រាជធានីភ្នំពេញ ៖ អតីតមន្ត្រីប៉ូលិសជើងខ្លាំងប្រចាំរាជធានីភ្នំពេញ ដែលមហាជនភាគច្រើនស្គាល់មុខមាត់ និងហៅរហស្សនាមថា «យមរាជ ហៅទិវា១៦» ឈ្មោះពិត ហង្ស វុទ្ធី នោះ បានចូលមកសារភាព និងសុំឱ្យអង្គការសិទ្ធិមនុស្សលីកាដូជួយអន្តរាគមន៍ពីកំហុសហែកគុករត់របស់គេ និងកំហុសបាញ់ប្រហារមនុស្ស (ឧក្រិដ្ឋកម្ម) ឆៅៗរបស់គេបង្កឱ្យមានការភ្ញាក់ផ្អើល កាលពីវេលាម៉ោង៣រសៀលថ្ងៃទី២០ មេសា ២០១២ នៅការិយាល័យសិទ្ធិមនុស្សអង្គការលីកាដូតែម្តង ។
មហាជនគ្រប់គ្នាមានការភ្ញាក់ផ្អើលផងដែរ ចំពោះលោកយមរាជដែលក្លាហានហែកគុកចេញរត់រួចខ្លួនមួយរយៈទៅហើយនោះ ស្រាប់តែមកចូលសារភាព ឬប្រគល់ខ្លួនឱ្យសមត្ថកិច្ចបែបនេះទៅវិញ? សូមបញ្ជាក់ថា លោកយមរាជជាប់ពាក់ព័ន្ធសំណុំរឿងឃាតកម្មជាច្រើនករណី ដែលយ៉ាងហោចណាស់ក៏១០ករណីដែរ គឺសុទ្ធតែជារឿងបាញ់សម្លាប់ ឬឃាតកម្ម ។
លោកយមរាជអតីតមន្ត្រីប៉ូលិសជើងខ្លាំងរបស់ស្នងការដ្ឋាននគរបាលរាជធានីភ្នំពេញ និងត្រូវជាកូនចៅសំណព្វចិត្តរបស់លោកហេង ពៅ អតីតស្នងការនគរបាលរាជធានីភ្នំពេញ ដែលអាប់យស និងជាប់សំណុំរឿងឃាតកម្មជាច្រើនករណីផងដែរ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ