ក្រុងប៉ោយប៉ែត ៖ ជនសង្ស័យម្នាក់ក្នុងចំណោមបក្សពួក២នាក់ត្រូវបានចាប់ខ្លួន ដោយប៉េអឹមក្រុងពីបទចាយប្រាក់ដុល្លារអាមេរិកក្លែងក្លាយកាលពីវេលាម៉ោង៧និង៣០នាទីព្រឹកថ្ងៃទី២ មេសា នៅក្នុងចំណុចផ្សារត្រី ស្ថិតក្នុងភូមិបាលិលេយ្យ សង្កាត់ប៉ោយប៉ែត ។
ក្រុងប៉ោយប៉ែត ៖ ជនសង្ស័យម្នាក់ក្នុងចំណោមបក្សពួក២នាក់ត្រូវបានចាប់ខ្លួន ដោយប៉េអឹមក្រុងពីបទចាយប្រាក់ដុល្លារអាមេរិកក្លែងក្លាយកាលពីវេលាម៉ោង៧និង៣០នាទីព្រឹកថ្ងៃទី២ មេសា នៅក្នុងចំណុចផ្សារត្រី ស្ថិតក្នុងភូមិបាលិលេយ្យ សង្កាត់ប៉ោយប៉ែត ។
តាមការបំភ្លឺពីសមត្ថកិច្ចប៉េអឹមក្រុងបានឱ្យដឹងថា មុននឹងឈានដល់ការឃាត់ខ្លួនយុវជនសង្ស័យម្នាក់នេះ គឺយោងតាមពាក្យបណ្តឹងពីស្ត្រីឈ្មោះស្រេង ណៃសៀង អាយុ៥៦ឆ្នាំ ជាអ្នកលក់មាស បានប្តឹងពីជននេះដោយរៀបរាប់ថា មុនពេលកើតហេតុមានយុវជន២នាក់ នាំគ្នាមករកទិញមាសរបស់គាត់ ។ ជនទាំង២នេះមានម្នាក់បានតែងខ្លួនជាមនុស្សខ្ទើយ។ បន្ទាប់មកយុវជនម្នាក់ដែលនិយមតែងខ្លួនជាមនុស្សខ្ទើយបានធ្វើជាសួរទិញខ្សែកផ្លាទីន១ខ្សែ មានតម្លៃ៤.៥០០បាត និងចិញ្ចៀនប្លាកទីន១វង់ទៀត មានតម្លៃ ៣.១០០បាត ។ ពេលសួរទិញនោះក៏យកទៅពាក់លមើល ហើយបន្ទាប់មកប្រាប់ឱ្យគូកនរបស់ខ្លួនម្នាក់ដែលស្ពាយកាបូបលុយ និងប្រាប់ថា កាន់ឱ្យបានស្រួលផង ខ្លួនទៅនិយាយទូរស័ព្ទមួយភ្លែត ។ រំពេចនោះបុរសខ្ទើយក៏បានគេចខ្លួនបាត់ស្រមោលដោយនាំយកខ្សែក និងចិញ្ចៀនប្លាទីនទៅជាមួយ ។ នៅសល់តែបក្សពួកគេម្នាក់ដែលឈរស្ពាយកាបូបលុយនោះ ទើបប្តឹងប៉េអឹមឱ្យឃាត់ខ្លួនតែម្តង ។
ក្រោយពីបានទទួលបណ្តឹងកម្លាំងល្បាតរបស់លោកនៅចំណុចនោះក៏ធ្វើអន្តរាគមន៍ឃាត់ខ្លួនជនជាបក្សពួកបានម្នាក់ឈ្មោះ ហ៊ុល បញ្ញា អាយុ១៩ឆ្នាំ រស់នៅភូមិក្បាលស្ពាន ។ ក្រោយពីឃាត់ខ្លួនក៏បានឆែកឆេរនៅក្នុងការបូបដែលជនសង្ស័យនោះស្ពាយ ឃើញមានប្រាក់ដុល្លារ ក្លែងក្លាយសុទ្ធតែជាក្រដាសប្រាក់១០០ដុល្លារ មានចំនួន២៣៣.៨០០ដុល្លារ ។
លោកមេបញ្ជាការបានបន្តថា បក្សពួកម្នាក់ដែលជាបុរសខ្ទើយរត់គេចខ្លួននោះឈ្មោះ បញ្ញា រិទ្ធ អាយុ៣១ឆ្នាំ មានស្រុកកំណើតនៅ ខេត្តបាត់ដំបង ហើយសមត្ថកិច្ចនិងចាត់វិធាន ការតាមច្បាប់នៅពេលក្រោយផងដែរ ដើម្បីចាប់ខ្លួនជននោះមកផ្តន្ទាទោសទៅតាមកំហុសរបស់ខ្លួន ។
ជនសង្ស័យរួមទាំងវត្ថុតាងត្រូវកម្លាំងកងរាជអាវុធហត្ថក្រុងបញ្ជូនទៅទីបញ្ជាការកងរាជអាវុធហត្ថខេត្តជាបន្តដើម្បីចាត់ការតាមច្បាប់ ។ តាមការសារភាពរបស់ជនដែលត្រូវចាប់ខ្លួននេះនិយាយថា ខ្លួនក៏មិនបានដឹងថា ចាញ់បោកគេនោះទេ គឺខ្លួនមកតាមបុរសខ្ទើយនោះ ដោយស្មានថា គេមានលុយដុល្លារច្រើនមែនដាក់ក្នុងកាបូបដែលមានសោចាក់យ៉ាងប្រុងប្រយ័ត្នផងដែរ ។ មន្ត្រីប៉េអឹមបាននិយាយថា ល្បិចបុរសខ្ទើយគឺខ្ចីយុវជនក្មេងធ្វើជាធ្នាក់ ដើម្បីបោកយកគ្រឿងអលង្ការប៉ុណ្ណោះ ។ ទោះបីជាបែបណាក្មេងស្ទាវជាបក្សពួកត្រូវតែមានទោសព្រោះបានរួមគំនិតគ្នាឆបោក ។
លោកមេបញ្ជាការកងរាជអាវុធហត្ថក្រុងប៉ោយប៉ែត បានអំពាវនាវដល់ក្រុមអាជីវករជាអ្នកលក់មាស សូមឱ្យមានការប្រុងប្រយ័ត្ន ឱ្យបានខ្ពស់ ដើម្បីចៀសវាងកុំឱ្យជនខិលខូចឆ្លៀងឱកាសបន្លំយកទ្រព្យសម្បត្តិបែបនេះតទៅទៀត៕
ចែករំលែកព័តមាននេះ