោយប្តីបណ្តើរម៉ូតូពីមុខឯប្រពន្ធដើរពីក្រោយចម្ងាយប្រហែល២ទៅ៣ម៉ែត្រពីគ្នា ក៏ស្រាប់តែរន្ទះបានបាញ់ស្រ្តីជាប្រពន្ធ បណ្តាលឱ្យដួលស្លាប់នៅលើផ្លូវយ៉ាងអាណោចអាធ័ម ចំណែកប្តីដែលដើរពីខាងមុខគឺមិនបានរងរបួសអ្វីទេ។ ស្រ្តីរងគ្រោះរូបនោះឈ្មោះហ៊ន ថាត អាយុ៤៤ឆ្នាំ ។
សពស្ត្រីទាំងពីរត្រូវបានក្រុមគ្រួសារយកទៅធ្វើបុណ្យតាមប្រពៃណីឯលំនៅឋានរៀងៗខ្លួន ក្រោមសម្រែកទួញយំស្តាយស្រណោះក្រៃលែងពីក្រុមគ្រួសារ ៕
ចែករំលែកព័តមាននេះ