រាជធានីភ្នំពេញ ៖ លោក កុយ គួង អ្នកនាំពាក្យក្រសួងការបរទេសនិងសហប្រតិបត្តិការអន្តរជាតិ បានឱ្យដឹងនៅថ្ងៃទី២៧ ខែមីនា ឆ្នាំ២០១២ថា នាពេលថ្មីៗនេះ លោកឧបនាយករដ្ឋមន្ត្រីហោ ណាំហុង រដ្ឋមន្ត្រីការបរទេស និងសហប្រតិបត្តិការអន្តរជាតិ បានផ្ញើលិខិតឆ្លើយតបមួយទៅនឹងលិខិតរបស់លោក Marty Natalegawa រដ្ឋមន្ត្រីការបរទេសឥណ្ឌូណេស៊ី ដោយក្នុងលិខិតបញ្ជាក់ថា «កម្ពុជាបានត្រៀមខ្លួនជាស្រេចដើម្បីចុះហត្ថលេខានៅពេលណាក៏បាន លើកិច្ចព្រមព្រៀងស្តីពីលក្ខខណ្ឌប្រតិបត្តិសម្រាប់ដាក់អ្នកសង្កេតការណ៍ក្នុងតំបន់គ្មានកងទ័ពបណ្តោះអាសន្ន »។
នៅក្នុងលិខិតឆ្លើយតបនោះ លោកឧបនាយករដ្ឋមន្ត្រីហោ ណាំហុង បានស្នើឱ្យលោក Marty Natalegawa រដ្ឋមន្ត្រីការបរទេសឥណ្ឌូណេស៊ី ខិតខំធ្វើយ៉ាងណាឱ្យមានការចុះហត្ថលេខាលើកិច្ចព្រមព្រៀងស្តីពីលក្ខខណ្ឌប្រតិបត្តិសម្រាប់ដាក់អ្នកសង្កេតការណ៍ក្នុងតំបន់គ្មានកងទ័ពបណ្តោះអាសន្នឱ្យបានឆាប់ ដើម្បីអាចដកកងទ័ពចេញពីតំបន់នេះឱ្យបានលឿន ស្របតាមដីកាសម្រេចរបស់តុលាការយុត្តិធម៌អន្តរជាតិទីក្រុងឡាអេ កាលពីថ្ងៃទី១៨ ខែកក្កដា ឆ្នាំ២០១១ កន្លងទៅនេះ ៕
ចែករំលែកព័តមាននេះ