ខេត្តកំពង់ចាម ៖ ពីរនាក់ប្តីប្រពន្ធរួមនឹងអ្នកជិតខាងម្នាក់ បានត្រូវចរន្តអគ្គិសនីឆក់ស្ទើរក្សិណក្ស័យដោយការបឺតជាប់នឹងដែកបំពង់ទីប១ដើម ទំហំប៉ុនកដៃមនុស្សចាស់ ក្នុងពេលកំពុងជីកលើកបំពង់ទីបបញ្ឃរ ព្រោះតែឆ្លងចរន្តអគ្គិនីពីខ្សែកាប ដែលមានតង់ស្យុងខ្ពស់ ។
ហេតុការណ៍នេះបានកើតឡើងកាលពីវេលាម៉ោង១រសៀលថ្ងៃទី១២ ឧសភា ឆ្នាំ២០១២នៅជាប់នឹងចិញ្ចើមផ្លូវជាតិលេខ៧ ក្នុងភូមិអណ្តូងច្រុះ ឃុំអំពិល ស្រុកកំពង់សៀម ។ ក្រោយកើតហេតុអ្នករងគ្រោះត្រូវបានគេបញ្ជូនមកសង្គ្រោះនៅមន្ទីរពេទ្យ តែគ្រោះអកុសលបុរសជាប្តីស្លាប់ ចំណែកប្រពន្ធរួមនឹងអ្នកជិតខាងរងរបួសធ្ងន់ ។
តាមសាក្សីម្នាក់ឈ្មោះថេន ណារី ភេទប្រុស អាយុ៥១ឆ្នាំ រស់នៅភូមិកើតហេតុខាងលើបានឱ្យដឹងថា គាត់បានឃើញបុរសជាប្តីឈ្មោះជា ចាន់ឌី អាយុ៤១ឆ្នាំ និងប្រពន្ធឱនជីកដីដើម្បីដាក់បង្គោលភ្លើងដែកទីប តចរន្តចេញពីចិញ្ចើមផ្លូវជាតិចូលទៅផ្ទះរបស់ខ្លួនដែលមានចម្ងាយប្រហែល១០០ម៉ែត្រ ។ បន្ទាប់មកស្ត្រីចំណាស់ជាអ្នកជិតខាងម្នាក់ឈ្មោះឡុង ហុង អាយុ៦៣ឆ្នាំ ដើរមកឃើញ ក៏លាន់មាត់ថា «ជីករាក់ពេក ត្រូវជីកបន្ថែមទៀត» ។ លុះក្រោយពីជីកបានជ្រៅល្មមហើយក៏លើកបង្គោលដែកទីបដាក់ចូលទៅក្នុងរណ្តៅនោះ ដែលស្ថិតនៅក្បែរខ្សែកាបអគ្គិសនី ដែលគេតដាក់ពង្រាយនៅតាមដងផ្លូវជាតិ ។ ពេលនោះមិនទាន់ទាំងបានជីកដីកប់លុបបង្គោលផង ស្រាប់តែត្រូវចរន្តអគ្គិសនីឆ្លងមកឆក់ជាប់នឹងបង្គោលដែកទីបនោះ ។ ក្នុងហេតុការណ៍នេះ បណ្តាលឱ្យបុរសឈ្មោះចាន់ឌី ដួលផ្ងារទៅលើដី ចំណែកដែកទីបដួលទ្រេតមកគងលើខ្សែកាបអគ្គិសនី ដែលឃើញបែបនេះរូបគាត់(ណារី)បានស្រែកហៅអ្នកភូមិនៅក្បែរនោះឱ្យមកជួយសង្គ្រោះ ។ អ្នកស្រុកបាននាំគ្នាសែងបុរសរងគ្រោះ ទៅកប់ដាក់នៅក្នុងពំនូកខ្សាច់ក្រែងដឹងខ្លួន បន្ទាប់មកទៀតដឹកយកទៅសង្គ្រោះនៅមន្ទីរពេទ្យខេត្ត ជាមួយនឹងប្រពន្ធ តែគ្រោះអកុសលបុរសជាប្តីក៏ត្រូវស្លាប់ ។
ចំណែកស្ត្រីម្នាក់ទៀតឈ្មោះប៉ាន់ ស្រួយ អាយុុ៦៥ឆ្នាំ ប្រាប់ឱ្យដឹងថា នៅក្នុងហេតុការណ៍ចរន្តអគ្គិសនីឆក់មនុស្សនេះ កូនប្រសាគាត់និងកូនប្រុសបង្កើត យកក្រមាទៅទាញស្ត្រីចំណាស់ឈ្មោះហុង បានមុនគេលើកដាក់នៅកន្លែងសុវត្ថិភាព ។ បន្ទាប់មកជួយសង្គ្រោះឈ្មោះខាត់ ចាន់ ត្រូវជាប្រពន្ធបុរសរងគ្រោះបន្ត ចំណែកបុរសជាប្តីឈ្មោះចាន់ឌី ត្រូវបានសង្គ្រោះក្រោយគេ ។
សូមបញ្ជាក់ថា ក្រោយពីមានហេតុការណ៍ខាងលើ មន្ត្រីអគ្គិសនីខេត្ត បានមកត្រួតពិនិត្យទៅតាមបច្ចេកទេស និងបានទាញបង្គោលដែកទីប ដែលគងលើខ្សែកាបមកដាក់លើដីវិញ ។ ការដាក់បង្គោលភ្លើង ការតចរន្តអគ្គិសនី គប្បីរកអ្នកមានជំនាញមកធ្វើទើបអាចគេចផុតពីគ្រោះថ្នាក់ជាយថាហេតុ ៕
ចែករំលែកព័តមាននេះ