ខេត្តតាកែវ ៖ គ្រោះថ្នាក់ចរាចរណ៍មួយនៅតាមបណ្តោយផ្លូវជាតិលេខ២ ចន្លោះបង្គោលគីឡូម៉ែត្រលេខ៩៨-៩៩ បង្កឡើងដោយរថយន្តកូរ៉េពណ៌ខៀវចំណុះ១តោន ដែលបែកកង់មុខបុកគ្នាជាមួយរថយន្ត១គ្រឿងទៀត បណ្តាលឱ្យបុរសម្នាក់រងរបួសជើងទាំងពីរយ៉ាងធ្ងន់ធ្ងរ ។ ហេតុការណ៍នេះកើតឡើងកាលពីវេលាម៉ោង១១និង៣០នាទីព្រឹកថ្ងៃទី៥ ឧសភា ស្ថិតនៅភូមិបន្ទាយ ឃុំជីខ្មា ស្រុកទ្រាំង ខេត្តតាកែវ។
លោកឯម សារុន អធិការរងនគរបាលស្រុកទ្រាំងបានឱ្យដឹងថា ករណីគ្រោះថ្នាក់ចរាចរណ៍នេះបង្កឡើងដោយរថយន្តកូរ៉េពណ៌ខៀវ បើកបរដោយឈ្មោះសម្បត្តិ ភេទប្រុស អាយុ៤៩ឆ្នាំរស់នៅភូមិដើមជៀក ឃុំព្រៃស្លឹក ស្រុកទ្រាំង រងរបួសជើងទាំង២ ។ លោកបន្តថា រថយន្តនេះបើកបរក្នុងទិសដៅពីត្បូងទៅជើង លុះបើកមកដល់ចំណុចកើតហេតុបានបែកកង់មុខខាងឆ្វេងហើយរេចង្កូតទៅបុករថយន្តតូយ៉ូតា ពណ៌ខ្មៅ ១គ្រឿងទៀតដែលបើកបញ្ច្រាសទិសគ្នាលាន់ដូចរន្ទះ បណ្តាលឱ្យអ្នកជិះក្នុងរថយន្តចំនួន៦នាក់ដែលធ្វើដំណើរទៅបុណ្យសពបងប្អូននៅស្រុកកោះអណ្តែត របួសស្រាលទាំងអស់គ្នា។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ