រាជធានីភ្នំពេញ ៖ ក្រុមសមាជិក សមាជិកាព្រឹទ្ធសភាចំនួន១១រូបមកពីគណបក្សប្រឆាំងសមរង្ស៊ី បានដើរចេញពីសម័យប្រជុំពេញអង្គរបស់ព្រឹទ្ធសភាកាលពីថ្ងៃទី២៩ មីនា ២០១២ ខណៈដែលខ្លួនដឹងថា ការរៀបចំបោះឆ្នោតជ្រើសរើសប្រធាន អនុប្រធានគណៈកម្មការជំនាញនានារបស់ព្រឹទ្ធសភាអាណត្តិថ្មីនេះមិនមានបេក្ខជនរបស់ខ្លួនត្រូវបានគាំទ្រ ។ មុនកិច្ចប្រជុំនេះតាមគម្រោងកូរ៉ុមត្រូវមានចំនួន៥៥រូប បើទោះបីជាសមាជិកនៃបក្សប្រឆាំងបានដើរចេញពីសម័យប្រជុំក្តីក៏កូរ៉ុមនៃកិច្ចប្រជុំមានចំនួន៤៧រូបដែរ លើសពីពាក់កណ្តាល ហើយកិច្ចប្រជុំបានបន្តមិនមានអ្វីប៉ះពាល់រាំងស្ទះទេ ។
ពេលចាប់ផ្តើមបើកកិច្ចប្រជុំលោកសាយ ឈុំ ប្រធានព្រឹទ្ធសភាស្តីទីបានប្រកាសពីរបៀបវារៈនៃកិច្ចប្រជុំ គឺការបោះឆ្នោតជ្រើសរើសប្រធាន-អនុប្រធានគណៈកម្មការជំនាញនានារបស់ព្រឹទ្ធសភានីតិកាលទី៣ ។ អង្គប្រជុំបានយល់ព្រមជាឯកច្ឆន្ទចំពោះនីតិវិធី និងការកំណត់ចំនួនសមាជិកនៃគណៈកម្មការនីមួយៗមានត្រឹមតែ៥រូបយ៉ាងច្រើនដែលបានធ្វើឱ្យសមាជិកមកពីគណបក្សសមរង្ស៊ីមិនមានក្នុងការទទួលបានតួនាទីណាមួយក្នុងមុខតំណែងជាប្រធានគណៈកម្មការ ឬអនុប្រធានគណៈកម្មការ ។
កាលពីវេលាម៉ោង៩ព្រឹកថ្ងៃទី២៩ មីនា ២០១២ សមាជិក សមាជិការបស់គណបក្សសមរង្ស៊ីចំនួន១១រូបបានបង្ហាញខ្លួនក្នុងសម័យប្រជុំពេញអង្គព្រឹទ្ធសភា ហើយបន្ទាប់មកបានដើរចេញពីសម័យប្រជុំជាលើកទី១នៅក្នុងសម័យប្រជុំលើកទី១ នីតិកាលទី៣ នៃព្រឹទ្ធសភានៃព្រះរាជាណាចក្រកម្ពុជា ។ បន្ទាប់ពីបានចាកចេញពីកិច្ចប្រជុំព្រឹទ្ធសភាមក ក្រុមសមាជិកព្រឹទ្ធសភាបក្សប្រឆាំងនេះបានធ្វើសន្និសីទកាសែតនៅខាងក្រៅបន្ទប់ប្រជុំដែលដឹកនាំដោយលោកគង់ គាំ ប្រធានស្តីទីគណបក្ស សម រង្ស៊ី ។
លោកគង់ គាំ បានថ្លែងថា ចំពោះប្រទេសប្រកាន់លទ្ធិប្រជាធិបតេយ្យ ការអនុវត្តន៍នៅក្នុងព្រឹទ្ធសភា ក៏ដូចជាក្នុងរដ្ឋសភាគណបក្សប្រជាជនកម្ពុជា គួរណាស់តែចេះចែករំលែកនូវប្រធាន ឬអនុប្រធានណាមួយដល់គណបក្សដែលបានជាប់ឆ្នោត បើទោះបីជាមិនបានជាប្រធានព្រឹទ្ធសភា ឬអនុប្រធានទី១ក្តី ។ ការមិនចែករំលែកនេះ បានបង្ហាញដល់មតិជាតិ និងអន្តរជាតិយ៉ាងច្បាស់ថា ស្ថាប័ននីតិប្បញ្ញតិទាំងពីររបស់រដ្ឋ (រដ្ឋសភា និងព្រឹទ្ធសភា) ដឹកនាំដោយគណបក្សតែមួយ និងអនុវត្តច្បាប់ដោយគណបក្សតែមួយ គឺគណបក្សប្រជាជនកម្ពុជានេះឯង ។
សមាជិកព្រឹទ្ធសភាមកពីគណបក្សប្រជាជនកម្ពុជា លោកជា ជេដ្ឋ បានថ្លែងថា បើទោះបីជាមានការចាកចេញពីសម័យប្រជុំរបស់គណបក្សសម រង្ស៊ី ក្តី ក្រុមអ្នកតំណាងរាស្ត្រមកពីគណបក្សប្រជាជនកម្ពុជា នៅតែបន្តកិច្ចប្រជុំដដែល ដោយបោះឆ្នោតដំណើរការទៅតាមរបៀបវារៈ ដែលបានគ្រោងទុក ។ សមាជិកគណបក្សសម រង្ស៊ី បានដើរចេញពីកិច្ចប្រជុំមែន តែគណបក្សនេះនៅមានបេក្ខជនរបស់ខ្លួននៅក្នុងគណៈកម្មការទី៧ និងគណៈកម្មការទី៨ ផងដែរ៕
ចែករំលែកព័តមាននេះ