គណបក្សរបស់លោកស្រីអូងសាន ស៊ូជី គឺគណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLDP) កាលពីថ្ងៃទី២ មេសា បានប្រកាសពីជោគជ័យដោយដណ្តើមបានអាសនៈតំណាងសភាចំនួន៤៤ ក្នុងការបោះឆ្នោតសភាភូមាមួយផ្នែកកាលពីថ្ងៃទី១ ខែមេសា ។
ក្នុងវ័យ៦៦ឆ្នាំ លោកស្រីស៊ូជី ជ័យលាភីរង្វាន់ណូបែលសន្តិភាពឆ្នាំ១៩៩១ បានក្លាយជាសមាជិកាមួយរូបក្នុងចំណោមសមាជិកសភាថ្មីទាំង៤៤រូបរបស់គណបក្សលោកស្រី ។ សរុបមកមានកៅអីចំនួន៤៥ដែលត្រូវធ្វើការបោះឆ្នោតសម្រាប់ការបោះឆ្នោតបំពេញបន្ថែមនេះ ។ សម្រាប់អាសនៈមួយទៀតនោះគឺគណបក្សលោកស្រីពុំមានដាក់បេក្ខជនប្រជែងយកឡើយ ។
ប្រសិនបើលទ្ធផលទាំងនោះត្រូវបានប្រកាសជាផ្លូវការ នោះមានន័យថា គណបក្ស NLDP ឈ្នះដាច់តែម្តង ហើយដណ្តើមបានកៅអីសម្រាប់រដ្ឋធានីថ្មីរបស់ប្រទេសគឺទីក្រុងណៃពិដោទៀតផង។ ប្រជាជនក្រុងណៃពិដោភាគច្រើនជាមន្ត្រីរដ្ឋការ និងយោធា ព្រមទាំងសមាជិកគ្រួសារពួកគេ ។
ការបោះឆ្នោតសភាមួយផ្នែកនោះទាក់ទិនប្រមាណជា១០% នៃកៅអីទាំងអស់របស់សភាជាន់ទាបភូមា។ កៅអី១ភាគ៤ទុកឱ្យពួកយោធា។ គណបក្សសាមគ្គីភាព និងការអភិវឌ្ឍរបស់សហភាព USDP បង្កើតឡើងដោយអតីតរបបយោធា នៅពុំទាន់ធ្វើសេចក្តីថ្លែងការណ៍ណាមួយនៅឡើយទេនៅថ្ងៃទី២ មេសា ។
អ្នកសង្កេតការណ៍មួយក្រុមមកពីបណ្តាប្រទេសលោកខាងលិច និងអាស៊ានត្រូវបានអញ្ជើញឱ្យទៅពិនិត្យមើលការបោះឆ្នោតនោះ ក្នុងនោះប្រតិភូអ្នកសង្កេតការណ៍ពីកម្ពុជារបស់ប្រធានអាស៊ានដឹកនាំដោយលោកឈាង វុន ក៏មានវត្តមានក្នុងការបោះឆ្នោតនេះដែរ ។
ទិដ្ឋភាពនៃការបោះឆ្នោតបំពេញបន្ថែមនៅប្រទេសមីយ៉ាន់ម៉ា (ភូមា) ដូចការគ្រោងទុក នៅវេលាម៉ោង៦ព្រឹក នាថ្ងៃទី១ ខែមេសា ឆ្នាំ២០១២ ការិយាល័យបោះឆ្នោតនីមួយៗបានចាប់ផ្តើមដំណើរការ ។
ការបោះឆ្នោតបំពេញបន្ថែមនេះ ប្រព្រឹត្តទៅចាប់ពីម៉ោង៦ព្រឹកដល់ម៉ោង៤រសៀល ដែលមានការិយាល័យបោះឆ្នោតសរុបចំនួន៨.០០០ ស្ថិតនៅក្នុង៨មណ្ឌល ដើម្បីជ្រើសរើសសមាជិកសភាជាន់ទាបចំនួន៣៧រូប សភាជាន់ខ្ពស់ចំនួន៦រូប និងសភាប្រចាំតំបន់ចំនួន២រូប លើអាសនៈសរុបចំនួន៦៥៩។
គណបក្សចូលរួមប្រកួតប្រជែងមានចំនួន១៧ ហើយគណបក្សប្រឆាំងរបស់លោកស្រី អូង សានស៊ូជី ដែលមានឈ្មោះថា NLDP គណបក្សសម្ព័ន្ធជាតិដើម្បីប្រជាធិបតេយ្យ ឈរ នៅលេខរៀងលំដាប់ទី៨។ អ្នកបោះឆ្នោតសរុប មានចំនួនជាង៦លាននាក់ ស្មើនឹង៧ភាគរយនៃ ចំនួនប្រជាពលរដ្ឋដែលមានសិទ្ធិបោះឆ្នោត ។
អ្នកសង្កេតការណ៍ជាតិ និងអន្តរជាតិ សរុប ចំនួន១៨៩រូប ដែលរួមមាន អ្នកសង្កេតការណ៍ កម្ពុជាដែលជាប្រធានអាស៊ានសម្រាប់ឆ្នាំ ២០១២ អ្នកសង្កេតការណ៍នៃសមាជិកអាស៊ានទាំង៩ប្រទេស អ្នកសង្កេតការណ៍នៃលេខាធិការដ្ឋានអាស៊ាន ព្រមទាំងអ្នកសង្កេតការណ៍មកពីសហគមន៍អឺរ៉ុប សហរដ្ឋអាមេរិក និងកាណាដាជាដើម។ល។
លោកឈាង វុន សមាជិកគណៈកម្មាធិការអចិន្ត្រៃយ៍ និងជាប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនា និងព័ត៌មាននៃរដ្ឋសភា បានដឹកនាំគណៈប្រតិភូពីរក្រុមក្នុងនាមជាប្រធានអាស៊ាន និងក្នុងនាមជាសមាជិកអាស៊ានចំនួន៨រូប បានចុះសង្កេតការណ៍នៅតាមការិយាល័យជាច្រើនក្នុងទីក្រុងរ៉ង់ហ្គូន និងបានអះអាងជាបឋមថា ការបោះឆ្នោតនេះ គឺជាព្រឹត្តិការណ៍ប្រវត្តិសាស្ត្រ ហើយលោកបាន និងកំពុងបន្តតាមសង្កេតការណ៍ជុំវិញការរាប់សន្លឹកឆ្នោតជាបន្តទៀតមុននឹងធ្វើសេចក្តីសន្និដ្ឋានជាក្រោយ ។
នៅពេលជួបជាមួយមន្ត្រីនៃការិយាល័យបោះឆ្នោតក៏ដូចជាអ្នកបោះឆ្នោត លោកឈាង វុន បានថ្លែងនូវការកោតសរសើរចំពោះការបំពេញកាតព្វកិច្ចក្នុងនាមជាប្រជាពលរដ្ឋមីយ៉ាន់ម៉ា និងបានអះអាងថា ការបោះឆ្នោតនេះ គឺជាជោគជ័យមួយរបស់ប្រជាពលរដ្ឋដែលរស់នៅក្នុងសមាគមប្រជាជាតិអាស៊ីអាគ្នេយ៍ ដែលហៅកាត់ថាអាស៊ានទាំងមូល។
ដោយឡែក មន្ត្រីអ្នកសង្កេតការណ៍ម្នាក់នៃសហគមន៍អឺរ៉ុប ដែលសុំមិនបញ្ចេញឈ្មោះបានលើកឡើងថា លោកកំពុងអង្កេត និងវិភាគអំពីស្ថានការណ៍នៃការបោះឆ្នោតនាថ្ងៃទី១ ខែមេសា ឆ្នាំ២០១២នេះ ដោយមិនទាន់មានការអត្ថាធិប្បាយអ្វីនៅឡើយទេ ។ ប៉ុន្តែទោះជាយ៉ាងណាក៏ដោយ អ្នកបោះឆ្នោតមីយ៉ាន់ម៉ាម្នាក់បានឆ្លើយអះអាងថា ការបោះឆ្នោតនាឆ្នាំ២០១២នេះ គឺពិតជាខុសប្លែកពីការបោះឆ្នោតនាឆ្នាំ២០១០។ មានអ្នកបោះឆ្នោតជាច្រើនដែលយើងបាន ជួបផ្លាស់ប្តូរយោបល់គ្នាបានអះអាងថា ដំណើរការនៃការបោះឆ្នោតនៅថ្ងៃនេះប្រព្រឹត្តទៅយ៉ាងរលូន។
ស្ត្រីមេផ្ទះ Myo Myo Aye បានលើកឡើង ថា ការបោះឆ្នោតនៅពេលនេះ គឺជាលើកទី២ ហើយសម្រាប់រូបគាត់ និងបានប្រព្រឹត្តទៅដោយ សេរីហើយទទួលយកបាន ។ គាត់សង្ឃឹមថា ផ្លែផ្កាដែលគាត់ទទួលបានបន្ទាប់ពីការបោះឆ្នោត នេះ គឺការអប់រំល្អប្រសើរ និងសុខុមាលភាព គ្រាន់បើសម្រាប់ក្រុមគ្រួសាររបស់គាត់ និងប្រជាពលរដ្ឋផ្សេងទៀត ។ ដោយឡែក ការយល់ឃើញរបស់ពីរនាក់ប្តីប្រពន្ធលោកMY Than Htut និងលោកស្រី Ma Su Su Wai វិញគឺ៖ ការវិនិយោគ សេរីភាពច្រើនជាងមុន ការបង្កើត ការងារធ្វើ និងការអភិវឌ្ឍប្រទេស ។
ជាចុងក្រោយ ស្ត្រីវ័យ៧០ឆ្នាំ Dan San Nwe បានលើកឡើងថា ក្នុងនាមជាប្រជាពល រដ្ឋ គាត់ត្រូវតែមកចូលរួមការបោះឆ្នោត ហើយ យល់ឃើញថា ការបោះឆ្នោតកន្លែងនេះប្រព្រឹត្ត ទៅបានយ៉ាងល្អត្រឹមត្រូវ ។
ការិយាល័យបោះឆ្នោតនីមួយៗមានប្រជា ពលរដ្ឋមីយ៉ាន់ម៉ាយ៉ាងច្រើនកុះករ បានមកចូល រួមបំពេញកាតព្វកិច្ចក្នុងនាមជាប្រជាពលរដ្ឋក្នុង ទឹកមុខរីករាយ ស្រស់ថ្លា ពោរពេញដោយក្តី សង្ឃឹមនាពេលអនាគត ។
ការបោះឆ្នោតលើកនេះ ពិតមែនតែមាន អាសនៈចំនួន៤៥ ដើម្បីប្រកួតប្រជែងពិតមែន បើប្រៀបធៀបទៅនឹងអាសនៈសរុបចំនួន៦៥៩ ប៉ុន្តែនេះជាការបើកទ្វារដ៏ពិតប្រាកដឱ្យសភា ជាន់ទាប និងសភាជាន់ខ្ពស់មានសំឡេងរបស់គណបក្សប្រឆាំង ជាពិសេសសំឡេងរបស់គណបក្សសម្ព័ន្ធជាតិដើម្បីប្រជាធិបតេយ្យរបស់លោកស្រីអូងសាន ស៊ូជី ។
សម្រាប់ក្រសែភ្នែករបស់សហគមន៍អន្តរជាតិ នេះគឺជាការបោះជំហានវិជ្ជមានរបស់រដ្ឋាភិបាល ដែលកំពុងកាន់អំណាចនាពេលបច្ចុប្បន្ន ដែលបានប្តេជ្ញាអនុវត្តផែនទីបង្ហាញផ្លូវត្រង់ចំណុចទី៧ ឱ្យខាងតែបាន គឺការកែទម្រង់ឱ្យមានប្រជាធិបតេយ្យសេរីពហុបក្សនៅប្រទេសមីយ៉ាន់ម៉ា៕
ចែករំលែកព័តមាននេះ